.webp){kind=icon}
„Форд“ (Ford Motor Co) се враќа на врвот во мотоспортот, враќајќи се во Формула 1 (Ф1) по повеќе од две децении од откажувањето. Производителот на автомобили повторно ќе влезе во Формула 1 во 2026 година, кога новите регулативи ќе бараат од тимовите да ја зголемат електричната енергија дури за 50 проценти и да користат целосно одржлив етанол како гориво. И „Ауди“ (Audi) планира да се приклучи тогаш, а иако разговорите на „Порше“ (Porsche) со „Ред бул“ (Red Bull GmbH) неодамна пропаднаа, таа автомобилска компанија сè уште гледа начин да влезе во тркачката серија.
„Форд“ има богата историја во Ф1, освојувајќи 10 шампионати за конструктори и 13 шампионати за возачи во текот на приближно деценија и пол, период што заврши во раните 1980-ти. Главниот извршен директор Џим Фарли е долгогодишен ентузијаст за трки и се натпреваруваше на својата прва професионална трка минатиот месец на патеката на Флорида (Daytona International Speedway).
Bloomberg Mercury
„Веќе сум релевантен за нашите дизајнери и инженери. Не сум некој извршен директор без врска. Ме одржува свеж кога сум покрај луѓе со автомобили. Не сум во кантри-клуб и играм голф“, изјави Фарли за списанието за автомобилски ентузијасти „Роуд енд трак“ (Road & Track).
Популарноста на Ф1 се зголеми откако „Либерти медиа“ (Liberty Media Corp) на милијардерот Џон Мелоун ја купи франшизата со договор од 4,4 милијарди долари во 2017 година. Некогаш тешкиот и европски насочен спорт одгледа нова генерација обожаватели со стриминг-услуги до потрошувачите и популарната серија на Нетфликс (Netflix) под наслов „Возење за преживување“ (Drive to Survive).
Сезоната во 2022 година во просек имаше 1,21 милион гледачи по трка, што е за 28 проценти повеќе од рекордот поставен претходната година, според ЕСПН (ESPN). „Блумберг“ минатиот месец објави дека државниот фонд на Саудиска Арабија размислува за обид да ја додаде Ф1 во растечкото портфолио на спортски инвестиции со вредност од над 20 милијарди долари, иако потенцијалниот договор пропадна во раните фази, бидејќи „Либерти медиа“ не беше заинтересирана за продажба.
Ривалот на „Форд“, „Џенерал моторс“ (General Motors), исто така, се обидува да влезе во Ф1 во партнерство со Мајкл Андрети, синот на легендарниот возач Марио Андрети. Управното тело на спортот во средата отвори процес за аплицирање за потенцијалните тимови, неколку недели откако претседателот на ФИА, Мохамед Бен Сулејем, рече дека ја поздравува веста за врската на Андрети со „Кадилак“ од „Џенерал моторс“ и со нетрпение очекува понатамошна дискусија. „Форд“ и Ф1 закажаа брифинг за 9.45 часот по њујоршко време на интернет-страницата на одделот „Форд перформанс“, за да споделат повеќе детали за враќањето на производителот на автомобили.
