„Ворнер брос“ планира да ја одбие понудата на „Парамаунт“ следната недела

„Ворнер брос“ (Warner Bros. Discovery Inc.) планира повторно да ја одбие понудата за преземање од „Парамаунт Скајданс“ (Paramount Skydance Corp.) откако медиумската конкурентската компанија ги измени условите на својата понуда, велат лица запознаени со ставовите во компанијата.

Одборот на „Ворнер брос“ сѐ уште нема донесено конечна одлука, но ќе заседава следната недела, рекоа соговорниците кои побарале да останат анонимни. Една од причините е и тоа што „Парамаунт“ сѐ уште ја нема зголемено понудата, која „Ворнер брос“ претходно ја одби како понеповолна во споредба со понудата од „Нетфликс“ (Netflix Inc.).

„Парамаунт“, сопственик на истоименото филмско студио и на „МТВ“ (MTV), води јавна кампања за да обезбеди поддршка за својата понуда за купување на „Ворнер брос“, кој пак е сопственик на „ХБО“ (HBO) и „Си-ен-ен“ (CNN). „Парамаунт“ на 8 декември јавно објави готовинска понуда од 30 долари по акција, три дена откако „Ворнер брос“ ја прифати зделката со „Нетфликс“, кој купува само филмско студио и стриминг-бизнисите на „Ворнер брос“. Оттогаш, „Парамаунт“ двапати ја измени својата понуда, а последниот пат додаде и гаранција од милијардерот Лери Елисон дека лично ќе обезбеди 40,4 милијарди долари капитално финансирање и други обврски.

Bloomberg

„Парамаунт“ е под контрола на Лери Елисон и неговиот син Дејвид, филмски продуцент кој гради медиумска империја. Тие ја презедоа контролата врз „Парамаунт“ во август и оттогаш поднесоа неколку понуди до „Ворнер брос“, што би им донело уште едно од оригиналните холивудски студија и поголема тежина во стриминг-секторот.

Одборот на „Ворнер брос“ останува на истата позиција и чека „Парамаунт“ да ги зголеми финансиските услови на понудата, велат соговорниците. Неколку акционери изјавиле дека очекуваат „Парамаунт“ да понуди повеќе пари. Одборот е загрижен и поради тоа што договорот со „Парамаунт“ нема да ѝ овозможи на компанијата да го управува својот долг без одобрение од семејството Елисон, како и затоа што „Парамаунт“ не гарантира дека ќе ја покрие казнената провизија што „Ворнер брос“ би морал да ѝ ја плати на „Нетфликс“.

„Ворнер брос“ тврди дека понудата од „Нетфликс“ е подобра од онаа на „Парамаунт“ поради повеќе причини, меѓу кои и тоа што „Парамаунт“ ќе влезе во високо ниво на задолженост и ќе продолжи со намалување на бројот на вработени.

„Нетфликс“ е највредната компанија во Холивуд, со пазарна вредност од над 400 милијарди долари.