Пат околу Македонија за осум дена од 1.730 долари

Автентично осумдневно патување низ Македонија нуди „Чуз Балканс“ (Choose Balkans), еден од водечките туроператори за дојдовен туризам во регионот Адрија.

На потенцијалните странски гости Македонија им се нуди како земја со прекрасни национални паркови и места со богато културно наследство.

„Посетете го главниот град, восхитувајте им се на впечатливите манастири и цркви, напијте се од вкусните вина, прошетајте по старите чаршии, уживајте во убавините на Охрид и на Охридско Езеро заштитени од УНЕСКО“, пишува во промотивниот текст.

Аранжманот за група од десетмина чини 1.730 долари по лице. Организаторот нуди и приватна тура за самци доколку сте подготвени да платите 4.260 долари. Во овие цени се пресметани комплетниот транспорт, сите ноќевања со појадок и туристичките такси, како и влезниците за културно-историските знаменитости, за кои е обезбеден професионален водич.

За ова содржински богато патување, кое почнува и завршува во Скопје, повремено се достапни специјални понуди со кои може да заштедите и до 350 долари. Таков попуст се нуди и во моментов на „Трип-адвајзер“.

Првиот ден е резервиран за кањонот Матка. Предвидена е посета на Врело, една од најдлабоките подводни пештери, која платформата „Њу 7 вондерс“ (New7Wonders) ја вброи во топ 77 најдобри природни локалитети во светот. До неа се стигнува со организиран превоз со чамец, кој тргнува од пред платото на манастирот „Свети Андреја“.

Патувањето продолжува во Велес. Во програмата е опишан како град фокусиран на производство на порцелан и свила, но и како град што во 2016 година стана глобална атракција по тврдењата дека локални тинејџери клучно влијаеле на тогашните претседателски избори во САД преку креирање лажни вести.

По посетата на родното место на основоположникот на современата македонска книжевност Кочо Рацин, Саат-кулата во централното градско подрачје изградена во првата половина на 18 век и импозантниот споменик посветен на гемиџиите, гостите се носат на дегустација во позната винарница.

Античкиот локалитет Хераклеја Линкестис во Битола е следен на листата. Просторот од времето на Филип Втори во понудата на „Чуз Балканс“ е претставен како најдобро зачуван град од античкото македонско царство.

Обиколката продолжува до манастирскиот комплекс „Свети Наум“, во близината на албанската граница, една од најдобро рангираните македонски локации на „Трип-адвајзер“. Од Битола кон Охрид се вози низ националниот парк Галичица, со пауза крај Преспанско Езеро.

Depositphotos

Следен за истражување е Музејот на вода во Заливот на коските. Станува збор за реплика на праисториска наколна населба со 24 куќички од кал и гранки, поставени на дрвена платформа изградена на дрвени колци што излегуваат од езерото.

Во аранжманот е вклучена посета и на три верски објекти - црквите „Св. Јован Канео“ и „Св. Никола“ и османлиското теќе со џамија „Зејнел Абедин-паша“, кое е прогласено за културно наследство.

Турнејата продолжува на надморска височина од 760 метри во живописното планинско село Јанче. Ова автентично место со традиционална македонска архитектура е сместено на југозападната падина на планината Бистра и е една од најстарите населби во Мијачкиот Регион.

Крајна дестинација за овој ден е најголемиот македонски национален парк, еднакво атрактивен за туристи и во летниот период. Маврово има 30 пештери, а овде се наоѓа и најниското глацијално езеро во Македонија.

Depositphotos

Како особено интересна знаменитост, туроператорот ја издвојува тетовската Шарена џамија, единствена во светот по надворешната декорација и орнаментите во ентериерот. Според некои истражувачи, овој религиозен објект сместен во антологиите на исламската архитектура датира од 1495 година, а според други подигнат е во 1564 година.

Помеѓу Тетово и Скопје, кои редовно се на листата со најзагадени градови во светот, на гостите им се нуди уште малку чист планински воздух во близината на селото Лешок, каде што се наоѓа прочуениот Лешочки манастир. Во комплексот се наоѓаат црквите „Св. Атанасиј“ и „Св. Богородица“, како и гробот и спомен-собата на Кирил Пејчиновиќ, еден од најпознатите македонски преродбеници од 19 век.

Патувањето завршува со двочасовна прошетка низ метрополата од двете страни на реката Вардар. Како најзначајна знаменитост е наведен Камениот мост, симболот на градот кој ги поврзува главниот плоштад и Старата скопска чаршија.