ЕЦБ повторно ќе ги намали каматите бидејќи царините се закана за растот

Европската централна банка (ЕЦБ) е на пат да ги намали каматните стапки по седми пат, потег што доаѓа откако царините што ги воведе американскиот претседател Доналд Трамп ги потресоа пазарите и ја затемнија економската перспектива.

Депозитната стапка денеска ќе биде намалена на 2,25 од 2,5 проценти, според речиси едногласното истражување на аналитичарите на „Блумберг“. Само еден од 62 испитаника предвидува пауза, а друг смета дека ќе се случи потег на зголемување.

Bloomberg Mercury

 

Обелоденувањето на огромните трговски давачки во САД ги отфрли приказните дека овонеделниот состанок на ЕЦБ може да донесе пауза во кампањата за монетарно олеснување што започна минатиот јуни. Очекувањата се дека мерките ќе спречат економската експанзија, но нема да поттикнат инфлација, со што пазарите ќе бидат сосема сигурни дека трошоците за задолжување повторно ќе се намалат.

Освен денеска, инвеститорите предвидуваат до крајот на годината да се случат најмалку уште два потега на намалување на каматите бидејќи посилното евро помага да се ограничат ценовните притисоци и се зголемува опасноста дека евтините кинески стоки ќе бидат пренасочени кон Европа.

Кристин Лагард, претседателка на ЕЦБ Bloomberg Mercury

 

Бидејќи трговските преговори сè уште се во тек, претседателката Кристин Лагард веројатно нема да понуди јасни индикации за тоа каде ќе одат стапките понатаму. 

Каматни стапки

Официјалните лица ги задржаа своите опции отворени по намалувањето на стапката во март, бидејќи плановите за поголема јавна потрошувачка во Германија и другите земји ги поддржуваат повиците за претпазливост. Извештајот од тој состанок откри дека засега се размислува за намалување или пауза.

„Денот на ослободувањето“ на Трамп, сепак, ја промени перспективата, што доведе до посилна поддршка за дополнително олабавување од страна на гувернерот на Банката на Франција, Франсоа Вилерој де Галхау, Финецот Оли Рен и Литванецот Гедиминас Симкус.

Сепак, една помала група гувернери повикуваат на претпазливост. Австриецот Роберт Холцман рече дека не гледа основа за намалување, притоа напоменувајќи дека „секогаш е отворен за добри аргументи“.

Додека два отсто и натаму останува најверојатното ниво за смирување на депозитната стапка, нестабилната заднина создава различни гледишта на оваа тема. Најновото истражување на „Блумберг“ дава опсег од 1,25 до 2,25 проценти, при што повеќе од една петтина од економистите предвидуваат дури и прво зголемување на каматите пред 2026 година.

Возбудата околу најавените трошоци во висина од стотици милијарди евра на германската инфраструктура, заедно со пошироката европска желба за поголемо вооружување, ќе ја оживее економијата на континентот, која е засенета од мракот дека царините ќе уништат голем дел од годинашните надежи за раст.

Bloomberg Mercury

 

Шефот на холандската централна банка Клас Нот ја истакна сложеноста на ситуацијата, велејќи дека влијанието може да се разликува со текот на времето и дека ЕЦБ ќе мора да биде „навистина внимателна“.

Што се однесува до фискалните планови на Германија, клучното прашање е колку брзо може да се потрошат парите и како ќе влијае тоа на инфлацијата. Група водечки германски економисти штотуку ја намалија својата прогноза за годинава, а позитивните ефекти од растот се очекуваат само во 2026 година.

Што велат економистите на „Блумберг“?

„ЕЦБ се соочува со свет што е значително различен од последниот пат кога надлежните се состанаа, бидејќи американските царини сега стануваат реалност, а монетарната политика за еврозоната ќе мора да се приспособи. Очекуваме Управниот совет повторно да ги намали стапките за 25 базични поени, пред друго дополнително олеснување подоцна во годината“, вели Дејвид Пауел, висок економист од еврозоната.

Што се однесува до царините, некои случувања по објавата на царините од страна на Трамп укажуваат на поголеми надолни ризици за инфлација. Еврото поскапе во однос на доларот и одговорот на Европската комисија не резултира со никакви контрадавачки што би го поскапеле увозот.

„Рестриктивна“ политика

Едно од прашањата што ги мачат официјалните лица е дали нивниот политички став продолжува да ја ограничува економската активност.

Минатиот месец видовме дека тие го изменија наративот во нивните изјави по состанокот за да објават дека стапките станаа „значително помалку рестриктивни“. Тоа ја остави вратата отворена за повеќе олеснување.

 

Во моментов нема коментари за веста. Биди прв да коментира...

Остави коментар