Нагел и Ескрива од ЕЦБ: Мора да бидеме претпазливи со следните чекори за каматните стапки

Европската централна банка (ЕЦБ) мора да биде внимателна при одлучувањето за следните движења на каматните стапки, со оглед на големата неизвесност околу економските политики на претседателот Доналд Трамп, сметаат двајца членови на Управниот совет.

Во заедничко интервју, објавено вчера во „Зидојче цајтунг“ (Süddeutsche Zeitung) и „Ел мундо“ (El Mundo), Германецот Јоаким Нагел и Шпанецот Хозе Луис Ескрива ги истакнаа предизвиците што ги поставува новата американска администрација, вклучувајќи ги и тешкотиите во поставувањето на монетарната политика во еврозоната.

„Треба да бидеме скромни во процената на моменталната ситуација“, рече Ескрива, додавајќи дека ЕЦБ мора да собере повеќе информации и „да се обиде да разјасни кои елементи преовладуваат“.

Нагел рече дека „во врска со одлуките за монетарната политика, важно е да се биде претпазлив и да не се претерува со пренагласување специфични најави што би можеле набрзо потоа да се променат“.

Bloomberg

 

Креаторите на политиките размислуваат за понатамошни намалувања на стапките по седмото намалување во април, а инвеститорите се обложуваат на уште еден чекор веќе следниот месец. Тој состанок ќе донесе ажурирани квартални проекции, за кои се очекува да покажат побавен економски раст и инфлација.

Сепак, трговците вчера ги намалија облозите за олеснување по одлуката на САД и Кина да ги намалат царините за период од 90 дена. Тие сега гледаат намалување од помалку од 50 базични поени до крајот на годината.

Членката на Извршниот одбор на ЕЦБ, Изабел Шнабел, минатата недела исто така повика на претпазливост, тврдејќи дека политиката на „стабилна рака“ и одржувањето на трошоците за позајмување блиску до нивните сегашни нивоа би биле најсоодветни во средина на зголемена неизвесност.

Нагел и Ескрива не навлегоа во детали за идниот пат, при што првиот го нагласи пристапот на ЕЦБ што зависи од податоците.

„Досега бевме успешни со оваа стратегија - инфлацијата во еврозоната падна на нешто над два отсто“, рече Нагел. Растот на потрошувачките цени во април изнесуваше 2,2 отсто и се очекува годинава одржливо да се врати на целта од два отсто. Тој исто така рече дека неодамнешната неизвесност нема да исчезне наскоро.

„Администрацијата на САД многу брзо објавува и повлекува далекосежни, понекогаш невидени одлуки, со големи последици за економиите и финансиските пазари“, рече Нагел. „Тоа ја прави монетарната политика уште потешка“.

На прашањето во врска со нападите на Трамп врз Федералните резерви и претседателот Џером Пауел, Нагел рече дека независноста на централната банка е „дел од ДНК на добрата монетарна политика“.

„Историјата нè учи дека, без таква независност, централните банки не се целосно опремени за да постигнат и одржат ценовна стабилност во корист на сите“, рече тој. „Сегашните напади врз Федералните резерви упатуваат на сосема погрешна насока“.