Компанијата „Нетфликс“ (Netflix Inc.) го испитува интересот на инвеститорите за прва емисија на обврзници од инвестициско ниво што би помогнало да се рефинансира долгот што достасува (во износ 1,8 милијарда долари), изјавија за „Блумберг“ извори запознаени со плановите.
Се очекува во емисијата да бидат вклучени хартии од вредност што достасуваат за најмалку десет години, велат изворите што не сакаа да бидат именувани бидејќи информацијата не е јавна. „Морган Стенли“ (Morgan Stanley), „Голдман Сакс“ (Goldman Sachs Group Inc.), „ЏП Морган“ (JPMorgan Chase & Co.) и „Велс Фарго“ (Wells Fargo & Co) организирале повик за инвеститори одржан во понеделникот.
Портпаролот на „Нетфликс“ одби да коментира. Претставниците на „Морган Стенли“, „Голдман Сакс“ и „Велс Фарго“ исто така одбија да коментираат, додека од „ЏП Морган“ не одговорија веднаш на прашањата на „Блумберг“.
Здрав биланс на состојба
Емисијата ќе биде прва откако најголемиот светски сервис за стриминг доби инвестициски рејтинг во март минатата година. Минатата недела, и „Мудис“ (Moody's Ratings) и „Ес енд Пи глобал“ (S&P Global Ratings) го подигнаа рејтингот на „Нетфликс“ за уште една оценка.
„Ес енд Пи глобал“ го подигна рејтингот на „Нетфликс“ за два степена, од BBB+ на А, наведувајќи го двоцифрениот процентуален раст на приходите и проширувањето на маржата.
„Мудис“ наведе слични причини кога го подигна рејтингот на сервисот за еден степен на Baa1 од Baa2, додавајќи дека очекува компанијата да одржи дисциплиниран пристап за одржување „здрав биланс и доволна ликвидност“.
„Нетфликс“ го прошири своето водство во однос на конкуренцијата, додавајќи 8,05 милиони претплатници во вториот квартал и ги зголеми проекциите за продажба и профитна маржа за годинава. Бројот на претплатници ги надмина очекувањата на аналитичарите во сите региони каде што работи „Нетфликс“.
Обврзници во вредност од околу 1,8 милијарда долари (во долари и евра) достасуваат следната година, покажуваат податоците собрани од „Блумберг“. „Нетфликс“ исто така издаде обврзници во вредност од околу 12,2 милијарди долари што достасуваат подоцна, според поднесок од крајот на јуни.
Компанијата последен пат излезе на пазарот за долг во април 2020 година, кога побарувачката беше околу десет пати поголема од понудата, велат извори запознаени со состојбите.
.webp){kind=icon}
Во моментов нема коментари за веста. Биди прв да коментира...