Европската централна банка (ЕЦБ) свика работна група предводена од некои од нејзините најмоќни гувернери, со цел поедноставување на банкарската регулатива поради растечките стравувања дека регионот заостанува.
Гувернерите на централните банки на Германија, Франција, Италија и Финска се меѓу клучните фигури во новосоздадената група. Инаку, Германија, Франција, Италија и Шпанија претходно веќе побараа од Европската комисија сеопфатна процена на банкарските правила.
Многу пари, малку готови патишта
За три и пол месеци се реализирани нешто над 10 отсто од парите предвидени за капитални инвестиции во текот на 2025 година. Според министерката за финансии, слабата реализација на инвестициите се должи на студеното време од почетокот на годината. Сепак, бројките покажуваат дека ниту затоплувањето не ја забрза динамиката. Извештаите за извршување на буџетот покажуваат дека во студениот февруари најмногу било сработено.
Меѓу проектите во кои има напредок е обновата на магистралниот пат Охрид-Св. Наум, во должина од 24,3 километри. Тој е во завршна фаза и се очекува дека до почетокот на туристичката сезона ќе биде комплетен. Значи, патувањето од Охрид до Свети Наум ќе биде лесно, проблем останува да се стигне до Охрид. Автопатот Кичево-Охрид, со должина од 57 километри, кој се гради од 2014 година, според најновиот рок, ќе биде завршен следната година.
„Јаху“ е подготвен да го купи пребарувачот „Хром“ ако „Гугл“ биде принуден да го продаде
Интернет-компанијата „Јаху“ (Yahoo), поддржана од матичната компанија „Аполо глобал менаџмент“ (Apollo Global Management), изрази намера да го купи веб-пребарувачот „Хром“ (Chrome) доколку федералниот суд му наложи на „Гугл“ (Google) да го продаде - како мерка за ставање крај на нелегалниот монопол, изјави висок извршен директор на компанијата.
Се проценува дека цената на пребарувачот може да достигне десетици милијарди долари. Инаку, „Јаху“ беше доминантен пребарувач на почетокот на милениумот, пред „Гугл“ да го преземе тронот.
Даночни олеснувања за странските туристи во Кина за да се зголеми потрошувачката
Кина соопшти дека ќе го намали прагот за поврат на данок за странците што ја посетуваат земјата, во обид да се зголеми потрошувачката, додека Пекинг се обидува да компензира дел од штетата од трговската војна.
Туристите што потрошиле најмалку 200 јуани (27 долари) истиот ден во истата продавница ќе имаат право на поврат. Претходно минималниот износ за поврат на данокот беше 500 јуани (речиси 69 долари). Максималниот износ на можноста за поврат на данок ќе се зголеми на 20.000 јуани (2.744 долари).
„Шејн“ ги поскапе производите за американските купувачи - некои дури за 377 отсто
Кинескиот онлајн гигант „Шејн“ (Shein Group Ltd.) ги зголеми цените на своите производи на американскиот пазар - од фустани до кујнски прибор - во пресрет на претстојните царини што ќе ги опфатат и малите пратки, кои досега беа ослободени од таа давачка. Тоа е ран знак за потенцијалното влијание на трговската војна врз американските потрошувачи.
Просечниот ценовен скок на производите за домот, кујната и играчките е над 30 проценти, предводен од огромното зголемување на дел од цените. Женската облека во просек поскапе за осум проценти.
Врската меѓу спортот и приватниот капитал станува сè поцврста
Спортот и приватниот капитал во секој нареден ден стануваат сè поиспреплетени. Продажбата на Бостон Селтикс (Boston Celtics) кон крајот на март за 6,1 милијарди долари на Бил Чисхолм, партнер и коосновач на „СТГ партнерс“ (STG Partners LLC), е најновиот доказ за тоа.
Фирмите за приватен капитал стануваат сè попопуларни партнери на спортските клубови бидејќи помагаат големите проекти да се завршат побрзо.
.webp){kind=icon}
