Дали „Гугл Фитбит Ер“ од 99 долари е конкуренција на „Вуп“ и што прави за вашето здравје?

Многумина со години не излегле од дома без паметен часовник на раката. Тие станаа толку слични на телефоните што преку нив можевте да пишувате мејлови, да плаќате сметки и да броите чекори.

Но, како што телефоните нè бомбардираат со нотификации, многумина почнаа да се повлекуваат и да се дистанцираат од интернетот за малку да одморат. Бидејќи кога во ист момент ѕвонат телефонот, часовникот, таблетот и лаптопот, многумина станаа презаситени.

Продажбата на фитнес уреди без екран пораснала за 88 отсто меѓу 2024 и 2025 година. Тоа е знак дека нешто се менува во начинот на кој размислуваме за здравјето и технологијата. Тоа е нешто што многумина не ни знаеле дека го бараат: уред што не ги прекинува мислите, туку го следи телото.

Затоа пазарот сега би можел да направи чекор назад и да се врати кон корените, делумно благодарение на брендот што беше присутен уште во самите почетоци на носливите фитнес уреди.

„Гугл“ овој месец го претстави „Фитбит Ер“ — уред за кој на прв поглед би рекле дека е директна конкуренција на „Вуп“: без екран, без нотификации, само сензори што го следат вашето тело. Сепак, цената значително се разликува — уредот на „Гугл“ чини 99 долари.

Што е всушност Фитбит Ер?

„Гугл“ го претстави „Фитбит Ер“ — уред тежок 5,2 грама, без екран, со батерија што трае една недела и ВИ анализи за здравјето. Цената е поповолна од „Епл“ или „Вуп“, но сепак поинаков?

Гугл Фит Бит ер во корал боја може да се резервира во Гугл продавница/Google Store

Kada gledate funkcije, Fitbit Air nije mnogo različit od prethodnih verzija - može se posmatrati kao Fitbit Charge 6 kome su uklonili ekran. Gotovo svaka funkcija ostaje, ali bez ekrana.

Вуп наспроти Гугл

Главниот извршен директор на „Вуп“, Вил Ахмед, еднаш изјави: „Ако има екран, тогаш е часовник. А ако имате еден часовник, не можете да носите и втор.“

Ахмед тврди дека уредот подобро ги следи сигналите што ги испраќа телото без екран, дека може да се носи заедно со традиционален часовник, како и дека уредот на „Вуп“ е фокусиран на долгорочно собирање податоци, а не на моментални информации.

„Вуп“ постои со години како омилен уред на луѓето што сериозно се посветени на опоравувањето и сонот. Го носат оние што трчаат ултрамаратони, што го следат ХРВ наутро пред кафе и што ја знаат разликата меѓу РЕМ сон и лесен сон.

Нивниот уред 24 часа дневно ги следи сонот, напорот, стресот и здравјето на срцето, но „Вуп“ има цена — и се плаќа месечно, како претплата за „Нетфликс“. Исто така, бара одредено ниво на посветеност што не им одговара на сите.

Вредноста на компанијата „Вуп“ сега се проценува на 10,1 милијарди долари/Whoop Press

Но, дали „Гугл“ навистина само го копира „Вуп“? Всушност, оригиналниот „Фитбит“ се појави во 2009 година и тоа беше мал клип што се прикачуваше на облека и броеше чекори. Тоа се случи три години пред воопшто да биде основан „Вуп“, а „Гугл“ ја заврши аквизицијата на „Фитбит“ во 2021 година.

„Фитбит Ер“ влегува во слична приказна, но со екосистемот на „Гугл“ зад себе и со пониска цена. Наједноставната претплата на „Вуп“ чини 199 долари за 12 месеци користење. Дури и во споредба со најпопуларниот пакет на „Вуп“, „Фитбит Ер“ со премиум претплата заштедува околу 626 долари во период од пет години.

„Фитбит Ер“ чини 99 долари еднократно и без задолжителна претплата. „Гугл“ го рекламира уредот како лесен, со батерија што трае до седум дена и со можности за следење тренинзи, сон, отчукувања на срцето, нивото на кислород во крвта и метрики за опоравување. Наместо директна интеракција со уредот, корисниците главно го користат „Гугл Хелт“.

