Кина им наложи на банките да пријават колку финансиски се поврзани со Венецуела по акцијата на САД

Кинескиот водечки финансиски регулатор од своите државни развојни банки и другите големи заемодавачи побара да пријават колкава кредитна изложеност имаат кон Венецуела, откако САД го симнаа од власт лидерот на јужноамериканската земја, кој важеше за близок до Пекинг, велат добро упатени извори.

Националната управа за финансиска регулација исто така ги повикала банките да го зајакнат следењето на ризиците поврзани со сите кредити поврзани со Венецуела, со цел да се процени потенцијалната закана за кинеските заемодавачи, велат истите извори, кои побарале анонимност.

Директивата укажува на растечка загриженост кај регулаторите од можни шокови врз банкарскиот сектор во услови на засилени геополитички ризици. Венецуела долго време е важен партнер на Кина во енергетиката и инфраструктурата, со милијарди долари кредити одобрени во изминатата деценија, главно преку државните развојни банки како „Кинеската развојна банка“ (China Development Bank).

„Ако САД го наметнат својот став и американските доверители и побарувачи станат приоритетни доверители на венецуелскиот долг, кинеските доверители ќе се соочат со поголем ризик од неисполнување на обврските кон нив, бидејќи венецуелската влада и државните компании ќе се мачат да ги задоволат барањата на САД и истовремено да ги покриваат домашните расходи,“ вели Виктор Ших, професор на Универзитетот на Калифорнија во Сан Диего.

Националната управа за финансиска регулација - НФРА (NFRA), не одговори веднаш на барањето за коментар.

Кина стана еден од главните кредитори на Венецуела во 2007 година, кога за првпат одобри средства за инфраструктурни и нафтени проекти под покровителство на тогашниот претседател Хуго Чавез. Јавните податоци ги потврдуваат проценките дека Пекинг одобри повеќе од 60 милијарди долари кредити обезбедени со нафта преку државните банки, сè до 2015 година.

Алисија Гарсија Хереро, главна економистка за АПЕК во „Натиксис“(Natixis), изјави за „Блумберг ТВ“ (Bloomberg Television) дека сумата веројатно е пониска денес, бидејќи Кина има поголемо учество во сопственоста во земјата.

Кинеското Министерство за надворешни работи изрази „длабок шок и силна осуда“ за потегот на Вашингтон, нарекувајќи го сериозно кршење на меѓународното право, целите и принципите на Повелбата на ОН и основните начела на меѓународните односи. Министерството посебно побара итно ослободување на претседателот Николас Мадуро и неговата сопруга, кои беа уапсени во акцијата.

Американскиот претседател Доналд Трамп изјави дека на САД им е потребен „целосен пристап“ до Венецуела, додека растат дилемите за идното раководство на земјата по апсењето.