ЕЦБ ги намали стапките на 2,25 отсто во светло на трговската војна со Трамп

Трошоците за задолжување низ 20-члената еврозона денеска паднаа по третпат годинава, откако Европската централна банка (ЕЦБ) ја намали својата главна каматна стапка на 2,25 отсто како одговор на забавувањето на растот и царините на Доналд Трамп.

Денешното намалување, кое ги донесе трошоците за позајмување во валутниот блок на најниско ниво во повеќе од две години, беше широко очекувано по најавата на Трамп за сеопфатни царини на повеќето трговски партнери на САД на 2 април.

„Перспективите за раст се влошија поради растечките трговски тензии“, посочи ЕЦБ во коментарите што ја придружуваа одлуката за каматната стапка. Во нив се додава дека „негативниот и нестабилен одговор на пазарот на трговските тензии веројатно ќе има затегнувачки ефект врз условите за финансирање“.

Пред одлуката, Трамп го спореди рекордот на намалување на каматните стапки на ЕЦБ со Федералните резерви на САД, кои ги задржаа стапките на исто ниво на последниот состанок во март.

Трамп рече дека претседателот на Фед, Џером Пауел, кој во средата предупреди за влијанието на царините врз растот и инфлацијата во САД, „секогаш ПРЕМНОГУ ДОЦНИ И ГРЕШИ“ и дека неговото „заминување не може да дојде доволно брзо!“

Кратењето на ЕЦБ е седмо откако централната банка започна да ја намалува депозитната стапка минатиот јуни.

Трговците очекуваат најмалку две дополнителни намалувања од четвртина поен до крајот на годинава, според нивото имплицирано од пазарите на свопови по одлуката.

Еврото малку се промени на 1,135 долар веднаш по намалувањето.

Трамп направи делумен пресврт минатата недела, одложувајќи ги неговите „реципрочни царини“ од 20 проценти на стоките од ЕУ за 90 дена, период во кој ќе се применува стапка од 10 проценти. Но врвните централни банкари велат дека неговите протекционистички политики ќе предизвикаат негативен економски шок за еврозоната.

ЕЦБ веќе се соочува со побавен раст. Во март централната банка ја намали прогнозата за раст за еврозоната за 2025 година на 0,9 проценти - шесто последователно намалување.

Инфлацијата минатиот месец се намали на 2,2 процента - малку над целта од 2 процента на ЕЦБ - бидејќи цените на услугите пораснаа со најбавна стапка во речиси три години.

Економистите велат дека инфлацијата може дополнително да се намали поради падот на цената на нафтата месецов, неодамнешното зголемување на еврото во однос на доларот и потенцијалниот пораст на кинескиот увоз во еврозоната. Сите три параметри се широко следени како последици од трговската политика на Трамп.

Но зголемувањето на трошењето финансирано со долг во Германија и на други места во еврозоната може да претставува инфлаторен притисок.

Во моментов нема коментари за веста. Биди прв да коментира...

Остави коментар