Трамп смета дека Фед треба да ги намали каматите додека расте притисокот од царините

Претседателот Доналд Трамп рече дека Федералните резерви (Фед) треба да ги намалат каматните стапки, разидувајќи се на тој начин во ставовите со американската централна банка додека официјалните лица ја одмеруваат економската цена на неговите царини.

„МНОГУ ќе биде подобро Фед да ги НАМАЛИ СТАПКИТЕ бидејќи американските царини почнуваат да го трасираат (олеснуваат!) нивниот пат во економијата“, наведе Трамп во објава на Трут сошал (Truth Social). „Направете ја вистинската работа. Втори април е Денот на ослободувањето во Америка!!!“, напиша Трамп.

Неговата синоќешна објава доаѓа во момент кога неговата администрација се подготвува да открие нов бран царини, за кои претседателот на Федералните резерви, Џером Пауел, сигнализира дека натежнуваат над прогнозите.

Претставниците на Фед на вчерашниот состанок одлучија да ја задржат својата референтна каматна стапка непроменета (втор состанок по ред), како и што очекуваа економистите. Пауел ја минимизира загриженоста за забавување, но призна дека царинската несигурност е фактор што веќе придонесува за инфлација на стоките, ама би можело да се покаже како минлив.

Администрацијата на Трамп се подготвува да објави нов бран царини, кои ќе стапат во сила на 2 април, иако точниот опсег не е јасен. Трамп вети таканаречени „реципрочни“ царини барем за некои нации, иако неговата администрација не прецизира кои и со колкава стапка, а неговите клучни економски советници имаат спротивставени ставови околу најдобриот начин за пристап на царинската политика.

Јавниот притисок на каматните стапки доаѓа додека Белата куќа на Трамп се обидува да ги аргументира построгите царини во услови на мешана економска слика во САД. Инфлацијата не се намали толку колку што би сакале американските потрошувачи. Високите каматни стапки го притискаат пазарот на домување, а економистите сега гледаат забавување на економскиот раст во наредните месеци.

Трамп постојано испраќа мешани пораки до Фед, на моменти повикувајќи на кратења, а инаку одбива да интервенира. Слично на тоа, за време на кампањата тој се двоумеше за тоа колку Фед би требало да биде независен од Белата куќа.

Трамп рече дека има намера да му дозволи на Пауел, кого го назначи на функцијата во 2018 година, да го одработи остатокот од неговиот мандат. Сепак, тој исто така оцени дека одлуката на Пауел да ги намали каматните стапки пред претседателските избори во ноември била политички мотивирана и со намера да ја зајакне позицијата на демократите.

Трамп на крајот победи на изборите и во минатото размислуваше за обидот да изврши поголемо влијание врз централната банка, која традиционално ја одржува независноста од Белата куќа. Тој рече дека претседателот треба да може да има шанса да одлучува за каматните стапки.

„Мислам дека не треба да ми се дозволи да наредувам, но сметам дека имам право да коментирам дали каматните стапки треба да се зголемат или намалат“, рече Трамп во интервју за „Блумберг њуз“ (Bloomberg News) во Економскиот клуб во Чикаго во октомври.

Меѓутоа, многу од неговите главни економски советници тврдат дека Фед мора да остане независен за да ја зачува вербата на луѓето во американскиот економски систем и пазарите.

Претходно вчера националниот економски советник на Трамп, Кевин Хасет, истакна пред новинарите дека претседателот и претставниците на Белата куќа „многу ја почитуваат независноста на Фед“.

И покрај тоа, тој јасно им кажа на новинарите дека има различна прогноза за раст од таа на Фед, велејќи дека очекува стапка на раст од 2,5 проценти. Претставниците на Фед сега предвидуваат економски раст од 1,7 отсто.

 

-Текстот е напишан со помош од Џордан Фабијан, Џенифер Адлој и Ненси Кук.