Владата планира задолжување од над милијарда евра кај домашните банки и на меѓународниот пазар

Владата на една од последните седници одржана на 1 август годинава ги разгледувала информациите за задолжување на Македонија со заем кај домашни комерцијални банки во износ до 70.000.000 евра и за потенцијално задолжување на меѓународниот пазар на капитал во износ до 950.000.000 евра. Можноста за ново задолжување се разгледува во период кога јавниот долг на земјата надмина 9,71 милијарди евра заклучно со вториот квартал од годинава што е еднакво на 58,5 проценти од бруто домашниот производ на државата.  

Инаку, Владата во новата стратегија за управување со јавниот долг утврди лимит за јавниот долг од 60 проценти од БДП. Сепак, во истиот документ се наведува дека согласно проекциите за среднорочната буџетска рамка од која произлегува потребата  за финансирање на буџетските дефицити, потребите за отплата на претходните долгови и имплементацијата на проектите надвор од централната власт јавниот долг до 2027 ќе го надмине утврдениот лимит од 60 проценти од БДП и ќе изнесува 62,5 проценти од БДП. Се очекува од 2028 година умерен пад на јавниот долг поради фискалната консолидација, како и стабилизија под границата од 60 проценти од БДП во 2030 година.

Согласно оваа стратегија, лимитот за краткорочното максимално задолжување (домашно и странско) по основ на државен долг за 2026 година е поставено на 800 милиони евра, а нето задолжувањето го вклучува планираното задолжување во рамките на државниот долг намалено за отплатите по основ на овој долг. 

 

Во моментов нема коментари за веста. Биди прв да коментира...

Остави коментар