Во Македонија лани увезени 65 возила поскапи од 100.000 евра

Во Македонија лани биле увезени 65 патнички возила вредни над 100.000 евра, информираат од Царинската управа за „Блумберг Адрија“. Тоа е за пет помалку споредено со 2023 година, кога во земјава биле увезени 70 луксузни автомобили што ја надминуваат границата од 100.000 евра.  

„Најголем дел од возилата е увезен од Германија и Велика Британија, и тоа од брендовите ’Мерцедес’, ’Порше’ и помалку ’Ленд ровер’“, се наведува во одговорот што го добивме од Царинската управа.

Овие 65 возила што лани влегле во земјава се во вредност од над осум милиони евра (495.970.652 денара). Нивните сопственици за да ги внесат во земјава платиле увозни давачки во висина од над 3,3 милиони евра (203.341.621 денар).

И во 2023 година најголем дел од вкупно 70 возила што чинат над 100.000 евра бил увезен од Германија и Велика Британија. И тогаш најмногу се увезувале моделите на „Мерцедес“, „Порше“ и „Ленд ровер“. Вкупната вредност на увезените возила во 2023 година е поголема од девет милиони евра (560.298.433 денари), а увозните давачки чинеле над 3,8 милиони евра (237.043.896 денари).

Кој купува луксузни возила?

Победниците купуваат луксузни возила, рече неодамна во разговор за телевизијата „Блумберг Адрија“ Златко Муцунски, генерален директор на „Порше Македонија“.

Тој уште додаде дека од салонот на „Порше“ во земјава излегле неколку модели на „порше карера 911“, кои се продаваат по цена од околу 300.000 евра.

„Побарувачката на луксузни возила не е голема, но таа е соодветна на општата ситуација и на големината на пазарот“, рече Муцунски.

Најновата генерација на легендарниот „порше 911 карера ГТС“ во земјава беше промовирана во ноември лани.

„Ферарито“ на Мијалков топ тема годинава

Луксузните возила се топ тема во земјава од почетокот на годината. Најмногу се пишуваше за „ферарито“ со кое поранешниот разузнавач Сашо Мијалков беше снимен во Монте Карло, но и „ролс ројсот“ на Дрин Ахмети, внукот на лидерот на ДУИ, Али Ахмети.

Според процените што ги објавуваат медиумите, црвениот автомобил „ферари“ од кое излегува Мијалков пред луксузниот ресторан во Монте Карло чини меѓу 630 и 710 илјади долари. Овој автомобил, според снимката, е со странски ознаки. Белиот „ролс ројс“ со кичевски таблички за кој се претпоставува дека го вози младиот Ахмети чини 400.000 долари.

И државните функционери сакаат луксузно возење

Лани, непосредно пред изборите, Владата се поднови со 45 нови возила во вредност од 2,2 милиони евра

Возилата се на лизинг и се од моделот „шкода суперб“ (Skoda New Superb Colection 2.0 TDI). Цената на едно возило изнесува околу 50.000 евра, а месечната рата е 1.400 евра за еден автомобил.

Владата бараше возилата да бидат лимузини, да работат на дизел гориво и да имаат над две илјади кубни метри моторна зафатнина. Во спецификацијата е наведена и редица на друга опрема што треба да ја поседуваат возилата во кои ќе се возат функционерите, меѓу кои и автоматски менувач на брзини, погон на сите четири тркала, да бидат црна боја и да бидат речиси пет метри долги.

Крадени луксузни возила од Европа

Своевремено, поранешната министерка за внатрешни работи Гордана Јанкуловска се возеше со украдениот џип на фудбалската ѕвезда Дејвид Бекам, кој полицијата го имаше запленето. Стануваше збор за сребрено-сив БМВ Х5, кој бил украден во Шпанија во времето кога тој настапуваше за Реал Мадрид. Јанкуловска со него се појави во 2007 година.

Земјава и натаму е привлечна дестинација за крадците на луксузни возила. На почетокот на јануари годинава четири лица завршија во притвор под обвинение дека возила украдени во земји од ЕУ завршувале на македонскиот пазар.

Обвинение за овој случај е поднесено за десет лица, кои се осомничени дека учествувале во дејства на шверцување луксузни автомобили, како и фалсификување службени и други исправи.

„Во текот на 2021 и 2022 година тие со лажни документи и преправени броеви на шасија внесувале во земјава автомобили што биле предмет на меѓународна потрага, како и автомобили за кои на друг начин ја избегнувале царинската контрола. Двајца од обвинетите се службени лица – референти од Одделението за управни работи во МВР, кои ја овозможувале постапката за регистрација на возилата во државава иако знаеле дека се шверцувани. Некои од возилата по неколкупати меѓусебно си ги препродавале за да го прикријат шверцувањето, по што им ги отуѓувале на крајни корисници“, соопшти тогаш обвинителството.

Во моментов нема коментари за веста. Биди прв да коментира...

Остави коментар