„Ренџ ровер“ од „Тему“ - кинески теренец што ги оттргна купувачите од престижниот оригинал

„Ленд роверите“ се британски колку и кралот, крампетите (англиски палачинки) и крикетот. Овој робустен теренец од 1948 година е „работен коњ“ на британската армија. Кралското семејство чува цела флота „лендија“ во својот замок во Шкотска. А во Котсволдс, типично англиска викенд-дестинација на околу 100 километри западно од Лондон, тие се истовремено симбол на статус и (понекогаш) потреба за совладување на лошите патишта што се протегаат низ кривулестите ридови.

Па зошто тогаш овие селски патишта одеднаш се преполни со кинеската имитација наречена „џаеку 7“ (Jaecoo 7)? Нешто повеќе од една година по влегувањето на британскиот пазар, овој автомобил се продава подобро од споредливиот модел „ренџ ровер евок“ на компанијата „Ленд Ровер“ на домашен терен, поради што го доби прекарот „ренџ ровер“ од „Тему“, како алузија на онлајн трговската платформа со евтини производи (која сè уште не ги продава... засега).

„Навистина изгледаат добро“, вели Кејт Ален, набљудувајќи бел „џаеку“ во продажен салон во Абингдон, град на реката Темза, кој претставува порта кон Котсволдс.

„Ја погледнав цената“, се надоврзува нејзиниот сопруг Роб, „и ми се допаѓа што практично се целосно опремени“.

Продажен салон во Абингдон, Британија | Murray Ballard/Bloomberg Businessweek

Бензинската верзија на моделот „џаеку 7“ започнува од околу 30.000 фунти (35.000 евра), во споредба со 45.000 фунти (52.500 евра) за „ренџ ровер евок“ (најмалиот модел на компанијата „Ленд Ровер“). Вклучува детали од премиум класата како што се загреани предни седишта, како и панорамски покрив, за кои кај моделот „евок“ скапо се доплаќа. Исто така има гаранција од седум години, во споредба со три години за неговиот англиски ривал, што помогна „џаеку 7“ во март да стане најпродаван автомобил во Британија.

„Сите други теренски модели се прескапи“, вели Том Хамонд, софтверски инженер шт во салонот разгледува модели на „џаеку 7“. Тој планира својот седан „ауди А4“ да го замени со моделот „џаеку 7 блек лакшари“, плагин хибрид што ја имитира поскапата верзија на „ренџ ровер“.

Нема многу мистерија зошто „џаеку 7“ толку личи на „ренџ ровер“: неговиот производител, „Чери аутомобил“, е кинески партнер на компанијата „Јагуар Ленд Ровер аутомотив“ (ЈЛР), матичната компанија на овој англиски бренд. Нивниот заеднички проект од 2012 година произведува робусни теренски модели во фабрика во Чангшу.

Пред две години ЈЛР го оживеа укинатиот модел наречен „фрилендер“ како електрично возило за Кина, при што компанијата ги обезбеди името и дизајнот, додека „Чери“ го разви електричниот погон. ЈЛР одби да коментира, но претходно соопштуваше дека неговите автомобили се наменети за поинаква, побогата публика.

„Џаеку“ во брза лента

Продажба во Британија, кумулативно од јануари 2025 година (во британски фунти)

 

Се однесува само на нови возила | MarkLines

Кинеските производители на автомобили во последните години силно навлегуваат во Европа и во мај зазедоа 10 отсто од пазарот, првпат достигнувајќи го тоа ниво, што е далеку повеќе од нивниот удел во САД, каде што се практично забранети.

Некои кинески компании бараа простор во фабриките на европските конкуренти, а недоволно искористените фабрики низ регионот со задоволство склучуваат такви договори за производството да продолжи.

„Традиционалните производители сфаќаат дека ќе мора да соработуваат со некои од новите брендови, бидејќи тие го предводат развојот на поефикасни начини на производство“, вели Бен Нелмс, извршен директор на истражувачката група „Њу аутомотив СИЦ“.

Британија, која нема значајна домашна автомобилска индустрија што би требало да ја заштити, е особено привлечна, а кинеските брендови сега држат околу една петтина од вториот најголем автомобилски пазар во Европа.

За автомобилите не се применуваат царини повисоки од стандардните 10 отсто што важат за целиот увоз, за разлика од Европската Унија, која воведува царини до 35 отсто за да ја заштити индустријата што вработува 13,8 милиони луѓе во Унијата.

