Трамп го продолжи трговското примирје со Кина за 90 дена

Претседателот Доналд Трамп го продолжи мораториумот на високите царини за кинеските производи уште за 90 дена, до почетокот на ноември, стабилизирајќи ги трговските односи меѓу двете најголеми економии во светот.

Трамп потпиша наредба за продолжување на примирјето до 10 ноември, со што се одложува зголемувањето на царините предвидено за вторник. Деескалацијата првично стапи во сила кога САД и Кина се согласија да ги намалат реципрочните зголемувања на царините и да ги олеснат извозните ограничувања за магнети од ретки земји (силни индустриски магнети изработени од елементи од групата на ретки земји) и одредени технологии.

„Сите други точки од договорот ќе останат исти“, наведе Трамп во објава на Трут соушл (Truth Social), сугерирајќи дека нема планирани промени во трговската политика на САД или во условите на договореното. Во документот објавен од Белата куќа не беа наведени други измени, освен продолжувањето на рокот.

Кина, во слично соопштение, истакна дека и таа ќе го продолжи сопствениот мораториум за дополнителни 90 дена.

Преговарачите од двете страни минатиот месец во Шведска постигнаа прелиминарен договор за задржување на спогодбата. Доколку примирјето не беше продолжено, царините на САД за кинеските производи ќе се зголемеа на најмалку 54 отсто, почнувајќи по полноќ во Њујорк.

Продолжувањето ќе ги ублажи стравувањата од обновена трговска војна, која се заканува да ја задуши трговијата меѓу САД и Кина. Ескалацијата меѓу Вашингтон и Пекинг порано годинава ги потресе глобалните финансиски пазари.

Тоа, исто така, ќе им даде повеќе време на двете земји да разговараат за други нерешени прашања, како што се давачките поврзани со трговијата со фентанил што Трамп му ги наметна на Пекинг, американската загриженост околу кинеските набавки на санкционирана руска и иранска нафта и несогласувањата околу работењето на американските компании во Кина.

Потпишувањето може да го расчисти патот за посетата на Трамп на Кина за средба со претседателот Шји Џјинпинг кон крајот на октомври, во периодот околу меѓународниот состанок во Јужна Кореја, на кој американскиот лидер веројатно ќе присуствува.

„САД продолжуваат да водат разговори со Народна Република Кина за надминување на недостигот од трговски реципроцитет во нашите економски односи и произлезените национални и економски безбедносни загрижености“, напиша Трамп во наредбата.

„Преку овие разговори, Народна Република Кина продолжува да презема значајни чекори за отстранување на нерецепрочните трговски договори и за решавање на загриженоста на САД поврзана со економските и националните безбедносни прашања“.

Трамп, зборувајќи пред новинарите претходно во понеделникот, рече: „Многу убаво се справуваме со Кина“.

Трамп годинава ги зголеми царините на кинеските производи, а Пекинг возврати на ист начин. Американските царини на кинескиот увоз на крајот достигнаа 145 отсто, а Кина го ограничи пристапот до магнети од клучно значење за американските производители. Двете страни во мај постигнаа 90-дневно примирје, според кое САД ги намалија царините за кинеските производи на 30 отсто, додека Пекинг ги намали давачките за американските производи на 10 отсто и се согласи да го обнови извозот на магнети од ретки земји.

Подготвеноста на Трамп да преговара со Кина предизвика загриженост кај поборниците за силен национален безбедносен став, кои сметаат дека тој не е подготвен да му се спротивстави на најголемиот геополитички ривал на САД. Компаниите „Енвидија“ (Nvidia Corp.) и „Адвенсд мајкро дивајсис“ (Advanced Micro Devices Inc. – AMD) постигнаа договори со администрацијата на Трамп за обезбедување лиценци за извоз, прифаќајќи да ѝ исплаќаат на американската влада 15 отсто од приходите од продажбата на одредени чипови за вештачка интелигенција во Кина.

