Ќе поскапат ли пакетите на „Нетфликс“?

Компанијата „Нетфликс“ (Netflix) ќе се фокусира на подобрување на својот бизнис во 2025 година со различни пакети за монетизација, се вели во годишниот извештај. Во него стои и дека ќе има зголемување на цените на претплатата во САД, Канада, Аргентина и Португалија. Овој чекор очигледно е само вовед во поширока стратегија, бидејќи во февруари годинава цените во Хрватска ќе бидат подигнати на ниво кое одамна важи за словенечките корисници. 

Во Хрватска цените на премиум пакетот ќе се зголемат за 30 отсто, основниот пакет за 20 отсто, а стандардниот пакет за 25 отсто. Ова е значително зголемување што јасно ги покажува напорите на „Нетфликс“ да го подобри својот модел на приходи, но исто така покренува прашања за влијанието на овие промени врз лојалноста на претплатниците

Зголемувањето на цените доаѓа по речиси две години релативна ценовна стабилност во повеќето земји, но „Нетфликс“ засега не открива многу од своите планови. Извештајот навестува две клучни насоки. Првата се однесува на рекламните пакети, за кои велат дека веќе се 55 отсто од вкупниот број претплатници во земјите каде што се присутни. Овие пакети се подостапни и вклучуваат прикажување реклами додека гледате содржина. Тие се наменети за оние корисници кои сакаат поевтина претплата, но не се преоптоварени со реклами односно не им пречат.

Наоѓање рамнотежа и приход

Втората насока е поврзана со инвестициите во нови емисии и филмови, со кои сакаат да продолжат да обезбедуваат додадена вредност за претплатниците. Во извештајот стои и дела „повремено ќе бараат од претплатниците малку поголемо учество за да можат да инвестираат во понатамошни подобрувања на „Нетфликс“. Овој пристап е типичен веќе некое време за технолошките гиганти, кои на ваков начин бараат рамнотежа помеѓу обезбедувањето квалитет и одржувањето на растот на приходите.

Интересно е и тоа што „Нетфликс“ многу се обложува на проширување на рекламниот простор и развивање насочени реклами за претплатниците. Како што известуваат, нивната технолошка платформа на крајот ќе им овозможи да обезбедат подобрено таргетирање, попрецизни мерења и подобро известување за огласувачите. Овој потег може дополнително да ја зголеми атрактивноста на нивната платформа за огласувачите, создавајќи нов извор на приходи. Сè уште не е јасно дали пакетите за реклами ќе се нудат и во земјите каде што оваа опција сè уште не е достапна. Извештајот укажува дека тие во моментов се фокусираат првенствено на подобрување на искуството за претплатниците во земјите каде што овие пакети се веќе достапни.

Со оглед на насоката што ја развива „Нетфликс“ за 2025 година, сосема е веројатно дека ќе видиме корекции на цените на претплатите во повеќето, ако не и во сите земји. Ова го поставува прашањето како корисниците ќе прифатат повисоки цени и дали помалку флексибилните корисници ќе почнат да бараат алтернативи. „Нетфликс“ очигледно се обложува на комбинација од повисоки цени и пошироки рекламни можности како клучна стратегија за иднината. Нивната цел, се чини, е да создадат поробустен бизнис модел кој ќе се справи со флуктуациите на приходите додека ќе ги одржува иновациите во содржината.

Добри резултати

Деловните резултати на „Нетфликс“ ги надминаа очекувањата на Волстрит, што резултираше со зголемување на цената на акциите на компанијата за стриминг содржини за 14 отсто. „Нетфликс“ минатата година го забележа својот најголем квартален раст на претплатници во историјата, благодарение на враќањето на серијата „Сквид гејм“ (Squid Game), како и првите преноси во живо на големите спортски настани. Меѓу другото, „Нетфликс“ емитуваше боксерски меч меѓу Џејк Пол и Мајк Тајсон.

Компанијата додаде 18,9 милиони дополнителни претплатници, со што вкупниот број ширум светот достигна 300 милиони. Нето добивката на компанијата се удвои на годишно ниво на 1,87 милијарди долари, додека приходите се зголемија за 16 отсто на 10,25 милијарди долари, според „Блумберг“.

 

Во моментов нема коментари за веста. Биди прв да коментира...

Остави коментар