Британија станува растечка автомобилска сила, но благодарение на Кина

Учество на кинеските брендови во новите регистрирани автомобили во Британија

Извор: SMMT, Bloomberg News

Некогаш глобална сила со легендарни брендови како „Мини“ и „Јагуар“, британската автомобилска индустрија со децении е во опаѓање, а производството на автомобили минатата година падна на најниско ниво од 1956 година.

А она што остана од неа заврши во странски раце. ЈЛР сега е под контрола на индиската „Тата груп“, „Воксхол“ е дел од компанијата „Стелантис“, производител на брендовите „Џип“ и „Фиат“. БМВ го поседува „Мини“. А МГ (MG), кој произведуваше роудстер што кралицата Елизабета му го подари на својот син, тогашниот принц Чарлс, за неговиот 21. роденден, е во сопственост на кинеската државна компанија „САИК Мотор корп“.

Дури и јапонските брендови на кои Маргарет Тачер им даде поддршка за зајакнување на британската автомобилска индустрија сега се соочуваат со проблеми.

„Нисан мотор“, кој во 1986 година отвори фабрика во Сандерленд, поранешен рударски центар на северот на земјата, кој и тогаш се соочуваше со сериозни економски проблеми, не може да ги продаде сите автомобили што ги произведува.

Затоа фабриката веќе од 2027 година ќе започне да произведува возила за „Чери“. Не е јасно дали „џаеку 7“ или 8 (седмосед од 45.000 фунти, претставен оваа пролет) ќе бидат дел од тој аранжман, но аналитичарите сметаат дека ќе бидат.

Исчезнувањето на домашните производители доведе до прилив на нови брендови. Според податоците на онлајн платформата „Аутотрејдер“, во Британија сега се продаваат 75 автомобилски бренда, во споредба со 45 во 2019 година.

Растот го поттикнаа 14 кинески производители што влегоа на пазарот, меѓу нив „Липмотор“ (поврзан со „Стелантис“), БЈД (лидер во производството на електрични возила, кој своевремено го поддржуваше Ворен Бафет) и „Чери“, кој во Велика Британија продава три бренда.

Доаѓаат и нови. Технолошкиот гигант „Шаоми“, кој влегува во производство на автомобили со модел што личи на „порше тајкан“, планира да влезе на британскиот пазар до 2028 година.

БЈД годинава во Британија носи електричен автомобил вреден 100.000 фунти од својот премиум бренд „Денза“, со рекламна кампања во која главно лице е поранешната ѕвезда на Џејмс Бонд, Даниел Крег.

Оваа есен „Чери“ додава и четврти бренд, ориентираниот кон буџетскиот сегмент „Лепас“.

Овој раст „покажува дека луѓето почнуваат да нè забележуваат“, вели Гери Лан, извршен директор за Британија на компанијата „Џаеку“ и сестринскиот бренд „Омода“.

„Луѓето сè повеќе ги проценуваат автомобилите според тоа што навистина го нудат, а не само според тоа колку долго одреден бренд е присутен на пазарот.“

Сепак, прифаќањето не е универзално: во Дејлсфорд, луксузна продавница за земјоделски производи во Котсволдс, „ренџ роверите“ и понатаму бројчено ги надминуваат моделите на „џаеку“.

Томас Доби, кој го води интернет-порталот „Карс оф Глазгов“, смета дека „џаеку“, во споредба со својот британски претходник, е „малку несигурен“.

Но Џереми Кларксон, љубител на автомобили што ја создаде хит емисијата за автомобили „Топ Гир“ на „Би-би-си“, во лондонски „Тајмс“ напиша дека за купувачите што бараат безбедност и сигурност по разумна цена, „’џаеку 7’ е сосема во ред“.

Range Rover | Murray Ballard/Bloomberg Businessweek

Продавачите на автомобили во меѓувреме брзо се загреаја за кинеските компании: „Џаеку“ сега се продава на повеќе од 120 продажни места низ Обединетото Кралство, во споредба со ниту едно пред две години, со што се поттикнува продажбата додека традиционалните брендови ослабуваат.

Продажниот салон „Хартвел аутомотив“ во Абингдон неуморно го промовира „џаеку 7“ на социјалните мрежи, а едно видео на Тикток што ја промовира цената за лизинг од 365 фунти (430 евра) месечно собра 1,6 милион прегледи.

Ендру Вилкинсон, продавач во компанијата „Хартвел“ веќе 14 години, вели дека пред две години не му се допаднала одлуката да се премине од „Форд“ на „Џаеку“, но денес не жали поради тоа.

„’Џаеку 7’ се продава сам од себе“, вели Вилкинсон. „Не можеме да набавиме доволно. Сè што моментално имам на плацот е веќе продадено.“