Челници од ЕЦБ повикуваат да се намали надзорот врз банките

Неколку високи функционери на Европската централна банка (ЕЦБ) сакаат да ги намалат овластувањата на моќниот оддел за надзор на банките со цел да се намали бирократијата за заемодавците во Европската унија (ЕУ), велат извори запознаени со ситуацијата.

Функционерите ја повикуваат новоформираната работна група на ЕЦБ да размисли за промени во критериумите според кои се утврдува дали некоја банка е „значајна“ и дали ѝ е потребен надзор од Франкфурт или е доволен надзор од националните институции, велат извори кои сакаа да останат анонимни.

Значително намалување на бројот на банки под директен надзор на ЕЦБ би претставувало најголемо кратење на надзорниот оддел на институцијата откако е формиран пред повеќе од 10 години. Овие дискусии започнаа поради сè поголемите грижи дека Европа заостанува и дека бројните правила и регулативи се пречка за растот.

Некои функционери на ЕЦБ и претходно изразуваа загриженост за прогнозите за еврозоната, додека глобалната економија ја тресат царините на американскиот претседател Доналд Трамп. Меѓународниот монетарен фонд неодамна ги намали своите прогнози за раст за Унијата.

Сепак, промената на правилата не е едноставна работа, а каква било реформа на системот за надзор на банките најверојатно ќе треба да помине низ комплициран законодавен процес.

„Блумберг њуз“ (Bloomberg News) во саботата објави дека ЕЦБ формирала група, предводена од некои од највлијателните гувернери, со цел да се поедностават регулациите.

Панелот наскоро ќе го одржи својот прв состанок, но сè уште не е јасно каков ќе биде конечниот исход од неговата работа, велат извори. Членовите на работната група им ставиле до знаење на своите колеги дека нивната цел не е да го намалат нивото на солвентност на европските банки, додаваат упатените.

Портпаролот на ЕЦБ одби да коментира.

„Има многу силен фокус на темата за поедноставување,“ рече Шерон Донери, членка на Надзорниот одбор на ЕЦБ. Сепак, и централните банкари и надзорниците се „цврсто убедени дека тешко постигнатата отпорност по финансиската криза мора да се зачува.“

Говорејќи на конференција во Франкфурт во вторникот, Донери рече дека ќе биде дел од работната група, „па така таму ќе постои јасен надзорен глас.“ Таа додаде дека носењето какви било одлуки врз основа на процените на групата ќе биде во рацете на политичарите.

Bloomberg

 

ЕЦБ го презеде надзорот над банките пред повеќе од 10 години

ЕЦБ го презеде надзорот над банките пред повеќе од 10 години за да се обиде да ја врати довербата во секторот по кризата во 2008 година. Преку својот механизам, банката директно ги надгледува значајните заемодавци и изгради репутација на исклучително темелна институција. Сепак, некои функционери се прашуваат дали барањата на механизмот се претерани за помалите финансиски институции.

Надзорот од ЕЦБ е обично построг од тој на националните регулатори, што значи дека банките мораат значително да инвестираат во усогласување и известување откако нивната актива ќе ја надмине границата од 30 милијарди евра, по што автоматски потпаѓаат под надзор на институцијата.

Секојдневниот надзор од Франкфурт значи дека големите банки се предмет на дополнителни, детални анализи на нивните финансии, управување и информатичка технологија. Иако заемодавците често се фрустрирани од таквиот надзор, од ЕЦБ тврдат дека овој пристап е за нивно добро.

„Важно е финансиската регулација да биде паметна“

„Важно е финансиската регулација да биде паметна и пропорционална,“ рече во понеделникот гувернерот на Финската банка, Оли Рен. „Секогаш мора да ја одржуваме паметната рамнотежа меѓу финансиската стабилност и иновацијата.“

Рен исто така е член на работната група, за која „Блумберг“ извести во саботата. Во своите коментари тој предупреди дека не треба да се оди во насока на „дерегулација“, особено кога станува збор за капиталните резерви на банките што ја обезбедуваат нивната отпорност. Тој ја истакна и потребата за поедноставување, вклучувајќи го и „бремето на претераното известување во некои области.“

Заменик-претседателот на ЕЦБ, Луис де Гвиндос, исто така во понеделникот им вети на членовите на Европскиот парламент во Брисел дека Европа нема да се приклучи на глобалната „трка кон дното.“

„ЕЦБ ги поддржува напорите за поедноставување на регулаторната рамка,“ рече тој. „Сепак, тоа не смееме да го мешаме со дерегулација. Отпорноста на нашиот финансиски систем во голема мера се должи на правилата воспоставени по глобалната финансиска криза. Финансиската стабилност е глобално јавно добро – таа е во интерес на сите и мора да остане долгорочна цел.“

Намалувањето на бројот на банки што се под директен надзор на ЕЦБ би можело да помогне да се намали товарот и да се ослободат вработени во централната банка, велат некои извори. Тоа може да се постигне со зголемување на прагот на билансот за банките што се дефинираат како значајни или со исклучување на помали банки од помали земји, додаваат упатените.

Некои од функционерите со кои разговарал „Блумберг“ очекуваат дека членовите на работната група ќе имаат различни идеи за тоа каков пристап е потребен, како и за дефинирање на тоа кои банки се значајни.

Критериумите се дефинирани со регулатива, а секоја промена бара постапка на европските законодавци, што значи дека патот до реформата е предизвикувачки. ЕЦБ надгледува 114 значајни институции, додека илјадници други се под надзор на локалните власти, каде што се издвојуваат Германија, Австрија и Италија.

Формирањето на работната група следеше по контроверзното писмо кое претходно оваа година до Европската комисија го испратија гувернерите на централните банки на Германија, Франција, Италија и Шпанија. Во писмото тие директно повикаа на „темелна проценка“ на правилата со цел да се обезбедат „еднакви правила“ како во другите големи јурисдикции.

Во моментов нема коментари за веста. Биди прв да коментира...

Остави коментар