Трамп го номинира Стефен Миран за член на Управниот одбор на Фед

Американскиот претседател Доналд Трамп соопшти дека го избрал претседателот на Советот на економски советници Стефен Миран за нов гувернер на Федералните резерви.

„Со мене е од почетокот на мојот втор мандат, а неговата експертиза во светот на економијата е ненадминлива, ќе ја врши функцијата одлично“, напиша Трамп во четвртокот на социјалните мрежи.

Претседателот додаде дека Миран, кој ќе треба да биде потврден од Сенатот на САД, ќе ја одработи само преостанатата должност од мандатот на актуелната гувернерка на Фед, Адријана Куглер, кој завршува во јануари. „Во меѓувреме ќе продолжиме да бараме трајна замена“, рече Трамп.

Индексот Bloomberg Dollar Spot ги избриша дневните добивки по објавата за номинацијата на Миран. Федералните резерви одбија да коментираат.

Миран, кој има докторат по економија од Универзитетот Харвард (Harvard University), досега отворено ја поддржуваше заложбата на Трамп за пониски каматни стапки. Иако e познат по умерениот тон во своите јавни настапи, за разлика од некои други советници на Трамп, Миран е остар критичар на Федералните резерви и има предложено реформи во централната банка што некои ги сметаат за нетипични.

Во труд објавен во март 2024 година, Миран и Ден Кац, кој сега е шеф на кабинетот во Министерството за финансии, изложија план на 24 страници за реформирање на Федералните резерви, во кој грешките во политиките на централната банка ги припишуваат на „групно размислување“ (англ. groupthink). Во документот, Фед се критикува и за тоа што, според авторите, се впуштиле во политички области што се надвор од нивните овластувања.

„Резултатите на Федералните резерви во изминативе години отвораат прашања дали институцијата навистина функционира во согласност со најдобрите практики на независноста на централната банка“, напишаа Миран и Кац.

Тие предложија монетарната политика да се одвои од регулацијата и надзорот на банкарскиот сектор во рамките на Фед, преку одземање на овластувањата на одборот за тие надлежности. Таквата промена, која би барала законски измени, според нив, би помогнала „да се избегне непотребно загадување на процесот на водење монетарна политика“.

Џо Гилберт, портфолио-менаџер во „Интегрити асет менаџмент“ (Integrity Asset Management), изјави дека Миран „не беше очекуван избор, но сепак се вклопува во рамките што пазарот ги прифати“.

„Миран би бил уште еден глас што, можно е, би ја поддржал попуштената политика на Фед“, изјави Гилберт. „Тоа ја зацврстува претпоставката дека Фед ќе продолжи со олеснување на каматната политика до крајот на годината, бидејќи е малку веројатно одборот да ги задржи каматите на исто ниво ако има три несогласувања. Официјално влеговме во циклус на монетарно олеснување за пазарите“.

„Во целина, не очекуваме значајна инфлација како резултат на царините“, изјави Миран. Доколку, сепак, има инфлација поради царините, „тоа би било еднократно зголемување на ценовното ниво, а не траен тренд“, додаде тој.

Други коментатори беа поскептични во однос на тоа колку влијание би можел да има Миран.

„Во суштина, тој е само еден член и нема да влезе таму за да спроведе структурни промени или да предизвика значително намалување на каматните стапки“, изјави Дејвид Бекворт, виш истражувач во центарот „Меркатус“ (Mercatus Center) при Универзитетот Џорџ Мејсон (George Mason University). „И навистина не мислам дека може да направи многу за само неколку месеци“.

Фед досега годинава се воздржува од намалување на каматните стапки, и покрај постепеното забавување на економијата на САД. Одлуките, делумно, се донесени поради загриженоста дека агресивните царини на Трамп би можеле повторно да ја разгорат инфлацијата. Последните податоци покажуваат дека царините имаат одредено влијание во поединечни сектори, но инфлацијата во целина останува умерена.

Во четвртокот, во изјава за телевизијата Блумберг, Миран изјави дека нема „никакви макроекономски значајни докази за ценовен притисок“ предизвикан од зголемената примена на царините од страна на Трамп врз трговските партнери на САД.

Овој став го става Миран во одреден судир со Пауел.

„Можно е инфлаторните ефекти да бидат поупорни, а тоа е ризик што мора внимателно да се процени и управува“, изјави Џером Пауел на прес-конференција одржана на 30 јули. Овие коментари дојдоа откако креаторите на монетарната политика петти пат по ред одлучија да ја задржат референтната каматна стапка на Фед непроменета.

Во четвртокот Миран го пофали гувернерот на Фед, Кристофер Валер, кога беше запрашан за потрагата на Трамп по наследник за функцијата претседател на Фед, бидејќи мандатот на Џером Пауел истекува во мај следната година.

Валер минатиот месец гласаше спротивно на одлуката на Фед да ги задржи каматните стапки непроменети, наведувајќи дека би претпочитал намалување од четвртина процентен поен. Тој изјави дека очекува евентуалното инфлаторно влијание од царините да доведе до еднократно зголемување на ценовното ниво, додека во исто време предупредува на сè поизразени знаци на слабеење на пазарот на трудот.

Членовите на Сенатот се на редовен августовски одмор и не се очекува да се вратат во Вашингтон пред почетокот на септември. Иако Миран неодамна помина низ процесот на потврда за сегашната функција, што би можело да ја забрза постапката, неговата номинација за гувернер на Фед може сепак да трае неколку недели, дури и ако републиканското раководство ѝ даде приоритет. Во март Миран беше потврден на актуелната позиција со тесно гласање, 53 „за“ и 46 „против“, строго по партиска линија.

Претседателот на Банкарскиот комитет на Сенатот (Senate Banking Committee), Тим Скот, го нарече Миран „вистински економист со искуство“ и „клучен советник на Трамп“.

„Очекувам номинацијата да ја разгледаме брзо“, наведе Скот во четвртокот во писмено соопштение.

Сенаторката Елизабет Ворен, водечката демократка во комитетот, го нарече Миран „лoјалист на Трамп и еден од главните архитекти на неговата хаотична царинска политика“.

„Ќе имам тешки прашања за него на сослушувањето за потврда, дали навистина ќе им служи на американските граѓани како независен глас во Фед или ќе му служи само на Доналд Трамп“, изјави Ворен.

Следниот состанок на Фед за монетарната политика е закажан за 16 и 17 септември.