ЕЦБ ќе ја поедноставува банкарската регулатива?

Европската централна банка (ЕЦБ) свика работна група предводена од некои од нејзините најмоќни гувернери, со цел поедноставување на банкарската регулатива поради растечките стравувања дека регионот заостанува.

Гувернерите на централните банки на Германија, Франција и Италија се меѓу клучните фигури во новосоздадената група, како и гувернерот на Банката на Финска, кој е и прв потпретседател на Европскиот одбор за системски ризици, според луѓе запознаени со ова прашање кои побараа да не бидат идентификувани бидејќи информациите се приватни.

Ова прашање веројатно ќе предизвика внатрешни тензии со надзорниот орган на ЕЦБ, кој е предводен од посебна група службеници кои ја сметаат банкарската регулатива за своја територија и се цврсти бранители на високите регулаторни стандарди на Европа против бранот на глобално повлекување предизвикан од администрацијата на Трамп, рекоа двајца од луѓето.

ЕЦБ одби да коментира, како и претставниците на германската Бундесбанка, Банката на Франција, Банката на Италија и Банката на Финска.

Формирањето на работната група следи по контроверзното писмо од гувернерите на централните банки на Германија, Франција, Италија и Шпанија до Европската комисија годинава, во кое директно се залагаат за „сеопфатна проценка“ на банкарските правила на Европа за да се обезбедат „еднакви услови“ со другите големи регулатори. Лобито на европскиот банкарски сектор, чии профитабилност и вреднување долго време заостануваа зад американските конкуренти, упати слични повици.

Апелот на четворката ги вознемири некои колеги од Управниот совет кои се спротивставија и побараа од Комисијата да интервенира. Еден функционер изјави за „Блумберг“ дека е загрижен дека поедноставувањето кон коешто се стремат гувернерите може да биде злоупотребено од политичари кои сакаат да ги дерегулираат банките со цел да го поттикнат растот на Европа.

Надлежноста и временската рамка на работната група се нејасни. Работата би можела да се фокусира на извештаите што банките треба да ги дадат за нивното работење или гувернерите би можеле да имаат пошироки задачи од само надзорната надлежност на ЕЦБ, фокусирајќи се на тоа како европските банкарски правила се пренесуваат во масата правила што кредиторите мора да ги почитуваат и пошироката регулаторна рамка, според некои од луѓето кои се извор на овие информации.

ЕЦБ веќе започна да поедноставува некои од своите процеси, вклучително и одобрувања на модели на банкарски капитал, додека Европското банкарско тело, кое ги претвора регулативите во секојдневни стандарди, исто така, тврди дека е постигнат „значаен напредок“ во поедноставувањето на стандардите. И ЕУ ја забрза планираната ревизија на својата банкарска рамка, намалувајќи го рокот од 2028 на 2026 година.

Сепак, други јурисдикции се движеа многу побрзо. Американското Биро за финансиска заштита на потрошувачите на САД се обврза да ги преполови своите надзорни интервенции, додека други агенции веќе ги олеснија некои од правилата и ветија дека ќе одат уште понатаму во тој процес.

Во Велика Британија регулаторите годинава објавија повеќе од десетина промени во правилата што се пријателски настроени кон индустријата, вклучително и намалување на дури 70 проценти на бирократијата поврзана со капиталните барања, како и поретки стрес тестови.