Пјеро Ферари, син на основачот на производителот на суперавтомобили, смислува план за наследство, кој го вклучува неговиот најпознат имот: акциите на „Ферари НВ“ (Ferrari NV).
Пјеро (77), заменик-претседател на компанијата, месецов формирал семеен фонд за да го надгледува уделот од околу 10 отсто што го наследил од својот татко Енцо Ферари, покажаа американски регулаторни документи доцна во понеделникот. Корисници на фондот се ќерката на Пјеро, Антонела, и внуците Енцо Матиоли Ферари и Пјеро Галаси Ферари, иако тој ќе ја задржи гласачката контрола врз акциите за време на својот живот.
Пјеро Ферари вреди околу 4,6 милијарди долари, а најголемиот дел од неговото богатство е поврзан со италијанскиот производител на автомобили, според индексот на милијардери на „Блумберг“. Портпаролот на „Ферари“ одби да коментира што било надвор од информациите во регулаторниот поднесок.
Bloomberg
Овој потег дава редок увид во плановите за наследство на некои од најбогатите луѓе во светот. Милијардерите ќе префрлат повеќе од две илјади милијарди долари во следните две децении, според истражувањето на „УБС груп АГ“ (UBS Group AG) и ПвЦ (PwC), а пандемијата на ковид-19 ќе помогне да се забрза таа промена.
Богатството на Пјеро Ферари порасна во последниве години, бидејќи акциите на италијанската компанија со седиште во Маранело пораснаа за повеќе од 300 отсто од нејзиното влегување на берзата во Њујорк во 2015 година. Тој исто така поседува удел во италијанскиот производител на луксузни јахти „Ферети груп“ (Ferretti Group) и е претседател на фирмата за инженерски услуги HPE COXA.
Создавањето на фондот нема да влијае на договорот што Пјеро го постигна на крајот на 2015 година со „Ексор“ (Exor NV), холдинг-компанијата на милијардерската фамилија Ањели и најголем акционер во „Ферари“, со околу 24 отсто од уделот. Тој договор претставува обврска за консултации „со цел да се формира и да се постигне заедничко гледиште за точките од дневниот ред на секое генерално собрание на акционерите на Ферари“.
Портпаролот на „Ексор“, исто така, одби да коментира за што било надвор од поднесокот.
„Ферари“ вложува напори да ја претвори својата историска фабрика во северна Италија во центар за автомобили на батерии. Трансформацијата покажува дека дури и најквалитетните производители на мотори со внатрешно согорување се подготвуваат за електрична иднина.
„Производителот на автомобили планира да инвестира околу 4,4 милијарди евра (4,7 милијарди долари) во развој на целосно електрични и плагин-хибридни модели, кои ќе сочинуваат 60 отсто од неговото портфолио до 2026 година“, изјави главниот извршен директор Бенедето Виња во јуни, за време на деновите на компанијата.
.webp){kind=icon}
