Ќе поскапуваат ли автомобилите следната година?

Силната конкуренција во автомобилската индустрија, нормализирањето на состојбата во синџирите за снабдување и претпазливоста на потрошувачите, кои се изгорени од високата инфлација во изминатиов период, се главните причини поради кои не треба да се очекува пораст на цените на автомобилите во текот на 2025 година.

Агенцијата „Фич рејтингс“ очекува стабилност во глобалниот автомобилски сектор, при што глобалната продажба на лесни возила се предвидува да се зголеми за околу два процента.

„Овој раст ќе биде нерамномерно распределен низ регионите, бидејќи европските и кинеските пазари се соочуваат со макроекономски предизвици. Очекуваме цените да останат придушени поради ескалацијата на конкуренцијата“, наведуваат од „Фич“.

Од „Фич“ констатираат дека иако глобално расте продажбата на електричните возила (ЕВ), таа е на рамно ниво во САД и во Европа поради загриженоста на потрошувачите во врска со опсегот и намалувањето на преостанатите вредности од брзото приспособување на технологијата и конкуренцијата.

„Не очекуваме значително зголемување на продажбата на електрични возила во 2025 година, бидејќи владините субвенции и регулатива се недоволни за да се решат тие проблеми. Понатамошните регулаторни промени или одложувања веројатно негативно ќе влијаат на усвојувањето на електричните возила во Европа и во САД, додека кинескиот пазар продолжува со својот постојан раст“, посочуваат од „Фич“.

Инаку, кога станува збор за пазарот на електрични возила, „Блумберг Адрија“ веќе објави дека некои производители како „Тесла“ веќе ги намалија цените и најавија производство на помали модели по поприфатливи цени до 25.000 евра, а слични најави има и од другите производители.