Дали „Биркин“ чантата е добра инвестиција? Само ако сте подготвени на ризик

Алгоритмите на социјалните мрежи ме познаваат подобро отколку што се познавам самата. Кој би рекол дека ќе пронајдам толкава радост во гледањето „Љубов кон луксузот“ (Love Luxury), препродавач на чанти со Јутјуб канал, кој обично прикажува очајни жени што се обидуваат да продадат „Биркин“ чанти добиени од поранешни љубовници? „Едноставно е премногу болно да ја задржам“, вели една од нив. „О, а уште ѝ стојат и етикетите… можам ли да добијам 50.000 долари за неа?“

Тоа е сè што сакам да гледам: убава, но недостапна мода, романтична драма и редовно ажурирани економски лекции за вештачки создаден недостиг. Тешко е да не ви се допадне сето тоа.

Сега дури можам и да учествувам. „Луксуз“ (Luxus), соодветно именувана инвестициска компанија, има хеџ фонд што купува „Биркин“ (Birkin) и „Кели“ (Kelly) чанти од „Хермес“ (Hermès) на секундарниот пазар, а потоа ги препродава. Во првата рунда биле собрани милион долари, купени се 36 чанти, кои потоа биле продадени, а фондот тврди дека остварил приход од 40,6 отсто. Постојат планови за раст во текот на 2026 година.

Дали рецесијата ќе ја намали побарувачката за половни чанти од 50.000 долари?| Bloomberg

Тој принос би бил уште поголем доколку фондот купувал на примарниот пазар (во овој случај во бутик на „Хермес“). Но, речиси е невозможно да се купи чанта на тој начин, а тоа што го знам од сопствено искуство: потребна ви е врска со продажен советник кој ќе ве препорача кога чантата ќе стане достапна. Доколку потоа одлучите да ја препродадете, можете да го уништите тој однос и засекогаш да бидете исклучени од примарниот пазар.

Затоа фондот купува и продава на секундарниот пазар, каде што чантите им се продаваат на сите, со висока маржа. Токму недостигот на примарниот пазар ги крева цените на секундарниот.

Тоа, секако, не значи дека заработувањето пари со препродажба на чанти е лесно. Една од причините е што тоа бара предвидување на трендовите. Малопродажната цена кај „Хермес“ се заснова на материјалот и големината на чантата. На секундарниот пазар, одредени бои и големини носат повисока премија, која се менува од година во година; поголемите чанти и поединечни бои беа помалку популарни во 2025 година. Кој знае што носи следната година. Можно е трендот на мини „Кели“ чаните веќе да го достигнал својот врв.

 

Иако се тврди дека „Биркин“ чантите претставуваат добар начин за диверзификација на портфолиото, пазарот на луксузни производи главно ги следи економските циклуси. | Bloomberg

 

Модерно облечените жени можат да ја рационализираат својата скапа навика за купување чанти како инвестициска стратегија, а не како декадентна потрошувачка, бидејќи го следат растот на цените на секундарниот пазар. Секундарниот пазар на луксузна стока експлодираше во последната деценија, растејќи со стапка поголема од 10 отсто годишно, побрзо од примарниот пазар и сега вреди повеќе од 200 милијарди долари.

Секундарниот пазар на колекционерски предмети отсекогаш постоел: часовници, патики, уметнички дела и слично. Висококвалитетната стока ја продававте на трговец, но цените не беа транспарентни, а пазарот беше многу помал. Кога препродажбата се пресели на интернет и кога секундарните трговци со луксузни производи ја добија можноста да ја проверуваат автентичноста, пазарот достигна размери што овозможија поголема ценовна транспарентност и поголема ликвидност.

Денес, пазарот на половни луксузни стоки е дел од поширок тренд што влијае на различни индустрии - финансиализација на сè. Фонд кој се обидува да заработи на секундарниот пазар на луксузни чанти претставува логичен следен чекор.

Сопствениците на ваква чанта ќе очекуваат да заработат премија, но стоките за широка потрошувачка не се акции.| Nathan Laine/Bloomberg

 

На некој начин, тоа може да се спореди со пазарот на опции. Можноста берзанските опции да се набљудуваат и вреднуваат го создаде модерниот пазар на деривати и го трансформираше целиот финансиски свет. Теоретски, голем секундарен пазар би можел да го стори истото за стоките за широка потрошувачка. Но, перспективите не се одлични. Стоките за широка потрошувачка не се акции. Тие излегуваат од мода од непредвидливи причини и губат вредност со секоја употреба, што обично ја намалува нивната цена.

Она што ја поттикнува оваа „Биркин“ еуфорија е биковскиот пазар - берзата, која годинава порасна за околу 15 отсто. Луѓето имаат повеќе пари и се подготвени на поголем ризик. И покрај тврдењата дека „Биркин“ чантите се добар начин за диверзификација на портфолиото, пазарот на луксузна стока главно ги следи економските циклуси. Рецесијата веројатно ќе ја намали побарувачката за половни чанти од 30.000 долари. Повеќето купувачи на секундарниот пазар бараат попусти, но сопствениците кои на своите чанти гледаат како на инвестиција ќе очекуваат да заработат премија.

Сепак, и понатаму сакам да ги гледам тие видеа.