Генерацијата зед не може да им се насити на малите „благодарам, бабо“ часовници

По повеќе од две децении во кои големите часовници доминираа на зглобовите, производителите на часовници се вртат кон помали дијаметри, бидејќи помладите потрошувачи - особено жените во дваесеттите и раните триесетти - ги прифаќаат таканаречените часовници „благодарам, бабо“ поради нивната разновидност, винтиџ привлечност и можноста за комбинирање со накит. Ова е еден од најбрзорастечките сегменти на пазарот на часовници.

Поп-културата и социјалните мрежи покажуваат дека и машки и женски познати личности носат мали часовници што некогаш се сметаа за застарени: актерот Тимоти Шаламе често носи тенок „картие пантер“ (Cartier Panthère) или мал „јагер лекултр“ (Jaeger-LeCoultre) од 34 милиметри. Бед Бани е виден со минијатурен модел „патек филип елипс“ (Patek Philippe Ellipsе). Серена Вилијамс минатата година за „Мет гала“ избра мал „одемар пиге ројал оук“ (Audemars Piguet Royal Oak), додека Хејли Бибер се одлучи за мал накит од истиот бренд.

Овие примери, заедно со желбата на купувачите за поразновидни часовници, ја забрзуваат промената на големината. Врвните брендови постепено ги намалуваат стандардните димензии на куќиштата од 42 милиметри и повеќе, на 38 или 36 милиметри, па дури и под 34 милиметри. Исто така, родовите поделби полека исчезнуваат додека се бришат границите не само во големините туку и во материјалите и боите.

„Нетрадиционалните колекционери на часовници гравитираат кон овие стилови“, вели Брин Волнер, 34-годишна основачка на платформата „Дајмпис“ (Dimepiece), посветена на жени и часовници. „Како што сè повеќе жени влегуваат во светот на часовниците и го купуваат својот прв модел, сакаат нешто помало, поразновидно и полесно за носење, нешто што оди со сè, без премногу истакнување.“

 Hermès Cape Cod има долг кожен ремен, кој може да се завитка околу зглобот повеќепати Hermes

Малите часовници се вклопуваат во трендот на тивок луксуз, но уште еден клучен фактор за нивната популарност е можноста за комбинирање „со белезици што жените веќе ги имаат во својот накит“, вели Мелани Чад, претседателка на малопродажба на компанијата „1916“ (1916 Co.), која поседува десетици продавници за накит и половни часовници во Америка.

Chopard Happy Sport (8.960 долари) е со скромни 30 милиметри и има дијаманти што „играат“ во бројчаникот Chopard

„Кога ќе ѝ покажеме на клиентка како нејзините белезици се совпаѓаат со мал часовник, нејзиниот израз на лицето веднаш се менува, бидејќи е стилизирана на начин што навистина ѝ одговара.“

Оваа желба на потрошувачите за разновидност и носливост се сведува на едно: колку е помало куќиштето, толку е поголема можноста за брендовите со долга традиција како „Ролекс“, „Картие“, „Пијаже“, „Диор“ и „Јегер-Лекултр“.

Rolex Oyster Perpetual 28 со куќиште и белезица од 18-каратно злато (цена околу 30.000 долари) Rolex

„Ролекс“ неодамна претстави два нови модела „ојстер перпетуал“ во големини од 28 и 34 милиметри на саемот „Часовници и чуда“ (Watches and Wonders) Женева, а посебен интерес предизвика моделот од 28 милиметри во 18-каратно жолто злато со зелен бројчаник.

Слично на тоа, „Картие“ оваа година претстави неколку нови мали часовници, вклучувајќи го овалниот модел „бењиоир“ со декорација „Клу де Париз“, како и неколку мали модели „танк“.

„Картие“ има долга историја на иновативни форми во помали димензии. Според директорот за имиџ, стил и наследство, Пјер Раинеро, денешниот „бењиоир“ (Baignoire) потекнува од 1958 година, но овалната форма е присутна уште од почетокот на 20 век. Таа доследност на формата е клучна за успехот на овој модел.

Cartier Baignoire со дијаманти (65.500 долари) Cartier

„Новиот модел носи декорација ’Клу де Париз’ преку целото куќиште, па дури и на бројчаникот“, вели тој, „и го покажува пристапот на ’Картие’ како јувелир: да се проучи предметот како накит, а потоа да му се даде креативна слобода.“

Многу брендови всушност ги модернизираат винтиџ моделите преку мали промени - од декоративни завршни обработки и детали до поставување скапоцени камења на куќиштата или бројчаниците, како и користење двобојни материјали како челик и жолто злато, кои убаво се вклопуваат со постојните колекции накит. Формите како квадрат, правоаголник, овал, како и асиметрични мотиви, дополнително го освежуваат изгледот.

Трендот на помали часовници е присутен во сите ценовни категории. На врвот на пазарот, во вредности од неколку десетици илјади долари, доминираат богато украсени мини-часовници инспирирани од коктел-часовници од 1950-тите. Меѓутоа, постојат многу опции и во ранг од неколку илјади долари, па дури и во ценовен опсег од неколку стотици долари, како новите модели „ситизен екодрајв фио“ (Citizen Eco-Drive Fio) и „фредерик констан маншет“ (Frederique Constant Manchette) со тиркизен бројчаник.

Frederique Constant Classics Manchette (2.795 долари) има златна белезица и тиркизен бројчаник

Волнер вели дека помладите жени ги наоѓаат овие часовници во продавници за половни производи или дури во старите кутии за накит на нивните баби, а потоа ги модернизираат со сопствен стил.

„Она што некогаш изгледаше застарено сега новата генерација го прифаќа. Сè е прашање на стилизирање“, вели таа. „Можеби го носат со улична мода или фармерки и маица, но тоа одеднаш изгледа кул. Ти го носиш часовникот - не те носи тој тебе.“

Белиот керамички часовник Chanel J12 сега достапен во мини-големина од 28 милиметри (5.450 долари)  Les Ateliers

Таа додава дека помалите модели на престижни брендови често се потценети на секундарниот пазар, па паметните купувачи можат да најдат одлични понуди.

Јуџин Тутуников, извршен директор на компанијата „Свисвоч експо“ (SwissWatchExpo), се согласува: „Гледаме дека побарувачката за часовници под 30 милиметри нагло расте, водена од носталгијата за гламурот од 1980-тите и 1990-тите, како и желбата на жените за часовник што лесно се комбинира со други парчиња накит“, вели тој. „Излегува дека баба цело време имала врвен вкус.“