Преглед на пазарите на обврзници: Дали царините на Трамп се закана за рецесија?

Трговците со обврзници сигнализираат на сė поголем ризик во однос на тоа дека американската економија ќе застане бидејќи хаотичното воведување царини од страна на претседателот Доналд Трамп и намалувањата на работната сила претставуваат закана за дополнително ограничување на темпото на раст.

Шпекулациите дека Трамп ќе поттикне експанзија на земјата и ќе го задржи нагорниот притисок врз приносите на трезорските обврзници брзо се отфрлаат настрана, и тоа на помалку од два месеца од неговиот претседателски мандат. Наместо тоа, трговците се насочуваат на краткорочните благајнички записи, повлекувајќи го со тоа двегодишниот принос нагло надолу од средината на февруари, а главно поради очекувањата дека Федералните резерви (Фед) ќе продолжат со намалување на каматните стапки уште во јуни за да спречат влошување на економијата.

„Пред само неколку недели добивавме прашања за тоа дали мислиме дека американската економија повторно забрзува - и сега одеднаш постојано се споменува зборот што почнува на р“, рече Генадиј Голдберг, раководител на американската стратегија за каматни стапки во „Ти-ди секјуритис“ (TD Securities), мислејќи на ризикот од рецесија. „Пазарот од силен раст премина во апсолутен очај“, додаде тој.

Ова движење означува неочекуван пресврт за пазарите на државни обврзници, каде што доминантен двигател во последните неколку години беше изненадувачката издржливост на американската економија, дури и кога растот во странство беше ослабен. Инвеститорите првично се обложуваа дека исходот од претседателските избори само ќе го преувеличи тој тренд и ќе ги доведе приносите на значително повисоко ниво кон крајот на минатата година поради очекувањата за побрз раст и инфлација, што е столб на таканаречената Трампова трговија.

Меѓутоа, од средината на февруари приносите на државните обврзници паднаа бидејќи политиките на новата администрација носат значителна несигурност во прогнозите. Падот е предводен од хартии од вредност со пократок рок, што ја заострува кривата на принос, како што обично се случува кога инвеститорите сметаат дека Фед ќе почне да ја олеснува монетарната политика за да го забрза растот.

Bloomberg Mercury

 

Клучен двигател беше трговската војна на Трамп, која најверојатно ќе донесе нов инфлациски шок и ќе ги потресе глобалните синџири на снабдување. Тоа поттикна распродажба на берзата минатата недела, која продолжи дури и откако тој повторно го одложи зголемувањето на царините за Мексико и за Канада. Напорите на администрацијата да го спречи федералното финансирање и да отпушти десетици илјади државни службеници исто така земаат данок.
„Ризикот од рецесија е дефинитивно поголем поради редоследот на политиките на Трамп - прво царините, подоцна даночните намалувања“, рече Трејси Чен, менаџерка на портфолио во „Брендивајн глобал инвестмент менаџмент“ (Brandywine Global Investment Management).

Трамп во неделата рече дека американската економија се соочува со „период на транзиција“, отфрлајќи ја загриженоста од ризикот од забавување. Државните обврзници зајакнаа во рамките на азиското тргување денеска, при што референтниот принос за 10-годишните обврзници падна за три базични поени, на 4,27 проценти.

Промената на пазарното расположение минатата недела ја нагласи разликата меѓу пазарите на обврзници во Европа и во САД, кои имаат тенденција да се движат координирано. Сепак, кога приносите на германските обврзници се зголемија поради можноста за зголемување на трошоците за одбрана за да се надомести повлекувањето на поддршката за Украина од страна на САД, државните благајнички едвај се поместија.

Во петокот претседателот на Фед, Џером Пауел, рече дека не брза да ја продолжи политиката на олабавување, велејќи дека „економијата и натаму е во добра положба и покрај покачените нивоа на несигурност“.

Освен тоа, инфлацијата може да го задржи нагорниот притисок врз приносите, при што извештајот за индексот на потрошувачки цени неделава се очекува да покаже годишен пораст од 2,9 проценти во февруари, што и натаму е тврдоглаво над целта на Фед од два отсто.

Но знаците дека економијата се лади постојано се трупаат, вклучувајќи го и мерачот на Фед Атланта, кој сигнализира дека бруто-домашниот производ (БДП) на САД ќе се намали во првиот квартал.

Иако Министерството за труд објави дека во февруари продолжил растот на работните места, неговиот извештај од петокот обезбеди и докази дека пазарот на труд омекнува, со повеќе луѓе што долго се без работа, помалку работници на платните списоци на федералната влада и скок на тие што работат со скратено работно време од економски причини.

Што велат економистите на Блумберг?

„Деталите од извештајот за работните места беа многу полоши од насловите, а се чини дека тие аспекти на извештајот се насочени кон иднината за да му помогнат на Министерството за финансии да продолжи со исто темпо. Податоците поддржуваат порано намалување на каматните стапки од страна на Фед поради зголемени стравувањата од рецесија на пазарите и на тој начин треба да помогнат да се продолжи неодамнешниот тренд на пораст на обврзниците и пад на цените на акциите на американските финансиски пазари“, смета Едвард Харисон, стратег на „Блумберг“ (Bloomberg MLIV).

Насоката на пазарот на обврзници во голема мера ќе зависи од тоа како ќе се обликуваат политиките на Трамп во следните неколку месеци. Министерот за финансии Скот Бесент во петокот призна дека економијата може да доживее нарушувања поради политиките на администрацијата, но изрази уверување во долгорочните изгледи.

Се чини дека Трамп во четвртокот одговори на некои од грижите за владиното агресивно намалување на трошоците со тоа што им наложи на секретарите на кабинетот да користат скалпел наместо секира кога станува збор за намалувањата на работните места. Додека берзата паѓаше, тој по вторпат го одложи зголемувањето на царините за Мексико и Канада за еден месец, иако веќе ги зголеми за Кина и планира уште такви потези против други земји.

„Пред оваа царинска војна, пазарот мислеше дека царините се инфлаторни, а сега луѓето мислат дека се рецесиски. Значи, ова е одлична промена“, рече Чен од „Брендивајн“.

 

Во моментов нема коментари за веста. Биди прв да коментира...

Остави коментар