Фед ги задржа каматните стапки, но прогнозира послаб раст и повисока инфлација

Претставниците на Федералните резерви (Фед) на САД ја задржаа референтната каматна стапка непроменета втор последователен состанок, иако предвидуваат побавен економски раст и повисока инфлација.

Комитетот за отворен пазар на Федералните резерви вчера гласаше за задржување на каматните стапки на ниво од 4,25 до 4,5 отсто и најави дека ќе го забави темпото на намалување на билансните средства. Гувернерот Кристофер Валер, кој ја поддржа одлуката за задржување на каматните стапки, не се согласува со одлуката за намалување на билансната актива.

Одлуката за задржување на каматните стапки доаѓа откако амбициозните и често непредвидливи политички планови на претседателот Доналд Трамп ја ставаат економијата, како и способноста на Фед да ја одржува стабилна, под зголемен притисок. Променетите планови на Трамп за воведување царини на американските трговски партнери ги зголемија стравувањата од економско забавување и поттикнаа нови грижи за инфлацијата - комбинација што може да ги принуди креаторите на политиката да се соочат со спротивставени предизвици.

„Неизвесноста за економските изгледи се зголеми“, се наведува во соопштението на Фед. Официјалните лица исто така го отстранија претходниот дел од текстот во кој се тврдеше дека ризиците за постигнување на целите за вработување и инфлација се приближно избалансирани.

Индексот S&P 500 порасна по објавувањето на извештајот, додека приносите на обврзниците паднаа, а доларот ги намали добивките. Новите изгледи за каматните стапки покажуваат дека тесно мнозинство функционери на Фед предвидуваат намалување на каматните стапки за половина процент годинава. Тоа подразбира две намалувања на каматните стапки од по четвртина процентен поен, што е ист број како што проценуваа функционерите кога последен пат ги објавија прогнозите во декември.

Инфлацијата останува покачена

Во новите економски прогнози официјалните лица ја зголемија просечната процена за таканаречената базична инфлација, која ги исклучува променливите цени на храната и енергијата, на крајот на годинава од 2,5 на 2,8 проценти. Нивното гледиште за економскиот раст за 2025 година е намалено на 1,7 од претходните 2,1 отсто.

Тие ја зголемија и својата процена за невработеноста на 4,4 проценти до крајот на годината, наспроти 4,3 проценти што ги предвидуваа во декември.

Претставниците на Фед ги задржаа каматните стапки годинава, откако ги намалија за вкупно еден процентен поен во последните месеци од 2024 година. Од декември тие сигнализираа желба да се видат поголем напредок во однос на инфлацијата и појасна слика за влијанието на политиките на Трамп пред да се разгледаат какви било нови потези.

Доналд Трамп „Блумберг“

 

Во тој период инфлацијата остана покачена, додека очекувањата на потрошувачите во однос на идните поскапувања се зголемија поради ескалацијата на трговската војна. Потрошувачката ослабе, а довербата на потрошувачите драстично се влоши.

Инвеститорите исто така реагираа негативно, при што индексот S&P 500 падна за повеќе од 10 отсто од средината на февруари, за подоцна делумно да повратат некои од тие загуби.

Администрацијата на претседателот Трамп направи малку за да ги намали стравувањата од рецесија, а претседателот на 9 март изјави дека американската економија се соочува со „период на транзиција“. Министерот за финансии Скот Бесент рече дека американската економија и финансиските пазари имаат потреба од „детоксикација“.

Фед исто така објави дека почнувајќи од април ќе го намали месечниот лимит на износот на обврзниците за кои ќе се дозволи достасување без да се реинвестираат, од 25 милијарди долари на пет милијарди долари. Лимитот за хартии од вредност врзани за хипотекарни кредити ќе се задржи на 35 милијарди долари.

Фед првпат почна да го забавува темпото на намалување на своето портфолио на средства во јуни, во обид да го ублажи потенцијалниот притисок врз каматните стапки на пазарите на пари.

 

- Текстот е напишан со помош од Џонел Марте, Метју Бослер, Винс Гол и Лиз Капо Меккорник.

Во моментов нема коментари за веста. Биди прв да коментира...

Остави коментар