Моделот „Пепси“ на Ролекс експлодира на секундарниот пазар по најавата за повлекување на моделот

Еден од најпопуларните модели на „Ролекс“ (Rolex), челичниот ГМТ-МАСТЕР II со црвено-синиот „Пепси“ ротирачки оквир бележи силен раст на цените на секундарниот пазар во пресрет на еден од клучните годишни настани во индустријата на часовници, поради шпекулациите дека моделот е повлечен од производство.

„Вочис енд Вондерс“ (Watches and Wonders), саем што во април во Женева ќе собере колекционери од целиот свет и повеќе од 60 брендови, оваа година е во фокусот токму поради прашањето што е тоа што ќе претстави „Ролекс“. Шпекулациите за прочуениот модел „Пепси“ се засилени, а барањата за купување се зголемиле за повеќе од 500 отсто во споредба со просекот за 2025 година веќе во првата недела од март, според податоците на платформата „Кроно24“ (Chrono24).

Bloomberg Subdial Watch Index, кој ги следи цените на 50-те најтргувани модели според вредноста на трансакциите, покажува раст на цената на моделот „Пепси“ од околу 3.000 долари од почетокот на годината. Во исто време, бројот на активни огласи за овој часовник на платформата е намален за околу една четвртина.

Bloomberg

Оваа реакција покажува до кој степен перцепцијата за недостиг, било реален или шпекулативен - влијае врз цените на секундарниот пазар на часовници. Како еден од најликвидните и највлијателни модели на „Ролекс“, ГМТ-МАСТЕР II „Пепси“ има значајна улога во формирањето на вкупниот пазарен сентимент. Наглиот раст на побарувачката и намалувањето на понудата укажуваат на пазар кој и понатаму е силно воден од шпекулации за повлекување на моделот, при што цените сè повеќе се оддалечуваат од малопродажниот пазар и се темелат на очекувањата за идната достапност.

„Изгледа дека продавачите ги задржуваат залихите очекувајќи раст на цените, или достапните примероци брзо се купуваат на пазарот“, изјави Балаж Ференци, директор за ангажман на брендот во „Кроно24“ (Chrono24).

Според пишувањето на „Вотч Про“ (WatchPro), некои овластени дистрибутери потврдиле дека повеќе нема да има испораки на моделот „Пепси“. „Ролекс“ не сакаше да ги коментира овие наводи.

Шпекулациите околу моделот „Пепси“ дополнително го поттикнуваат интересот за претходните верзии, вклучително и „Коук“ ГМТ-МАСТЕР II, чие производство „Ролекс“ официјално го прекина во 2007 година. Моделот со црвено-црн ротирачки оквир беше заменет со линијата ГМТ-МАСТЕР II со керамички. Иако нови „Коук“ модели повеќе не се произведуваат, тие и натаму имаат силна побарувачка на пазарот на половни часовници.

„Забележуваме јасен прелевачки ефект кон претходниот модел, при што барањата за купување на почетокот на март речиси се удвоија во споредба со просекот за 2025 година“, наведува „Кроно24“.