Доналд Трамп денес ги претставува најавените царини, а во пресрет на овој настан цената на златото се приближи до рекордни вредности. Европската унија ги казни „Фолксваген“ (Volkswagen), „Рено“ (Renault) и „Стелантис“ (Stellantis) поради картелско здружување во врска со рециклирањето на возила. Фјучерсите на европските акции утрово се тргуваат претежно во зелено.
ПОЛИТИКА
Трамп денес го претставува планот за царини
Американскиот претседател Доналд Трамп денес ќе ги најави најновите трговски ограничувања, кои дополнително ќе го раздрмаат глобалниот трговски систем и ќе предизвикаат сериозни економски последици. Трамп денешниот ден, во повеќе наврати, го нарече „Ден на ослободување“, најавувајќи воведување на таканаречени реципрочни царини за трговските партнери, во рамки на напорите да го врати производството во САД. Царините ќе бидат објавени за време на настанот кој е закажан за 16 часот во Градината на розите во Белата куќа.
Златото на рекорд пред новите царини
Неизвесноста околу царините ги раздрма глобалните пазари на акции, но и ги поттикна економистите да ги намалат своите прогнози за глобалниот раст. Во пресрет на стапувањето во сила на новите американски царини, цената на златото повторно се приближи до рекордни вредности. Така, спот цената на златото порасна за 0,5 проценти на 3.129 долари за унца.
Антимонополска казна за авто-индустријата
Европската унија казни неколку големи производители на автомобили, вклучувајќи ги „Фолксваген“, „Рено“ и „Стелантис“, со вкупно 458 милиони евра поради картелско здружување во врска со рециклирањето на возила на крајот од животниот век. „Во текот на период од 15 години, 16 големи производители на автомобили од европското Здружение на производители на автомобили, склучувале антиконкурентски договори“, се наведува во истрагата на Европската комисија. И покрај учеството во картелот, „Мерцедес“ (Mercedes-Benz) избегна парична казна, бидејќи го откри картелското здружување на Комисијата. Најголемата казна од 128 милиони евра ја доби германскиот „Фолксваген“, додека „Рено“/„Нисан“ е втор на листата со казна од 81 милион евра.
Bloomberg
БЕРЗИ
Европа
Фјучерсите на европските акции утрово тргуваат претежно во зелено. Европските пазари и тргувањето во вторникот го завршија со добивки, откако најновите податоци покажаа дека инфлацијата во еврозоната забавила на 2,2 проценти во март, во споредба со 2,3 проценти во февруари.
САД
Истовремено, фјучерсите на американските акции утрово се тргуваат мешано, во исчекување на реципрочните царини кои денес ќе ги објави американскиот претседател Доналд Трамп. Како што е соопштено од Белата куќа, Трамповите царини стапуваат на сила веднаш по објавата, која е планирана за 16 часот во Белата куќа. Повеќе за влијанието на царините врз пазарите на капитал, ќе слушнеме од Кристофер Смарт од АГ (Arbroath Groupe).
Азија
Кога станува збор за акциите во азиско-пацифичкиот регион, тие се колебаат помеѓу добивки и загуби. Додека акциите во Јапонија и Јужна Кореја претежно се во пад, индексите во континентална Кина и во Хонгконг тргуваат со добивки.
НАФТА
Брент се тргува под 75 долари за барел по падот од 0,4 проценти во вторникот, додека ВТИ (West Texas Intermediate) е над 71 долар. Трговците чекаат американскиот претседател да ги објави своите царински мерки, кои ги загрозуваат изгледите за глобален раст.
Bloomberg
.webp){kind=icon}
