„Порше“, „Ауди“, БМВ ја губат трката во Кина - домашните брендови ја менуваат играта

На почетокот на јуни „Ауди“ (Audi) го претстави својот најнов автомобил, „нуволари“ (Nuvolari), наречен по Тацио Нуволари, италијанскиот тркач од триесеттите години на минатиот век. На претставувањето во Монако, „Ауди“ истакна дека хибридот со мотор V8 од 1.000 коњски сили ќе дели хардверски компоненти со својот сестрински бренд „Ламборгини“ (Lamborghini) во рамките на „Фолксваген“ (Volkswagen AG). Проценета цена: 686.000 долари.

„Ауди“ не очекува „нуволари“ значително да помогне во продажбата, која ослабе поради царините и неубедливата понуда на електрични возила, што не успеа да разбуди поголем интерес кај купувачите. Всушност, „Ауди“ очекува малку луѓе да го купат овој автомобил, поради што ќе произведе само 499 примероци. Поентата е луѓето да помислат дека „нуволари“ е „кул“ и тој впечаток да се пренесе на целата палета на „Ауди“. Генералниот директор Герно Дулнер го кажа токму тоа на настанот пред Големата награда на Монако: автомобилот може да го „подигне брендот таму каде што навистина му е местото“.

Bloomberg 

„Нувиолари“ е она што се нарекува ореолски (halo) автомобил: уникатно возило направено да привлече внимание и да предизвика возбуда околу еден бренд. Некогаш било вообичаен начин компаниите да го прошират својот углед, но во последните години се појавуваат значително помалку. Претходниот таков модел на „Ауди“ беше Р8 (R8) од 158.600 долари, претставен во 2006 година, познат по тоа што го возеше Тони Старк во филмот „Железен човек“. Компанијата престана да го произведува во 2024 година. „Порше“ нема претставено ореолски автомобил уште од моделот „918 спајдер“ (918 Spyder) од 845.000 долари од 2013 година; производството траеше само две години. Последниот таков модел на БМВ беше и8 (i8), со почетна цена од 136.625 долари, премиерно прикажан во 2013 година, додека испораките завршија во 2020 година.

Кинески алтернативи

Кинеските купувачи денес имаат домашни алтернативи што можат да се натпреваруваат по перформанси и цена, иако постојат и други причини поради кои производителите на автомобили помалку сакаат да вложуваат во вакви проекти. Тие се соочуваат со намалени профитни маржи поради геополитичката нестабилност и економското закрепнување во форма на буквата К. Ореолските автомобилите некогаш служеле за да ги привлечат луѓето во салоните, бидејќи тоа било единственото место каде што можеле да го видат возилото во живо, но интернетот одамна го промени тоа. Тука е и веќе доста тесната дефиниција за она што прави вистински ореолски автомобил: не е доволно само да биде скап и врвен спортски автомобил (суперавтомобил) или обичен спортски модел со спојлер. Ваквиот тип на автомобил мора да има наследство, впечатлив дизајн и напредно инженерство произлезено од автомобилскиот спорт, како што е Формула 1. И за разлика од „мерцедес АМГ уан“ (Mercedes-AMG One), суперавтомобилот најавен во 2016 година треба да биде хомологиран за возење на јавни патишта.

BMW i3 | Krisztian Bocsi/Bloomberg

Потребна му е и онаа тешко опишлива посебност: способноста да предизвика силна емоционална реакција, како „астон мартин ДБ5“ (Aston Martin DB5) на Џејмс Бонд или „форд мустанг“ (Ford Mustang), кој Стив Меквин го возеше во филмот „Булит“ (Bullitt). „Морам да почувствувам поврзаност со него“, вели Скот Канингам, основач на автомобилскиот клуб ХГ (Hangar Group) во Вест Палм Бич и Ривиера Бич на Флорида и долгогодишен колекционер на „Порше“ (Porsche) и „Ферари“ (Ferrari). „Убаво е да се каже: ‘Леле, тој автомобил чини толку и толку’, но тоа трае само до одредена точка ако кај вас не предизвика посебно чувство.“

Вистинскиот убиец на ореолските автомобили, сепак, беше електрификацијата. Во 2015 година режимот на високи перформанси наречен „лудикрус“ (Ludicrous Mode) овозможи „тесла модел с“ (Tesla Model S) да забрза од 0 до 100 километри на час за 2,8 секунди. Тоа промени сè. Одеднаш „ламборгини авентадор“ (Lamborghini Aventador) од 460.000 долари (исто забрзување за три секунди) можеше да биде поразен во спринтерска трка од семејна лимузина за секојдневна употреба. „Брзината и перформансите станаа сеприсутни благодарение на електрификацијата“, вели Ентони Салерно, виш потпретседател за комерцијална стратегија во аналитичката компанија ЏДП (J.D. Power).

