Невреме ги парализира САД - енергетската мрежа под закана

Министерството за енергетика на САД прогласи енергетска вонредна состојба во Тексас бидејќи силната зимска бура ја стави на тест електричната мрежа на државата со мраз, снег и температури кои се очекува да паднат во ниски двоцифрени и едноцифрени вредности.

Наредбата, потпишана од секретарот за енергетика Крис Рајт, му овозможува на операторот на мрежата на државата да распореди резервно производство во дата-центри и други големи објекти, „поради ненадејно зголемување на побарувачката, недостиг на електрична енергија, недостиг на капацитети за производство на електрична енергија.“

„Ова екстремно ниво на побарувачка создава значителен ризик од вонредни услови кои би можеле да ја загрозат електричната сигурност и јавната безбедност,“ напиша операторот на мрежата во барањето за итна акција во саботата.

Повеќе од 175 милиони луѓе ќе се соочат со снег, дожд, замрзнат дожд и мраз во текот на викендот, бидејќи рекордно ниските температури низ централните и источните региони ја поттикнуваат најголемата зимска бура оваа сезона.

Во Тексас, речиси 50.000 корисници останале без струја до 23:19 часот по њујоршко време. Бурата се смета за еден од најголемите тестови за електричната мрежа на државата од смртоносниот колапс за време на замрзнувањето во февруари 2021 година, кога загинаа повеќе од 240 луѓе и целата држава беше парализирана.

Околу 236.000 домови и бизниси од Колорадо до Атлантикот беа без струја во 3 часот наутро по њујоршко време, со најголем дел во Мисисипи, Тексас и Луизијана.

Министерството за енергетика во петокот предупреди операторите на мрежата да бидат подготвени да обезбедат резервна енергија пред бурата, вклучувајќи и струја од дата-центри - невообичаен потег за објекти кои обично не обезбедуваат енергија за мрежата.

Освен енергетска криза, силната зимска бура приземји илјадници летови низ САД, а за денеска се најавува и многу снег во Њујорк и североисточниот коридор. Управата на Метрополитен транспорт во Њујорк ги повика клиентите да избегнуваат непотребни патувања во недела и понеделник, предупредувајќи на нарушувања во метрото, автобусите и приградските железници.

До доцна во саботата, повеќе од 15.200 летови низ САД беа откажани до понеделник, нивоа невидени од минатогодишното затворање на владата, според компанијата за следење на летови FlightAware.

Огромната бура покрива делови од 32 држави и речиси половина од населението на САД, рече Брајан Хурли, виш прогнозер во US Weather Prediction Center. „Поминаа пет години од последниот пат кога бура покри толку голема област,“ рече тој.

Во целост, бурата може да предизвика до 24 милијарди долари штети и економски загуби, рече Чак Вотсон од Enki Research.

Студеното време ќе остане и по заминувањето на бурата. Во Вашингтон температурата ќе достигне минимум од -15 степени во понеделник навечер и Њујорк со минимум од -13 степени во вторник. Вашингтон ќе има прва седумдневна серија со температури под нулата од 1989 година, рече Хурли.