Почина папата Франциск, објави кардиналот Кевин Фарел, а пренесе италијанската новинска агенција АНСА.
Тој беше 226-от римски бискуп и шеф на државата и суверен на Ватикан. Ја водеше Католичката црква од 13 март 2013 година, а почина на 88-годишна возраст.
„Драги браќа и сестри, со длабока тага морам да ја објавам смртта на нашиот свет отец Франциск. Во 7.35 часот утрово римскиот бискуп Франциск се врати во домот на Отецот. Целиот негов живот беше посветен на службата на Господ и Неговата црква. Тој нè научи да ги живееме евангелските вредности со верност, храброст и универзална љубов, особено во корист на најсиромашните и најмаргинализираните. Со неизмерна благодарност за неговиот пример како вистински ученик на Господ Исус, душата на папата Франциск ја поклонуваме на бескрајната милосрдна љубов на Едниот и Троичен Бог“, објави кардиналот Фарел.
На 14 февруари, понтифот беше примен во болница со тешка респираторна инфекција, а беше отпуштен на 23 март. Тој вчера кратко се појави на балконот на базиликата Св. Петар за благословот Урби и Орби и им го честиташе Велигден на верниците.
Прочитајте повеќе: Папата имал мирна ноќ, но ризикот по здравјето останува
Секуларното име на папата е Хорхе Марио Бергољо. Роден е на 17 декември 1936 година во Буенос Аирес, главниот град на Аргентина. Тој беше првиот језуит и првиот латиноамериканец, како и првиот член на црковниот ред од Григориј XVI (1831–1846) и првиот неевропеец по Григориј III (731–741) што беше на папската позиција.
Неговите обиди за реформа на ватиканската бирократија наидоа на отпор, а критичарите укажуваат на неговата слабост при соочувањето со скандалите за сексуална злоупотреба во црквата. Сепак, овој папа остави белег со својата скромност, фокусот на сиромашните и напорите да ја направи Католичката црква поотворена кон светот.
Папата Франциск ќе остане запаметен и во нашата историја како прв поглавар на Римокатоличката црква што ја посетил Македонија. На 7 мај 2019 година на централниот плоштад во Скопје папата Франциск одржа света литургија, а по неговата посета порача дека „Македонија е портата преку која христијанството влезе во Европа“, а жителите на македонското тло биле првите Европејци на кои апостолот Павле им го пренел Христовото учење. Тој притоа напомена дека „Бугарија и Македонија се две древни, но и различни нации“, истакнувајќи дека „македонскиот народ има голема културно-историска традиција, но дури неодамна успеа да ја конституира својата државност“.
Ажурирано со информацијата за историската посета на папата на Македонија
.webp){kind=icon}
