Најпродаван автомобил во Британија повторно е „тему ренџ ровер“

Британските возачи сè повеќе прифаќаат кинески автомобили, а „џаеку 7“ (Jaecoo 7) повторно стана најпродаван нов автомобил во Велика Британија.

Овој модел, кој го доби прекарот „тему ренџ ровер“ (Temu Range Rover), во септември ги надмина конкурентите како „форд пума“ (Ford Puma) и „киа спортејџ“ (Kia Sportage), со повеќе од 10.800 регистрирани возила, според податоците што во петокот ги објави Здружението на производители и трговци на автомобили (SMMT).

Кинескиот бренд минатиот месец зазеде 4,3 отсто од пазарот, кога ќе се земат предвид и другите модели, како „џаеку 8“, кој годинава пристигна на пазарот. „Џаеку 7“, кој се нуди со мотор со внатрешно согорување или како плагин хибрид, првпат се најде на врвот на листата во март, но до септември ги престигна конкурентите.

„Џаеку 7“ се произведува во Кина во компанијата „Чери“ (Chery Automobile Co.) и стана вообичаена глетка на британските патишта со својата препознатлива маска, помалку од две години по пристигнувањето во продажните салони. Цената му почнува од околу 30.000 фунти (околу 35.000 евра), а на социјалните мрежи го доби прекарот „тему ренџ ровер“ бидејќи претставува ценовно подостапна верзија на британскиот луксузен бренд - со алузија на кинеската трговска платформа „Тему“.

„Џаеку 7“ го предводи продорот на кинеските автомобилски брендови, кои брзо го зголемија своето присуство на британскиот пазар и во септември зазедоа 23 отсто од вкупниот пазар. Меѓу попопуларните марки е и БЈД (BYD Co.), која сочинуваше речиси шест отсто од сите регистрации.

За разлика од Европската Унија, увозот на кинески електрични автомобили во Велика Британија не е оптоварен со дополнителни царини. Плагин хибридите не се опфатени со трговските давачки, но наскоро би можеле да бидат погодени од слични мерки во ЕУ.

Велика Британија можеби ќе мора да воведе слични царини доколку сака еднаков третман во рамките на правилата на ЕУ за локална содржина, изјави минатиот месец еден извршен директор на „Нисан“ (Nissan Motor Co).

„Царините доаѓаат и си одат, но тоа нема да ја промени нашата инвестиција во Велика Британија“, им рече на новинарите за време на телефонски разговор Виктор Џанг, генерален директор на компаниите „Џаеку“ (Jaecoo) и „Омода“ (Omoda) за Велика Британија, кои исто така се во сопственост на „Чери“. „Остануваме тука.“

Џанг укажа на меморандумот за разбирање што го потпишаа „Нисан“ и „Чери“, според кој компаниите ја разгледуваат можноста „Чери“ да склопува автомобили во фабриката на „Нисан“ во Сандерленд, најголемата фабрика за автомобили во Велика Британија.

Септември е клучен месец за продажба на автомобили во земјата, бидејќи тогаш почнуваат да се издаваат нови регистарски ознаки, што ја зголемува побарувачката над вообичаеното ниво. Друг важен месец во кој се случува тоа е март.

„Чери“ во Велика Британија главно продава плагин хибриди, привлекувајќи купувачи што сè уште се воздржуваат од целосна транзиција кон електрични возила поради недоволно развиената инфраструктура за напојување. Само мал дел од продажбата отпаѓа на целосно електрични автомобили, додека речиси една четвртина сочинуваат возила со мотори со внатрешно согорување.

Додека кинеските производители остварија добри резултати, „Тесла“ (Tesla Inc.) продолжува да закрепнува од минатогодишниот пад. Производителот на автомобили, на чие чело е Илон Маск, зазеде 4,5 отсто од британскиот пазар на нови автомобили во септември, со речиси 16.000 продадени возила.