Реклама на стриминг-платформи: Каде се македонските компании?

Појавата на стриминг-платформите започнаа нова ера на впивање содржини од страна на аудиториумот, особено кога станува збор за помладите генерации. Иако прогресот се одвива бавно и традиционалните медиуми и натаму се првиот избор на публиката дури и кога станува збор за содржини за забава и рекреација, сепак напредокот е видлив и неминовно е дека во иднина трката меѓу стриминг-платформите и традиционалните медиуми ќе ја зголемува неизвесноста околу придобивањето на корисниците.

Појавата на брз интернет и широката употреба на паметните уреди го поттикнаа растот на овие платформи, нудејќи широк спектар на филмови, ТВ-емисии, музика и многу повеќе едукативни и содржини за забава и рекреација, и тоа по желба на примателите на содржината.

Потенцијалот е огромен, па, според тоа, големи се и очекувањата за раст на глобалниот пазар за стриминг-платформи. Последните сумирани податоци се за 2023 година, според кои видеостриминг-индустријата вреди 199 милијарди долари, а се предвидува вредноста на пазарот да достигне 224 милијарди долари до 2028 година.

Како што расте пазарот и во однос на консументите и во однос на понудувачите на содржини така растат и апетитите на платформите. Во обид да привлечат што повеќе претплатници, тие почнаа да креираат и сопствени содржини инвестирајќи огромни средства во оригинална содржини. На пример, компаниските податоци покажуваат дека „Нетфликс“ и „Амазон прајм видео“ (Amazon Prime Video) инвестирале вкупно над 38 милијарди долари во сопствена продукција на уникатни содржини.

Покрај тоа, стремежот за што поголем удел на пазарот ги принудува платформите сѐ повеќе да посветуваат внимание на персонализација на понудата за публиката, како во однос на индивидуалниот интерес на консументот така и во однос на локализирањето на понудите ако не според земји, барем според региони. Па така, растат и инвестициите во локална и регионална содржина со цел платформите да ги задоволат интересите на разновидната публика и да добијат конкурентна предност.

„Нетфликс“ е кралот на стримерите

Изземајќи ги бесплатните видеостриминг-платформи, како на пример „Јутјуб“ (You Tube), каде што има претплата единствено ако не сакате да гледате реклами, „Нетфликс“ и натаму е неприкосновен на пазарот. Според „Статиста“ (Statista), во 2023 година вкупните приходи на оваа платформа за видеостриминг изнесуваа приближно 33,7 милијарди американски долари. Само за потсетување, пред една деценија годишните приходи на „Нетфликс“ беа во висина од 3,4 милијарди долари. 

Компанијата има околу 13.000 вработени низ светот, а заклучно со третиот квартал од 2024 година има околу 282,7 милиони претплатници. Споредено со претходното тримесечје, „Нетфликс“ го зголеми бројот на претплатници за над пет милиони. Најголем број претплатници на оваа платформа, или околу 96 милиони, се од регионот ЕМЕА (Европа, Блискиот Исток и Африка).

Bloomberg Mercury

Во обид да го одржува растот и да одржува чекор со конкуренцијата, „Нетфликс“ лансира нова, поевтина претплата, но поддржана од реклами. Целта е да ги привлече и претплатниците чувствителни на трошоци.

Воведувањето на оваа услуга го следат и другите платформи, а тоа го одразува растечкиот тренд меѓу стриминг-услугите за диверзификација на приливот на приходи преку рекламирање.

За да привлечат повеќе корисници, особено на пазарите во развој, стриминг-платформите освен што нудат поевтина претплата со реклами и поскапа без реклами, нудат и специјални нивоа на цени, како што се на пример поевтините пакети наменети само за мобилни телефони.

Трката не е само за претплатници туку и за огласувачи

Некои истражувања покажуваат дека над 70 отсто од претплатниците признаваат дека прекумерно гледаат, односно консумираат повеќе епизоди или филмови во една сесија. Нивното неколкучасовно гледање во мониторот отвора нови можности за заработка на платформите - преку реклами. Тие што не сакаат нешто да ги деконцентрира додека ја следат омилената содржина ќе платат повеќе и ќе бидат поштедени од рекламите. Другите ќе треба да ја проследат пропагандата (или ќе го искористат времето да си земат уште една лименка пиво од фрижидер или да отворат ново ќесе грицки).

Тоа отвора ново поле за натпревар меѓу стриминг-платформите - овој пат да придобијат што е можно повеќе огласувачи. А дали компаниите се заинтересирани за рекламирање на стриминг-платформи?

„Како во светот, така и во Македонија, стриминг-платформите бележат огромен раст. Голем дел наши клиенти се прогресивни, сакаат да ги следат светските трендови, но и да ја следат публиката, која сѐ повеќе е на стриминг-платформите на сметка на традиционалните медиуми“, вели нашиот соговорник, кој е експерт во маркетинг-сферата, но за темава сакаше да зборува анонимно. Неговото искуство од работата со клиентите, односно компаниите што се рекламираат преку медиумите, покажува дека иако интересот е голем за рекламирање на ваков тип платформи, за жал, на нашиот пазар многу малку од нив дозволуваат огласување.

Bloomberg Mercury

Од тоа што е на располагање, најкористена платформа за огласување е „Јутјуб“, иако во последно време многу е популарна и аудиостриминг-платформата „Спотифај“ (Spotify).

