Кина воведе санкции за две банки од ЕУ како одговор на потезите на Европа

Кина воведе санкции за две банки од ЕУ, исполнувајќи го ветувањето за одмазда по потезите на блокот насочени кон одредени кинески кредитори поради руската инвазија врз Украина.

Министерството за трговија соопшти во средата дека „Урбо банка“ (UAB Urbo Bankas) и „Мано банка“ (AB Mano Bankas) се вклучени во списокот на контрамерки. Со ова им се забранува на организации и поединци во Кина да вршат трансакции, соработка и други активности со овие институции.

Во посебно соопштение Министерството изрази надеж дека ЕУ ќе го цени односот со Кина, ќе ги исправи своите грешки и ќе престане да ги нарушува интересите на државата.

Портпаролот на Европската комисија за економска безбедност, Олоф Гил, изјави дека „откако формално ќе ги добие, ЕУ детално ќе ги проучи овие мерки, пред да одлучи за следните чекори“.

„ЕУ веќе конструктивно соработува со Кина по прашањето на санкционираните кинески субјекти“, рече Гил, додавајќи дека „е отворена за пронаоѓање заемно прифатливо решение што на крајот би можело да доведе до отстранување на банките од списокот“.

Минатиот месец Европската Унија воведе санкции за две кинески банки и пет компании со седиште во азиската држава, како дел од најновиот пакет мерки против Москва. ЕУ соопшти дека банките се ставени на списокот поради обезбедување услуги со криптовалути што го поткопувале ефектот на санкциите.

Блиските врски на Кина со Русија ги изложија нејзините банки на слични казнени мерки од САД, што ги поттикна да ги преиспитаат своите деловни активности и клиенти. Некои од државните банки на Кина уште на почетокот на минатата година ги заострија ограничувањата за финансирање руски клиенти, откако САД одобрија секундарни санкции за странски финансиски институции што ѝ помагаат на Москва во воените напори.

„Урбо банка“ и „Мано банка“ се со седиште во Литванија. Пекинг не даде причина за нивниот избор, но потегот доаѓа поради тензии со балтичката држава. Минатата година Литванија протера тројца вработени во кинеската амбасада, наведувајќи дека тие не биле акредитирани.

Пекинг претходно ги намали дипломатските односи со Литванија како одговор на нејзината одлуката да дозволи отворање претставништво на Тајван во Вилнус.

Односите меѓу Пекинг и Брисел исто така се влошени во последниве години поради поддршката од Кина на руската војна во Украина и трговските прашања. Минатиот месец Пекинг ѝ возврати на претседателката на Европската комисија, Урсула фон дер Лајен, откако таа го обвини дека ја нарушува трговијата и го ограничува пристапот на европските компании.

 

 

 

 

Во моментов нема коментари за веста. Биди прв да коментира...

Остави коментар