Можни преговори за украинска територија на самитот меѓу Трамп и Путин

Генералниот секретар на НАТО, Марк Руте, изјави дека самитот меѓу САД и Русија неделава може да ја отвори вратата за преговори за украинската територија, иако претседателот Володимир Зеленски и понатаму одбива да се откаже од територија окупирана од Русија.

Намалувањето на јазот меѓу ставот на Зеленски и барањата на рускиот претседател Владимир Путин за потврдување на придобивките во источна Украина е една од најосетливите точки, во пресрет на средбата меѓу американскиот претседател Доналд Трамп и Путин во Алјаска в петок, во потрага по договор за завршување на војната.

Европските лидери, кои повеќепати изјавија дека се посветени на „територијалниот интегритет“ на Украина, се обидуваат да разговараат со Трамп пред планираниот состанок, според лица запознаени со разговорите.

Доколку мировниот процес напредува, прашањето за територијата „ќе мора да биде на маса“, заедно со безбедносни гаранции за Украина, изјави во неделата Марк Руте во емисијата „Оваа недела“ (This Week) на американската телевизија „Еј-би-си“ (ABC). Тој предложи дека тоа би можело да значи Украина да прифати дека ја има изгубено контролата врз дел од својата територија, но без формално да се откаже од суверенитетот над тие региони.

„Кога се зборува за прашањето на територијата, односно за можноста во идниот договор да се признае дека Русија де факто контролира дел од украинската територија, тоа мора да биде само фактичко признавање – а не политичко, де јуре признавање“, рече Руте.

Зеленски и европските лидери одржуваат интензивни онлајн консултации за да ја усогласат стратегијата пред самитот на Трамп и Путин, со цел да спречат исход во кој Украина би била принудена да прифати големи загуби на источната територија.

Путин бара Украина да се откаже од Крим, кој руските сили незаконски го анектираа во 2014 година, како и од целиот источен регион Донбас. Таков исход би значел Зеленски да ги повлече трупите од делови на областите Луганск и Донецк, кои сè уште се под контрола на Киев.

Еден претставник на ЕУ изјави дека САД се тесно вклучени во тековната дипломатија и покажале интерес да дејствуваат усогласено со Европа.

Американскиот потпретседател Џеј Ди Венс во претходна изјава нведе дека очекува конечниот исход да биде „многу едноставен“.

„Ако се земе предвид моменталната фронтовска линија меѓу Русија и Украина, ќе се обидеме да најдеме некакво преговарачко решение со кое и Украинците и Русите ќе можат да живеат во релативен мир, со запирање на убивањата“, изјави тој за „Фокс њуз“ (Fox News) во емисијата „Сандеј морнингс“ (Sunday Morning Futures). „Тоа нема да направи никого особено среќен.“

Министрите за надворешни работи на ЕУ в понеделник ќе одржат вонреден состанок преку видеоконференција за да ги разгледаат следните чекори во врска со Украина.

„Меѓународното право е јасно - сите привремено окупирани територии ѝ припаѓаат на Украина“, изјави шефицата за надворешна политика на Европската Унија, Каја Калас. „Одржливиот мир, исто така, значи дека агресијата не смее да биде наградена“, додаде таа.

Руте рече дека Зеленски ќе мора да биде вклучен во сите детални мировни преговори, дури и ако не присуствува на средбата во Алјаска.

„В петок ќе биде важно да се види колку е сериозен Путин“, изјави Руте за емисијата на „Си-би-ес“ (CBS’s Face the Nation). „А единствениот што може да го утврди тоа е претседателот Трамп“.

Венс за време на викендот се сретна во Англија со европски претставници и високи соработници на Зеленски.

Според условите на договорот за кој разговараат американски и руски претставници, Москва би ја запрела офанзивата во украинските региони Херсон и Запорожје по должината на моменталните фронтовски линии.

Зеленски за време на викендот изјави дека Киев нема и уставно не може да се откаже од територија, а европските претставници подоцна предупредија да не се прифаќаат територијалните придобивки на Русија од бојното поле.

„Остануваме посветени на принципот дека меѓународните граници не смеат да се менуваат со сила“, наведоа тие во заедничко соопштение во саботата. „Моменталната линија на разграничување треба да биде почетна точка за преговори“.

Изјавата беше поддржана од британскиот премиер Кир Стармер, претседателката на Европската комисија, Урсула фон дер Лајен, и лидерите на Франција, Германија, Италија, Полска и на Финска.

Зеленски предупреди да не се прифаќа руското спинување за можните исходи од преговорите, нагласувајќи дека единствено Путин е одговорен за блокирањето на завршувањето на војната.

„Неговиот единствен адут е способноста да убива, а тој се обидува да ја продаде објавата за запирање на убивањата по највисока можна цена“, наведе украинскиот лидер во пост на Х. „Важно е никој да не се остави да биде изманипулиран“.

Во моментов нема коментари за веста. Биди прв да коментира...

Остави коментар