Колку ли се „штелувани“: Македонскиот возен парк надмина 550.000 автомобили

Рекордно зголемување има на бројот на регистрирани возила во Македонија, чиј број заклучно со 2023 година достигнал 658.894, а од нив 552.934 биле патнички автомобили. Според податоците на Државниот завод за статистика, лани бројот на патнички автомобили бележи драстичен пораст во однос на претходната 2022 година, кога во земјава имало 483.482 регистрирани автомобили.

Математиката покажува дека за една година бројот на регистрирани автомобили во Македонија се зголемил за над 69.000, што е значителен раст во однос на просекот од изминативе години. Во Македонија секоја година се увезуваат повеќе употребувани отколку нови возила, што го наметнува прашањето колку е стар возниот парк во земјава.

Според официјалните податоци, од вкупниот број возила во земјава најмногу (околу 49.000) се произведени во 2007 година. Евиденцијата покажува дека доминираат возила што се постари од 14 години и дека многу се поретки новите возила. Имено, на македонските улици лани имало само 660 возила произведени во 2023 година.

Шминка и штелувана километража за полесна продажба

„Блумберг Адрија“ веќе пишуваше дека купувањето половно возило носи одредени ризици. На пазарот има многу автомобили со штелувани километри и скриени дефекти, предупредуваат од Авто-мото сојузот на Словенија (АМЗС). Многу е тешко тие да се забележат со површно гледање на автомобилот.

„Автомобил што изгледа многу убаво и добро одржувано може да има и повеќе од 300.000 километри или многу повеќе од прикажаната состојба. Со менување на воланот, рачката на менувачот, педалите и козметичките поправки, вистинската состојба на автомобилот може многу добро да се прикрие“, предупредуваат од АМЗС.

На дигиталните табли, кои стануваат доминантни во ерата на дигитализација и електрификација, лажното внесување километри е брзо, едноставно и евтино, пишува Петер Кавчич, уредник на порталот на АМЗС -„Добер авто“ (DoberAvto.si). Тој советува купувачите темелно да ја проучат историјата на користениот автомобил што сакаат да го купат. Тоа можат да го направат со помош на сервисната книшка, во која може да се провери кога и на колку километри автомобилот бил сервисиран.

Бази на податоци што можат да помогнат при проверката

Освен сервисната книшка, многу за историјата на автомобилот може да помогне проверката на бројот на шасијата. Платформи за проверка на историјата на возилата како што се „ауто-км“ (auto-km) и „вин чек експерт“ (wincheckexpert) располагаат со бази на податоци за стотици милиони возила и нудат можност да се провери дали е извршена манипулација со километражата, што незаконски ја зголемува цената на возилото. Потоа, дали возилото учествувало во сообраќајна несреќа односно дали било оштетено или, пак, дали е можеби украдено од некоја земја.  

Во моментов нема коментари за веста. Биди прв да коментира...

Остави коментар