Трамп не сака да каже дали Америка ќе падне во рецесија

Претседателот Доналд Трамп изјави дека американската економија се соочува со „период на транзиција“, одбивајќи да ја разгледа загриженоста за ризиците од забавување, додека неговиот фокус на царините и федералните кратења на работните места предизвикуваат пазарни турбуленции.

На прашањето на „Фокс њуз“ (Fox News' Sunday Morning Futures) дали очекува рецесија годинава, Трамп рече: „Мразам да предвидувам такви работи. Има период на транзиција, бидејќи она што го правиме е многу големо“.

Иако одби конкретно да одговори на прашањето, одговорот на Трамп генерално се совпаѓа со неговиот говор пред Конгресот минатата недела и со низа неодамнешни коментари од врвни владини претставници, вклучувајќи го и секретарот за финансии Скот Бесент. Во срцевината на аргументот на тимот на Трамп е перспективата за даночни кратења и приходи од царини во иднина, кои претставниците тврдат дека ќе ја поттикнат економијата.

Политиките на Трамп за царини, кои се менуваат од ден на ден, ги вознемирија инвеститорите, предизвикувајќи распродажба на технолошки акции и нивоа на нестабилност што не се видени со години. Бесент во петокот на „Си-ен-би-си“ (CNBC) изјави дека за американската економија треба „детокс“ за да се ослободи од зависноста од јавната потрошувачка, а трговците со обврзници сигнализираат зголемен ризик дека американската економија ќе има застој.

Трамп го постави тонот на 4 март во својот говор пред заедничката сесија на Конгресот, признавајќи дека може да има „период на приспособување“ додека тарифите стапуваат во сила. „Ќе има мало нарушување, но нам си е во ред тоа“, рече тој во својот говор. „Нема да биде големо“.

Минатата недела донесе најдлабок пад на берзата откога Трамп беше реизбран пред четири месеци.

Трамп ја отфрли идејата на 6 март дека неговото најново повлекување на царините против Мексико и Канада имало некакво влијание врз инвеститорите, велејќи „јас дури и не гледам на берзата“ и обвинувајќи ги „глобалистите, кои гледаат колку ќе биде богата нашата земја и не им се допаѓа тоа“.

Американскиот берзански пазар падна за повеќе од 6 отсто од врвот на 19 февруари. Инвеститорите се соочија со седум последователни дена во кои индексот S&P 500 се движеше најмалку еден отсто за време на тргувањето, а технолошките акции како „Енвидија“ (Nvidia Corp.) и „Тесла“ (Tesla Inc.), кои го водеа пазарот нагоре во последните три месеци, претрпеа големи загуби.

Во интервјуто за СМФ (Sunday Morning Futures), снимено кон крајот на минатата недела, Трамп ја бранеше својата стратегија.