Кои автомобили имаат најмногу, а кои најмалку дефекти?

Еден од пет автомобили паѓа на општиот технички преглед затоа што има значителни или опасни дефекти, покажува извештајот на германската Асоцијација за техничка инспекција - ТУВ (TUV), кој го објави германскиот автомобилски клуб АДАК (ADAC). Извештајот на ТУВ за 2025 година открива кои модели на возила имаат особено добри или особено слаби перформанси при општата инспекција и каква е состојбата кај електричните автомобили. Тој се базира на извршени 10,2 милиони технички прегледи на автомобили за периодот од јули 2023 до јуни 2024 година, во чии рамки се прегледани 228 модели на возила, поделени во шест старосни групи. Целокупната евалуација на ТУВ покажува дека 20,6 проценти од возилата имале значителни или опасни дефекти и не ја поминале главната проверка. Споредено со истиот период лани, тоа претставува зголемување од 0,1 процентен поен. Процентот на возила со помали дефекти исто така е зголемен на 11,5 отсто, за 0,3 поени повеќе од претходната година.

„Хонда џез“ и „порше карера“ убедливо најдобри

Севкупниот победник во извештајот на ТУВ за 2025 година е малиот автомобил „хонда џез“ (Honda Jazz). Само 2,4 проценти од возилата стари две-три години имале значителни дефекти. Ова е најниската вредност од сите тестирани возила. „Порше 911 карера“ е победник во другите старосни категории.

Наодите во извештајот покажуваат дека колку се постари автомобилите толку е поголема стапката на дефекти. На главниот технички преглед паднале 28,1 проценти од возилата стари од 12 до 13 години, а само 6,4 проценти од возилата стари две-три години. Вкупно 15.000 возила веднаш биле исфрлени од употреба бидејќи се сметале за „небезбедни за возење“.

Каква е состојбата кај електричните возила

Генерално, според ТУВ, електричните автомобили не се ниту побезбедни ниту помалку безбедни од автомобилите што имаат мотори со согорување.

„Фолксваген е-голф“ (VW e-Golf), кој повеќе не се произведува, е најдобриот електричен автомобил, со стапка на дефекти од 3,4 проценти, и се наоѓа на 9-то место од 111-те разгледани возила стари од две до три години. Впечатливо е дека „тесла модел 3“ (Tesla Model 3) се најде на 111-то место, со стапка на дефекти од 14,2 проценти односно на последното место меѓу сите модели оценети во оваа класа и меѓу автомобилите стари четири-пет години.

„Големата километража не може да ги прикрие лошите перформанси на ‚модел 3‘. Покрај дефектите во сопирачките и оските, автомобилите ’тесла’ имаат и особено голем број дефекти во осветлувањето. Тоа укажува на недостатоци во сервисот и одржувањето“, рече Јоаким Булер, извршен директор на ТУВ.

Пропуштена шанса

Гледајќи го трендот во последните неколку години, стапките на дефекти во Германија се вратени на претходното ниво по позитивниот пандемиски ефект.

„Во екот на пандемијата и заклучувањето, сопствениците на возила имаа повеќе време да се грижат за одржување и грижа за своите автомобили“, констатираат од ТУВ.

Оттаму заклучуваат дека можноста за одржливо подобрување на техничката безбедност на возниот парк во Германија не се реализирала.

 

Во моментов нема коментари за веста. Биди прв да коментира...

Остави коментар