„Шаоми СУ7 ултра“ може да забрза од 0 до 100 километри на час за помалку од две секунди| Bloomberg

Странските производители на автомобили многу инвестираа во Кина, градејќи фабрики и склучувајќи партнерства за да одговорат на кинеската страст кон електричните возила, надевајќи се дека и остатокот од светот ќе го следи истиот тренд. Но стратегијата не успеа; купувачите во САД и понатаму пружаат отпор кон електричните возила, додека кинеските купувачи избираат поевтини, побрзи и технолошки понапредни модели од домашните брендови. „Кина презема централна улога на глобално ниво“, вели Мајкал Дан, извршен директор на консултантската фирма ДИ (Dunne Insights LLC). „Веќе го совлада секторот на батерии и доминира со него, а на глобалните брендови сега гледа од нов агол и сфати дека тие не се толку посебни.“

„Порше“ е особено тешко погоден: продажбата во Кина во текот на 2025 година падна за 26 отсто во однос на претходната година, според податоците на „Блумберг интелиџенс“ и Кинескиот центар за автомобилска технологија и истражувања. Глобално гледано, тоа беше најлошата продажна година на компанијата од 2009 година. „Порше“ тивко се откажа од плановите за нов електричен ореолски модел, што можеби ја одразува неговата неможност да ги заинтересира најважните купувачи за автомобил што се полни на приклучок, според зборовите на три лица запознаени со ситуацијата, кои не сакале да бидат именувани за да не ја загрозат можноста за купување други ексклузивни возила. „На ’Порше’ му е потребен ореолски автомобил“, вели колекционерот на суперавтомобили Крис Синг. „Идеално би било да биде целосно аналоген. Тие знаат дека нивните купувачи повеќе го сакаат тоа.“ (Компанијата одби да ја објасни промената на стратегијата.)

„Порше 918 спајдер“ дебитираше во 2013 година. Продажбата на компанијата во Кина е во опаѓање.| Porsche

Во Кина лимузината „маекстро с800“ (Maextro S800) на компанијата „Хуавеј“ (Huawei Technologies) стана толку популарна што се продава подобро од „порше панамера“ (Porsche Panamera), „мерцедес с калса“ (Mercedes S-Class) и сите други автомобили со цена над 100.000 долари. „Макестро“ започнува од 708.000 јуани (104.000 долари), додека „панамера“ започнува од 1,1 милион јуани. Покрај напредните системи за помош на возачот, копчињата за приспособување на седиштата се изработени од кристал. Автомобилот исто така има контролна табла со три екрани и врати што се отвораат со притискање на копче. „СУ7 ултра“ (SU7 Ultra) на „Шаоми“ (Xiaomi) со четири врати развива околу 1.500 коњски сили и забрзува од 0 до 62 милји на час за помалку од две секунди, што се перформанси на ниво на „Ферари“ или „Ламборгини“, но по релативно скромна цена од 529.900 јуани. Луксузниот бренд „Денза“ (Denza) на компанијата БЈД неодамна го претстави својот кабриолет зед (Z), кој развива 1.000 коњски сили, исто така забрзува до 62 милји на час за околу две секунди и се очекува да чини помалку од „порше 911“.

Bloomberg

Ништо од ова не е добра вест за европските и американските производители на автомобили, кои се обидуваат да го зголемат профитот преку зголемување на производството на нивните најпрофитабилни модели и подобрување на ефикасноста со споделување делови меѓу различни модели. Електричните возила особено се погодни за таков начин на производство; ореолските автомобили не се. „Дури и практикант во канцеларија со ексел-табела би можел да го види тоа“, вели Кевин Тјанан, директор за истражување во инвестициската автомобилска фирма „Пресидио“ (Presidio Group). „Математиката за ваков тип возила едноставно нема смисла.“

Bloomberg 

Сепак, производителите на автомобили се познати по тоа што многу неодредено зборуваат за идните модели, па меѓу нив можеби сепак има нови ореолски автомобили. БМВ во мај го претстави концептот „вижн БМВ алпина“ (Vision BMW Alpina). „Алпина“, компанија специјализирана за подобрување на перформансите на автомобили со традиција долга 60 години, оваа година беше интегрирана како премиум подбренд. Новиот оддел моментално не произведува ниту еден автомобил, иако раководителите на БМВ потврдија дека се подготвуваат и други модели што ќе го „обликуваат брендот“, без да дадат дополнителни детали.

Извршниот директор на „Порше“, Мајкл Литерс, изјави дека би можел да воведе модели „позиционирани над моделот 911“, додека компанијата се оддалечува од ултралуксузните автомобили по продажбата на својот удел во „Бугати“. Дури и „Ауди“ успеа да го задржи претставувањето на „нуволари“ во тајност, одлучувајќи пред премиерата да не објави ниту една најавна фотографија ниту визуализација.

Можеби се менува и самото наше сфаќање за ореолските автомобили: програмата Митос на „Мерцедес“ им овозможува на група од 30 приватни клиенти да купат „митос“, посебна верзија на моделот „мерцедес цле“ (Mercedes CLE), а потоа самите да го состават неговиот мотор V8. Целта е да се создаде поемотивно искуство од она што купувачите го добиваат само со возење, изјави Мајкл Шиебе, шеф на одделот за перформанси на „Мерцедес“, во поткаст на „Блумберг“. „Тоа е многу редок автомобил и можете малку да се пофалите пред соседот“, рече тој. „Ја отворате хаубата, а вашето име стои на моторот.“

Проценетата доплата за таа можност? „Само“ 50.000 долари.