 

Долговечноста и сонот

Една од најголемите промени во начинот на кој современата култура за долговечност размислува за здравјето е рехабилитацијата на сонот. Веќе не е прашање само колку спиете, туку и каков е квалитетот на сонот.

Сон — време кога и вашиот нослив уред треба да „одмара“ на ноќната масичка?/Depositphotos

Големата промена е интеграцијата: уредот сега може да комуницира со паметно осветлување, прочистувачи на воздух и термостати, така што вашето опкружување автоматски се приспособува на распоредот на спиење и циркадниот ритам.

Со „Фитбит Ер“, „Гугл“ најави и дека апликацијата „Фитбит“ ќе биде заменета со новата апликација „Гугл Хелт“, а ВИ тренерот ќе биде достапен за сите премиум корисници и ќе предлага тренинзи врз основа на времето, опоравувањето и целите.

„Гугл“ најави и поддршка за податоци од „Епл Воч“, „Гармин“, „Вуп“ и „Оура“ подоцна оваа година, што може да значи дека компанијата не се обидува само да продаде уред, туку да стане доминантна платформа за вашето здравје.

Гугл Фитбит во боја на лаванда/Google Store

„Епл Воч“ ќе ви каже дека сте поминале 10.000 чекори, а „Вуп“ ќе ви каже дека сте спиеле лошо, дека опоравувањето ви е 34 отсто и дека можеби не е најдобар ден за интензивен тренинг. „Фитбит Ер“ се обидува да го направи истото — само во систем што веќе добро го познавате. 

Што всушност мерат овие уреди?

Сè повеќе луѓе почнуваат да се заморуваат од паметните часовници што се обидуваат да бидат сè: телефон, ГПС, планер, апликација за медитација и потсетник за вода. Во теорија тоа звучи корисно, но во пракса може да ве измори.

„Лонџевити“ заедницата, онаа што чита студии за автофагија и напамет знае што значи VO2 max, одамна знае што се уреди што мерат длабински податоци. Не само број на чекори, туку и квалитет на сон, стрес, ХРВ и температура на кожата во текот на ноќта.

Прстенот „Оура“ предничи во следењето долгорочни трендови на спиењето./Oura

„Фитбит Ер“ континуирано ги мери срцевиот ритам, ХРВ, температурата на кожата, заситеноста на крвта со кислород, фазите на сон, активноста и маркерите на стрес. ХРВ, (варијабилноста на срцевиот ритам), стана една од најважните метрики во заедницата на „долговечноста“. Не е важно колку брзо чука срцето, туку колку е променлив ритамот меѓу отчукувањата. Висок ХРВ значи дека нервниот систем е флексибилен и одморен. Низок ХРВ значи дека сте под стрес, преморени или дека нешто се случува во телото пред самите да го почувствувате тоа.

Што се однесува до прстенот „Оура“, тој предничи во следењето долгорочни трендови на спиењето и ХРВ во дискретна форма; „Вуп“ и понатаму е референтна точка за спортисти на кои им се потребни аналитики на ниво на професионални атлетичари. „Фитбит Ер“, според некои оценки, се позиционира меѓу нив - доволно сериозен за да дава значајни податоци, а доволно достапен за да може да го носат пошироки маси.

Кој ќе победи? 

„Фитбит Ер“ веројатно нема да го загрози „Вуп“ кај сериозните атлетичари, ниту одеднаш ќе ги извлече луѓето од екосистемот на „Епл“, но можеби и не мора. „Гугл“ би требало да ги привлече оние помеѓу - луѓе што не се врвни спортисти, но не се ниту рамнодушни кон сопственото тело и сакаат да вложат во своето здравје.

Пазарот се менува: конкуренцијата се засилува, цените паѓаат, а уредите стануваат подостапни за поширок круг луѓе. Сепак, зад тоа стои промена во начинот на кој размислуваме: сакаме помалку нотификации за надворешниот свет, а повеќе знаење за сопственото тело.