„Како што се менуваат навиките на публиката така се менуваат и начините на огласување. Проблемот е во тоа што Македонија не е доволно голем пазар, па кај нас работите доаѓаат со задоцнување. Во моментов е прерано да се споредува значајноста на стриминг-платформите (а со тоа и на буџетите наменети за нив) со традиционалните медиуми. Со текот на времето очекуваме сѐ поголем дел од буџетот да се алоцира на овие медиуми, но секако примарно е платформите да ги овозможат опциите за рекламирање и во Македонија“, вели нашиот соговорник.
Македонскиот пазар е мал и не е особено атрактивен за стриминг-платформите, па поддршката е навистина мала, велат познавачите. Огласувањето на голем дел од најпопуларните стриминг-платформи во Македонија не е можно. Дополнителен проблем е што огласувањето на „Јутјуб“ во Македонија е предизвик пред сѐ поради политиката на „Гугл“ (Google), која не ги одобрува рекламите на македонски јазик.

„Глеј“ е македонскиот пионер во маркетингот преку стриминг-платформи

Македонската стриминг-платформа, која неодамна влезе во четвртата година од своето постоење, веќе е дел од над 80.000 семејства. Според нивните податоци, само во 2024 година има над 70.000 различни корисници, што е зголемување од над 30 отсто во однос на 2023 година. Следејќи го примерот на светските платформи и можностите за заработка преку нудење маркетинг-простор, „Глеј“ од неодамна ги „отвори вратите“ за компаниите што сакаат да се рекламираат на тој начин.

„Внесувањето реклами е суштествена промена во нашето работење, која првенствено носи бенефиција, односно подостапна содржина за корисниците на националната стриминг-платформа ‘Глеј’ (Gley)“, вели Дарко Перушески, извршен директор на „СВОД МАСТЕР АД“, односно на „Глеј“. 

Македонската стриминг-платформа нуди емитување рекламни пораки од крајот на ноември минатата година и, според нив, првичниот интерес е одличен.

„Веќе ги склучивме и првите договори за годинава. По празниците продолжуваме со запознавање на потенцијалните огласувачи, но и на корисниците со поволностите на оваа новина на нашиот пазар, со што домашната филмска, сериска и забавна програма, која е застапена на сервисот, станува подостапна за секој корисник“, вели Перушески.

Дарко Перушески, извршен директор на „СВОД МАСТЕР АД“, односно на македонската стриминг-платформа „Глеј“ Извор: „Глеј“

По принципот на стримерските гиганти, и „Глеј“ нуди два различни претплатнички пакета што содржат реклами – „Глеј слободно“ (Gley Free), кој е со бесплатен пристап до дел од програмата, и „Глеј основен“ (Gley Basic), каде што корисниците имаат пристап до целата програма за пониска цена, од само 166 денари месечно. Засега и во двата пакета се емитуваат најмногу пет реклами на час, при што во еден прекин има само една реклама. Рекламите се емитуваат на цел екран со паузирана програма и не може да се прескокне нивното емитување.

„Соодветно, и за огласувачите промотивно нудиме неколку пакети во кои можат да закупат одреден број импресии“, вели менаџерот на „Глеј“, потенцирајќи дека рекламирањето на стриминг-сервисите нуди поволности и за огласувачите и за гледачите.

За разлика од традиционалните медиуми, овде има можности за поголемо целење, што за огласувачите нуди поефикасно спојување на рекламата со специфичен корисник, вели Перушески, кој смета дека на тој начин, иако изгледот на рекламата е како на традиционална телевизија - на цел екран, огласувачот добива поголема ефикасност, а корисникот (гледачот) порелевантни реклами. 

„Како пионери во оваа област во Македонија, почетните цени по импресија ги определивме според податоците од западните земји и моменталните цени во локалните традиционални медиуми, притоа имајќи ги предвид горенаведените параметри“, вели извршниот директор Перушески.

Рекламата на стриминг-платформи, за разлика од социјалните мрежи, добива поголемо внимание од гледачот

На глобално ниво се очекува континуиран раст на стриминг-услугите што ќе содржат реклами. Огласувачите и кај нас веќе подолго време алоцираат голем дел од своите буџети за рекламирање на дигиталните платформи, а најмногу на социјалните мрежи поради придобивките од поефикасно целење, со што, според искуството на нашите соговорници, постигнуваат многу подобар поврат на инвестицијата во маркетинг.

Извор: „Глеј“

„Хендикепот кај социјалните медиуми е што тешко се постигнува комплетно внимание на корисникот, имајќи предвид дека тие реклами се само дел од мноштвото информации што се појавуваат на екранот. Стриминг-сервисите ги спојуваат и двата потребни параметри - поефикасно целење и целосно внимание. Ако на ова го додадеме фактот дека секаде во светот, па и кај нас, има нагорен тренд гледањето видеосодржини да се одвива на стриминг-платформи, тоа ни дава јасен сигнал дека потенцијалот е голем и допрва ќе се развива“, вели извршниот директор на „Глеј“.

Статистиката на „Глеј“ покажува дека токму сега е најплодниот период ако сте заинтересирани да се рекламирате преку платформата. Имено, во текот на годината јануари и декември се месеците кога се ангажираат најголем број стримачи, а во текот на неделата тоа се викендите и празниците. Во текот на денот најголем број корисници „Глеј“ има во вечерните часови.

„Лани повторно меѓу најгледаните имаше домашни серии и филмови, како и детски серии што се целосно синхронизирани на македонски и албански јазик, што ја потврдува нашата увереност дека домашната публика сака домашна продукција и квалитетна содржина локализирана на мајчин јазик“, вели извршниот директор Дарко Перушески.

Во 2024 година најгледани на „Глеј“ се сериите „Преспав“, „Убијците на мојот татко“ и „Жигосани во рекетот“, кај детската програма победници се „Патролни шепи“, „Штрумфови“ и „Коцки со броеви“, а кај филмовите најголемо внимание од претплатниците на платформата привлекоа „Нешто слатко“, „Те Дуа, жими мене“ и „Кајмак“.

 

Во моментов нема коментари за веста. Биди прв да коментира...

Остави коментар