Многу пари, малку готови патишта

За три и пол месеци се реализирани нешто над 10 отсто од парите предвидени за капитални инвестиции во текот на 2025 година. Според министерката за финансии, слабата реализација на инвестициите се должи на студеното време од почетокот на годината. Сепак, бројките покажуваат дека ниту затоплувањето не ја забрза динамиката. Извештаите за извршување на буџетот покажуваат дека во студениот февруари најмногу било сработено.

Меѓу проектите во кои има напредок е обновата на магистралниот пат Охрид-Св. Наум, во должина од 24,3 километри. Тој е во завршна фаза и се очекува дека до почетокот на туристичката сезона ќе биде комплетен.

Значи, патувањето од Охрид до Свети Наум ќе биде лесно, проблем останува да се стигне до Охрид. Автопатот Кичево-Охрид, со должина од 57 километри, кој се гради од 2014 година, според најновиот рок, ќе биде завршен следната година.

Она што може да го очекуваат туристите летово е нов асфалт на потегот од Врбјани до Охрид (40 километри), но со исклучок кај Ботун и Требениште, велат за „Блумберг Адрија“ од Јавното претпријатие за државни патишта (ЈПДП). Годинава овој проект ќе голтне нови 73 милиони евра.

Најмногу се чека од „Бехтел и Енка“

Според годишната програма на ЈПДП, годинава за инвестиции, отплата на кредити и трошоци се предвидени половина милијарда евра. Најголема ставка се инвестициите, кои изнесуваат 23, 6 милијарди денари или близу 385 милиони евра.

Најмногу пари ќе завршат кај „Бехтел и Енка“ – околу 150 милиони евра. Коридорите 8 и 10д, на кои веќе две години работи американско-турскиот конзорциум, се врвен инфраструктурен приоритет на Владата. Колку до крајот на годината ќе биде во функција, во одговорите што ги добивме од ЈПДП не пишува.

„За годинава е планирано да се работи комплетно на целата траса Тетово-Гостивар во должина од 17 километри. На автопатската делница Гостивар-Букојчани се планирани активности на приближно 17 километри и на Прилеп-Битола се планирани активности на околу 25 километри“, се наведува во одговорот.

За овие делници се работи на подготовка на проектна документација и на други градежни активности односно „ископи за обезбедување сервисен пристапен пат, се вршат земјени работи на делот на главната траса, во тек се градежни работи на мостови (армирање и бетонирање), се работи на изведба на база за префабрикувани и бетонски елементи за вградување во мостовите и изведба на асфалтна база, се вршат градежни работи на надвозници, подвозници, пропусти, за заштита на косини и слично“, наведуваат од ЈПДП.

Дали новиот модел на градење ќе донесе побрзи резултати?

Минатата власт, во чие време почнаа работите на „Бехтел и Енка“, најави нов модел на изградба на автопатиштата за да се скрати времето на реализација. Наместо стариот начин, кој предвидуваше целосно готов проект, па градба, странската компанија паралелно проектира и гради.

Стариот начин, според статистичките податоци, дозволуваше годишно да се градат 5,8 километри автопат, со новиот модел проекциите беа дека земјава може да добива 20 километри автопатишта годишно.

Пат преку Плетвар до летово

Од ЈПДП се оптимисти дека летово побрзо и полесно ќе се вози и преку Плетвар. Во јануари беше пуштена првата делница и од овој децениски проект, од Градско до Дреново. Според планот на јавното претпријатие, до јуни ќе биде готова и втората делница, преку клисурите, која е всушност најпроблематична во овој дел на земјата.

„Продолжува и изградбата на експресниот пат Градско-Дреново, поточно на втората делница од Фаришка до Дреновска Клисура, во должина од 10,2 км, и во моментов се работи на заштита на косини од ерозија, како и заштита на опасни карпи на дел од патот, кои влијаат на безбедноста, а процентот на реализација на изведбата е 96 отсто. Предвидениот рок за изградба е почетокот на јуни 2025 година“, велат од ЈПДП.

Паралелно, надвор од проектот на „Бехтел и Енка“ ќе почнат работите на автопатската делница Кичево-Букојчани со должина од 12 километри, за што е обезбеден заем од ЕБОР.

ЈПДП, како што велат оттаму, паралелно работи и на поправка и обнова на постојните патишта. Меѓу нив е и автопатот Скопје-Тетово, и тоа на двата коловоза во должина од 17,7 километри.

Ако бидат обезбедени средства, освен патиштата предвидени со програмата, ЈПДП ќе почне со обнова на двата коловоза од автопатот од Хиподром и Петровец до Миладиновци, околните патишта кон Крушево и Демир Хисар, а можна е изградба на обиколница на Битола, Кавадарци и Ресен.

Во моментов нема коментари за веста. Биди прв да коментира...

Остави коментар