Трамп во понеделникот исто така изрази подготвеност да ѝ овозможи на „Енвидија“ да продава во Кина приспособена верзија на својот најнапреден чип за вештачка интелигенција, велејќи дека „е можно да склучам договор“.

Што вели „Блумберг економикс“...

Ова одложување малку менува во сѐ понесигурната трговска позиција на Кина. Бранoт билатерални договори меѓу САД и други земји во јули и почетокот на август ја остави Кина во послаба позиција. Додека другите земји постигнаа договори за обезбедување пониски царини со САД, Кина се наоѓа меѓу малкуте големи економии без јасна временска рамка или услови за договор.

- Чанг Шу, Дејвид Ку и Рана Сажеди

Со приближувањето на рокот, Трамп во неделата ја повика Кина да го зголеми четирикратно купувањето американска соја, нешто што, како што рече, би помогнало во намалувањето на американскиот трговски дефицит со Кина.

Одлуката на Трамп да го продолжи примирјето следува по дводневните разговори во Стокхолм во јули, предводени од американскиот секретар за финансии Скот Бесент и од кинескиот потпретседател на Владата Хе Лифенг – трет круг разговори меѓу Вашингтон и Пекинг во помалку од три месеци.

Иако кинеските претставници и официјалниот весник на Комунистичката партија сигнализираа задоволство од разговорите во Стокхолм, а министрите од американскиот кабинет предвидуваа продолжување, спогодбата остана кревка. Бесент изјави дека секоја одлука за продолжување на договорот ќе биде во надлежност на Трамп.

Клучно прашање во тековниот дијалог е како двете земји ќе се обидат да одржат стабилни трговски односи, додека воведуваат бариери како што се царини и извозни контроли за да го ограничат напредокот една на друга во критични сектори, вклучувајќи ги и технологијата за батерии, одбраната и полупроводниците.

Двете страни во последно време преземаат чекори за намалување на тензиите и на потенцијалните жаришта на конфликт, при што кинескиот извоз на магнети од ретки земји почна да закрепнува во јуни, а САД соопштија дека ќе одобрат пратки на полупроводник што се користи за вештачка интелигенција, кој претходно беше блокиран.

Американскиот трговски претставник Џејмисон Грир, кој учествуваше на преговорите во Стокхолм, изрази оптимизам за разговорите со Кина околу протокот на магнети од ретки земји, велејќи дека САД обезбедиле обврски за нивното снабдување.

„Фокусирани сме на тоа да обезбедиме магнетите од Кина кон САД и поврзаниот синџир на снабдување да можат да се движат исто толку слободно како и пред воведувањето на контролата“, изјави Грир во неодамнешно интервју за емисијата „Лице в лице со нацијата“ (Face the Nation) на „Си-би-ес“ (CBS). „И би рекол дека сме приближно на половина пат“.

Протокот на магнети од ретки земји од Кина кон САД порасна на 353 тони во јуни, од само 46 тони во мај, според најновите податоци од царината. Вкупните пратки сепак останаа значително помали отколку пред Пекинг да воведе извозни контроли на почетокот на април.

Продажбата на напредни чипови за вештачка интелигенција и натаму претставува проблем, и покрај одлуката на Трамп да ги олесни извозните контроли. Кон крајот на јули кинеските власти ја повикаа „Енвидија“ на разговор за наводна безбедносна ранливост поврзана со нејзините чипови H20.

Притисок со тарифи

Преговорите меѓу Кина и САД се одвиваат по одделна патека од другите разговори што администрацијата на Трамп ги води со трговските партнери, додека работи на воведување обемни таканаречени реципрочни царини и индустриски специфични давачки за други економии.

Царините од 30 отсто што ги воведе Трамп се состојат од давачка од 20 отсто поврзана со фентанил и основна царина од 10 отсто. Овие тарифи се додаваат на постојните царини за одредени кинески производи воведени во неговиот прв мандат.

Во моментов нема коментари за веста. Биди прв да коментира...

Остави коментар