Саудиска Арабија и Обединетите Арапски Емирати презеле чекори кон приклучување во војната со Иран, објави „Волстрит џурнал“, што потенцијално укажува на можно проширување на конфликтот.
Саудиска Арабија се согласила да им овозможи на американските воени сили пристап до воздухопловната база „Крал Фахд“, објави весникот, повикувајќи се на лица запознаени со прашањето. Тоа претставува очигледен пресврт по претходната позиција на Ријад дека неговите бази не може да се користат за напад врз долгогодишниот ривал.
Весникот, исто така повикувајќи се на извори запознаени со случајот, наведува дека Обединетите Арапски Емирати затвориле болница и клуб во сопственост на Иран, потег што го поткопува еден од клучните извори на поддршка за Техеран.
Во извештајот се наведува и дека видеоснимки наводно покажуваат дека дел од ракетите употребени во нападите врз Иран биле лансирани од Бахреин. Американската војска одбила да потврди дали добива помош од земји во регионот, пренесува весникот.
По објавата на „Волстрит џурнал“, цената на суровата нафта благо се зголеми, додека фјучерсите на американските берзански индекси ги избришаа претходните добивки.
Потезите што ги објави весникот укажуваат дека партнерите на Вашингтон од Персискиот Залив стануваат сè понетрпеливи кон Иран, кој на американските и израелските напади одговори со напади врз цели во неколку соседни земји. Израелскиот напад минатата недела врз иранско гасно поле предизвика одмазднички удари од Иран врз енергетска инфраструктура низ Блискиот Исток.
Американскиот претседател Доналд Трамп го укори Израел, по што Тел Авив соопшти дека повеќе нема да таргетира енергетска инфраструктура.
Извештајот на „Волстрит џурнал“ уследи откако Трамп во понеделникот објави дека ќе се воздржи од напад врз иранската енергетска инфраструктура во следните пет дена, по, како што рече, „продуктивни разговори“ со земјата. Трамп сè уште не открил детали за тоа кои учествувале во разговорите ниту за можните услови на евентуален договор.
„Аксиос“ во понеделникот објави дека Стив Виткоф преговарал со претседателот на иранскиот парламент Мохамад-Багер Галибаф. Галибаф, пак, во објава на X наведе дека не се одржани никакви преговори со САД. Иранската државна телевизија, во меѓувреме, соопшти дека САД во последните денови се обиделе да воспостават разговори со Иран преку посредници, но владата во Техеран не одговорила на тие барања.
.webp){kind=icon}
