Петчасовни преговори во Кремљ, но крајот на војната во Украина и натаму е далеку

Кремљ соопшти дека Владимир Путин имал „многу корисни“ разговори со американските претставници Стив Виткоф и Џаред Кушнер, иако страните не успеале да постигнат договор за завршување на војната во Украина.

Преговорите, кои траеле речиси пет часа, биле „конструктивни и многу информативни“, иако „сè уште не е постигнат компромис“ во однос на клучното прашање за територијалната контрола, рече за новинарите во Москва советникот на Кремљ за надворешна политика Јури Ушаков.

„Некои американски предлози изгледаат повеќе или помалку прифатливо, но треба да се разгледаат. Некои од предложените изрази не се прифатливи, така што работата ќе продолжи“, додаде тој. Можна средба на Путин со американскиот претседател Доналд Трамп „зависи од напредокот што ќе биде постигнат“, рече Ушаков. Русија примила четири документи од САД, покрај оригиналниот мировен предлог, а двете страни изразиле подготвеност да продолжат со работата, рече тој. „Има уште многу работа и во Москва и во Вашингтон“, додаде Ушаков.

Виткоф по разговорите го напуштил Кремљ и заминал во американската амбасада во Москва, извести државната новинска агенција „РИА Новости“. Претставникот на Кремљ, Кирил Дмитриев, кој учествуваше на состанокот, ги нарече разговорите продуктивни во објава на социјалните мрежи.

Средбата на Путин со Виткоф и Кушнер, зетот на Трамп, следува по преговорите меѓу американски и украински официјални лица на Флорида во врска со предлозите чија цел е постигнување договор за завршување на руската инвазија, која трае речиси четири години. Украинскиот претседател Володимир Зеленски се сретна со својот преговарачки тим во Ирска претходно во вторникот за да добие „детален извештај“ за разговорите на Флорида. Пред средбата во Кремљ, Путин се закани со удари врз бродовите на земјите што ја поддржуваат Украина доколку нападите врз московската флота танкери не престанат.

„Она што го прават сега украинските вооружени сили е пиратерија“, рече тој пред новинарите. Зеленски изјави дека чека резултати од средбата во Москва. „Подготвен сум да ги примам сите сигнали, подготвен сум да се сретнам со претседателот Трамп – сѐ зависи од денешните разговори“, рече тој за новинарите во Даблин. „Дијалогот може да продолжи, но потребни се резултати“.

Среде стравувањата во Европа дека американскиот план може да ја награди руската агресија, принудувајќи го Киев да постигне договор, Зеленски за време на посетата на Париз во понеделникот изјави дека последната верзија „изгледа подобро“.

Путин претходно во вторникот ги обвини европските лидери дека ја саботираат мировната иницијатива со „неприфатливи“ измени на предлогот.

Виткоф, кој годинава по шести пат се сретна со Путин во Русија, го промовира оригиналниот план од 28 точки, кој беше составен минатиот месец во соработка со Дмитриев. Тие предлози ги вознемирија официјалните лица во Украина и во Европа, бидејќи содржеа руски барања за отстапки што Киев неколкупати ги одби. Телефонски разговор од 14 октомври меѓу Виткоф и Ушаков покажа дека американскиот претставник предложил заедничка работа на планот за завршување на војната во Украина, сличен на мировниот план на Трамп за Газа, според транскрипт на разговорот што го прегледал и транскрибирал „Блумберг“. Ушаков и Дмитриев исто така разговарале за планот на 29 октомври. Зеленски им рече на новинарите дека Виткоф „е повеќе од добредојден во Украина“, но не е сигурен дали американската делегација „деновиве може да дојде и дали се подготвени да дојдат“.

Трамп повика Русија и Украина да ги прекинат борбите по должината постојните фронтови во рамките на мировната иницијатива. По средбата со Путин во Алјаска во август, Трамп во октомври се откажа од плановите за втор самит во Будимпешта откако САД заклучија дека Москва не е подготвена за суштински промени на своите максималистички барања за завршување на војната.

Зеленски повеќепати изјави дека ќе прифати примирје.