Волстрит воодушевен: Која е Мишел Боуман и што ќе работи во Фед?

Претседателот Доналд Трамп ја избра гувернерката на Федералните резерви (Фед), Мишел Боуман, да биде потпретседателка на централната банка за надзор, потег што го поздравија банките од Волстрит и помалите кредитори, кои очекуваат дека таа ќе биде попријатно расположена кон индустријата.

„Мики чесно служи во Управниот одбор на Фед од 2018 година и има голема експертиза во врска со инфлацијата, регулативата и банкарството“, наведе Трамп во вчерашната објава на социјалните мрежи.

„Блумберг“ претходно објави дека се очекува Трамп наскоро да ја именува Боуман на оваа функција.

„Ако биде потврдено, ќе промовирам безбеден и здрав банкарски систем преку прагматичен пристап кон супервизија и регулација со транспарентна и приспособена банкарска регулаторна рамка што ги поттикнува иновациите“, истакна Боуман во изјавата.

Се очекува Боуман да поддржи полесен пристап на банкарската регулатива од нејзиниот претходник Мајкл Бар. Таа беше остра критичарка на значајниот план со кој се бара од банките да држат повеќе капитал (планот беше претставен во 2023 година).

Претседателот на Фед, Џером Пауел, претходно изјави дека е оптимист дека договорот за долгоочекуваниот план може да биде постигнат „доста брзо“.

Претседателот на Комитетот за банкарство на Сенатот, Тим Скот, ја поздрави номинацијата и ја нарече Боуман важен глас во „повлекувањето на тешките правила“.

Спротивно на тоа, сенаторката Елизабет Ворен од Масачусетс рече дека „длабоко е загрижена“ дека поставањето на Боуман на чело на надзорот на централната банка „е молба за уште еден циклус на дерегулација на Волстрит, крах на банки и спасувачки пакети“.

Боуман, банкарка од петтата генерација, претходно служеше во државната банка во Канзас и беше потпретседателка во банката „Фармерс енд дроверс“ (Farmers & Drovers). Таа стана членка на одборот на Фед во 2018 година и претседава со Поткомитетот на централната банка за помало регионално и локално банкарство.

Некои директори на големи банки се желни да биде потврдено именувањето на Боуман.

„Индустријата би била возбудена да го види назначувањето на Мики Боуман, бидејќи потоа тоа може да им помогне на банките да напредуваат, да го направат она што банката треба да го прави, а тоа е внесување капитал во системот и помагање и поддршка на растот на економијата“, рече главниот извршен директор на „Голдман Сакс“ (Goldman Sachs Group Inc.), Дејвид Соломон, во минатонеделното интервју за „Фокс бизнис“ (Fox Business).
Арон Клајн од институтот „Брукингс“ рече дека изборот на Трамп е „искусен инсајдер“, кој континуирано му помага на Фед.

Со овој потег се пополнува испразнетото место од Бар, кој претходно поднесе оставка од таа позиција, но останува член на Одборот на гувернери на Фед.