Германското индустриско производство во септември порасна помалку од очекуваното, што укажува на тоа дека најголемата економија во Европа полека излегува од повеќегодишниот пад. Производството се зголеми за 1,3 отсто во однос на претходниот месец, соопшти вчера „Дестатис“. Тоа е значајно под средната процена од три отсто во анкетата на „Блумберг“. Растот го предводи скокот од 12,3 проценти во автомобилското производство.
Добро утро, ви пишува Владимир Николоски од дигиталната редакција на „Блумберг Адрија“. Подолу петте вести што ги издвоивме за почеток на денот.
„Бучим“ во ерата на скап бакар - сигурно засолниште или ризик?
Цената на бакарот минатата недела се искачи до рекордни над 11.100 долари за тон. Оваа цена беше повисока од историската вредност што металот ја достигна пред година и половина. Деновиве состојбата е помирна, а цената падна под 11.000 долари. Сепак, прогнозите се дека цената ќе остане нестабилна поради големата побарувачка за металот што е клучен за двата најважни процеса во моментов – дигитализацијата и декарбонизацијата, а некои експерти сметаат дека не е исклучено тон да стигне и до 12.000 долари.
Според проекциите на Меѓународната агенција за енергетика, потребата за бакар допрва ќе расте. За пет години побарувачката ќе се зголеми за 17 отсто, а до 2040 година за 27 отсто. Но, паралелно со растот на побарувачката доаѓаат и проблемите во снабдувањето. Меѓу најзначајните проблеми се рударските несреќи. Годинава, на пример, по тежок инцидент во рудникот за бакар „Грасберг“ во Индонезија, рудникот престана со работа и беше соопштено дека производство нема да се врати на претходното ниво до 2027 година.
Европските банки со сопствен стабилен токен против доминацијата на САД, ЕЦБ не е воодушевена
Конзорциум од девет европски банки, меѓу кои гигантите ИНГ (ING) и „Уникредит“ (UniCredit), основа нова компанија за издавање стабилен токен врзан за еврото, со цел да се намали доминацијата на САД во областа на дигиталниот криптоимот. Покрај ИН“ и „Уникредит“, во конзорциумот се и „Банка Села“ (Banca Sella), КБЦ (KBC), „Данске банка“ (Danske Bank), „Дека банка“ (DekaBank), СЕБ (SEB), „Каикса банка“ (CaixaBank) и „Рајфајзен банка интернешнал“ (Raiffeisen Bank International).
Новата компанија, со седиште во Амстердам, треба да го лансира својот стабилен токен во втората половина на следната година. Стабилните криптотокени се создадени така што ја одржуваат постојаната вредност во однос на традиционалните фиат-валути. Со употреба на блокчејн-технологија и криптографски механизми, овие токени може едноставно и веднаш да се пренесуваат преку интернет-протоколи.
Скопјани почнаа масовно да сликаат, виното ги ослободува
Наместо на класични излегувања во кафулиња, сè повеќе скопјани одбираат парите да ги трошат на креативни искуства. Еден таков формат што особено се издвојува во последно време е „пеинт енд вајн“ (paint and wine), концепт што комбинира сликање на платно и дегустација на вино. По големиот успех во САД и Британија, овој културен феномен конечно и кај нас доживува подем, а организаторите на вакви настани во разговор за „Блумберг Адрија“ истакнуваат дека интересот се зголемил повеќекратно во последните две години и дека сега сесиите експресно се распродаваат.
„Пред да го отвориме студиото бевме на патување во Италија, каде што присуствуваме на сличен ваков концепт и си поминавме преубаво. Полни со импресии откако си дојдовме, направивме мало истражување дали постои ваков концепт кај нас во Македонија, видовме дека нема и си рековме да пробаме“, вели Филип Симеонов, соосновач на сликарската работилница „Пеинт енд вајн“ (Paint and Wine).
Европските стадиони се финансираат со обврзници, во регионот со ентузијазам и кредити
Клубот Спортинг од Лисабон собра 225 милиони евра со продажба на обврзници за модернизација на стадионот и негово претворање во забавен центар. Продажбата ја организираше „ЏП Морган“ (J.P. Morgan), а емисијата носи фиксна каматна стапка од 5,75 проценти и рок на отплата од 28 години. Обврзниците имаат маргинален инвестициски рејтинг (БББ ДБРС, БББ од „Фич“), а побарувачката достигна две милијарди евра или 8,5 пати повеќе од понудениот износ. Поголемиот дел од купувачите доаѓаат од Соединетите Американски Држави (САД), што уште еднаш потврдува дека американскиот капитал продолжува да води во сегментот на финансирање на спортот.
Според Михаел Блажековиќ, раководител на аналитичкиот тим во „Блумберг Адрија“, вакви проекти веќе не се ретки. „На поразвиените пазари на капитал, не е невообичаено фудбалските клубови да се задолжуваат преку обврзници, особено во Европа. Клубовите често се нископрофитабилни, скоро сите се негативни на нето ниво, па затоа ваквите аранжмани се гледаат преку имот и бренд, а не преку профит.“
Резултати на НЛБ: Што го движи профитот?
Групацијата НЛБ оствари нето-добивка од 131,6 милиони евра во третиот квартал, што е за еден процент помалку во однос на истиот период од претходната година, додека за првите девет месеци вкупната добивка изнесува 406 милиони евра. И покрај падот на каматните стапки од 150 базични поени, вкупните приходи во првите девет месеци го надминаа споредливиот период од минатата година за четири проценти и изнесуваа 963 милиони евра.
На прв поглед, изненадувачки отпорните перформанси на НЛБ, со оглед на различното монетарно опкружување од минатата година, се темелат првенствено на континуираниот раст на кредитите. Кварталните резултати се поздравени и од акционерите, бидејќи цената на акциите надмина 180 евра, а во денешното утринско тргување НЛБ порасна за речиси три проценти.
.webp){kind=icon}
