Тајланд започна воздушни напади врз воени објекти во Камбоџа, најдраматичната ескалација во последните месеци што го загрозува мировниот договор за кој се залагаше американскиот претседател Доналд Трамп.
Тајландската војска соопшти дека извршила копнени и воздушни операции со Ф-16 откако камбоџанските сили отвориле оган врз повеќе гранични локации, при што загинал најмалку еден тајландски војник, а околу десетина биле повредени. Четири цивили биле убиени во тајландските напади, соопшти Министерството за информации на Камбоџа. Министерството за одбрана на Камбоџа, пак, соопшти дека не возвратило на нападите.
Добро утро, следуваат останатите вести кои се важни на почетокот на новата работна недела.
Зеленски вели дека засега нема договор за Источна Украина во разговорите со САД
Украинскиот претседател Володимир Зеленски рече дека преговарачите кои дискутираат за мировна иницијатива под посредство од САД остануваат поделени околу територијата, додека американскиот претседател Доналд Трамп изрази разочарување од начинот на кој Киев гледа на договорот.
Елементите од американскиот план бараат понатамошна дискусија за голем број „чувствителни прашања“, вклучувајќи безбедносните гаранции за воено погодената нација и контрола врз источните региони, рече Зеленски во телефонско интервју за „Блумберг“. Украинскиот лидер рече дека разговорите сè уште не постигнале договор за украински Донбас, вклучувајќи ги покраините Донецк и Луганск.
Тој вчера во Лондон се сретна со британскиот премиер Кир Стармер, германскиот канцелар Фридрих Мерц и францускиот претседател Емануел Макрон. По средбата Зеленски рече дека мировниот план на САД сега е намален на 20 точки и најави дека Украина ќе го ревидира сегашниот нацрт на американскиот мировен предлог и веројатно уште вечерва ќе го достави до Вашингтон.
Плаќањето данок на капитални добивки од странство сведено на патриотизам?
Има ли државата ефикасни механизми да ги даночи капиталните добивки што македонските резиденти (физички и правни лица) ги остваруваат од вложувања во странски хартии од вредност е прашање кое што заслужува внимание ако се земе предвид дека според евиденцијата на Народната банка ниту едно физичко лице односно домаќинство во Македонија нема инвестициско портфолио во странство.
Всушност, евиденцијата на централната банка не ги опфаќа вложувањата на резидентите преку различните онлајн платформи за инвестирање во странски хартии од вредност кои според познавачите на пазарот на капитал стануваат сè попопуларни меѓу македонските граѓани. Според регулативата, капиталните добивки остварени на странските пазари на капитал во земјава подлежат на данок од 10 проценти.
Походот на Трамп кон доминација во ВИ го кочат неговите удари врз обновливите извори на енергија
Администрација на Трамп ја забрзува изградбата на исклучително енергетски интензивни центри за податоци и ги третира како инфраструктура од национална безбедносна важност. Истовремено, таа поставува нови пречки за развојот на соларните и ветерните централи. Но, со тоа се создава проблем бидејќи едниот потег го поткопува другиот. Забавувањето на зелените проекти би можело да го закочи развојот на вештачката интелигенција и дополнително да ги поттикне веќе растечките цени на електричната енергија, покажуваат голем број податоци.
Трамп предупреди дека договорот меѓу „Нетфликс“ и „Ворнер“ може да биде антимонополски проблем
Претседателот на САД, Доналд Трамп, изрази загриженост за потенцијален антимонополски проблем во врска со планираното преземање на „Ворнер брос дискавери“ (Warner Bros. Discovery Inc.) од страна на „Нетфликс“ (Netflix Inc.) за 72 милијарди долари. Тој истакна дека пазарниот удел на комбинираниот ентитет може да претставува проблем.
Коментарите на Трамп може да предизвикаат загриженост дека регулаторите ќе се спротивстават на спојувањето на доминантната светска стриминг услуга со холивудската икона. Компанијата инаку се соочува со долга ревизија на договорот од страна на Министерството за правда, а одобрувањето на спојувањето би ја преобликувало индустријата за забава.
Илон Маск бара Европската Унија да се распушти
Бизнисменот Илон Маск повика на распуштање на Европската Унија откако неговата социјална мрежа X беше казнета со 120 милиони евра.
„ЕУ треба да се распушти, а суверенитетот да им се врати на поединечните земји, за да можат владите подобро да ги претставуваат своите граѓани“, напиша Илон Маск во објава на X во саботата.
Европската комисија го казни X за лажни платени беџови за верификација, недостаток на транспарентност во неговата архива на реклами и ограничување на пристапот до податоци за истражувачите.
.webp){kind=icon}
