Наместо на класични излегувања во кафулиња, сè повеќе скопјани одбираат парите да ги трошат на креативни искуства. Еден таков формат што особено се издвојува во последно време е „пеинт енд вајн“ (paint and wine), концепт што комбинира сликање на платно и дегустација на вино.
По големиот успех во САД и Британија, овој културен феномен конечно и кај нас доживува подем, а организаторите на вакви настани во разговор за „Блумберг Адрија“ истакнуваат дека интересот се зголемил повеќекратно во последните две години и дека сега сесиите експресно се распродаваат.
„Пред да го отвориме студиото бевме на патување во Италија, каде што присуствуваме на сличен ваков концепт и си поминавме преубаво. Полни со импресии откако си дојдовме, направивме мало истражување дали постои ваков концепт кај нас во Македонија, видовме дека нема и си рековме да пробаме“, вели Филип Симеонов, соосновач на сликарската работилница „Пеинт енд вајн“ (Paint and Wine).
Bloomberg Adria
Со иста цел, уште еден млад ентузијаст неодамна отвори ваков простор каде што, како што вели, луѓето можат да се опуштат, да се дружат и истовремено да се самоизразуваат.
„Нашите гости се многу различни, од луѓе што постојано бараат нешто ново и необично до поинтровертни личности што вакви креативни активности ги извлекуваат од дома. Кај нас клиентите доаѓаат да слават момински вечери, организираме тим-билдинзи, едноставно целиме на широка публика“, вели 25-годишниот Матеј Стојановиќ, основач на креативниот простор „Арт рум“ (Art Room).
Бизнис-моделот е едноставен. Учесниците се собираат во пријатен амбиент, во бар, галерија или културен простор каде што, со чаша вино, под водство на професионален уметник, создаваат сопствено уметничко дело. Секој настан има различна тема, а она што го прави овој концепт уште поатрактивен е тоа што не е наменет само за уметници.
Bloomberg Adria
Напротив, повеќето посетители се луѓе што никогаш не држеле четка, но бараат креативен излез од секојдневието.
„Од лицата што доаѓаат, 98 отсто се аматери во сликање, а не во пиење вино, па сите се со размислување дека нема ништо да направат и дека не ги бива, но со помош на артистот што ги води низ целиот процес остануваат вчудовидени од крајниот исход, а тоа е нивното дело. Сме забележале дека многумина во првиот половина час се како на испит, потоа стапува во сила квалитетното македонско вино што го служиме“, на шега коментира Симеонов.
Сесиите траат до два и пол часа, а цената по учесник е 1.200 денари. Во овој пакет се вклучени сите потребни сликарски материјали, уметник што ве води низ целиот креативен процес и ги споделува своите техники, како и неограничена дегустација на различни селекции вина, од исклучиво мали македонски производители до различни италијански, шпански и француски етикети, во зависност од работилницата што ќе ја одберете.
Симеонов и Стојановиќ се едногласни дека на почетокот најмногу енергија вложувале токму во договарањето на винарниците, но сега, кога контактите се веќе остварени, најголем предизвик во работата им е планирањето на самиот настан.
„Секогаш внимателно размислуваме на која тема ќе се црта, бараме интересни слики и се обидуваме да ја погодиме целната група. Правиме брејнсторминг, планираме детали, проверуваме дали имаме доволно материјали и што сè треба да се набави. Работата пред самиот настан е најинтензивна, но токму тоа ни носи најголемо задоволство кога сè ќе се спои на крај и ќе видиме задоволни насмевки кај клиентите“, раскажува Стојановиќ.
Bloomberg Adria
Тренд, терапија, но и добар бизнис
Феноменот „пеинт енд вајн“ не е само тренд за забава или нов начин на социјализирање. Психолозите го гледаат како дел од една поширока слика, пред сè како активност што нуди терапевтски момент на поврзување со себеси. Според нив, ваквите креативни искуства се одраз на нашата потрага по емоционална рамнотежа, креативна експресија и добро осмислено време, вредности што сè повеќе го дефинираат урбаниот начин на живеење. Економските експерти, пак, во овие културни иницијативи препознаваат мали бизниси што дополнително ја поттикнуваат динамиката на локалниот пазар и отвораат нови можности за самовработување. Ги прашавме нашите соговорници и кои се нивните очекувања од комерцијален аспект, но колку средства инвестирале во нивните стартапи не сакаа да откријат.
„Вложивме многу повеќе од финансии. Вложивме време, труд, дадовме и даваме многу љубов и енергија. Ни беше важно да го изградиме местото токму како што го замислувавме. Очекуваме да продолжи да расте интересот и луѓето сè повеќе да го препознаваат ова искуство како совршен начин за опуштање“, вели Стојановиќ.
Симеонов, пак, коментира дека ниту на почетокот ниту денес немале некоја проекција кон која се стремат.
„Нас нè инспирира начинот на интеракција меѓу лицата што присуствуваат, нивното зближување. Секако, за еден бизнис да опстојува е потребно квалитетно планирање, кое е дел од нашето секојдневие. Сите ние имаме примарни работи што ги работиме, ова е само за забава“, искрен е тој.
.webp){kind=icon}
