Дански бренд на луксузни часовници се враќа на пазарот по 250 години

„Урбан Јургенсен“ (Urban Jürgensen), скандинавски бренд на часовници со повеќе од 250 години историја, повторно заживеа благодарение на партнерството меѓу американско финансиско семејство и независниот часовничар Кари Вутилаинен. Првите три модели беа официјално претставени неодамна во Лос Анџелес, како резултат на три и полгодишно истражување и развој. Цените се движат од околу 125.000 до над 400.000 долари, а брендот се промовира под слоганот „Добро потрошено време“ (Time well spent).

„Ги спојуваме врвното швајцарско часовничарство и извонредната изработка со скандинавското наследство на брендот, за луѓето да можат да го ценат тоа на модерен начин“, вели Алекс Розенфилд, кој е сопственик на брендот заедно со својот татко Анди и со Кари Вутилаинен. Алекс има искуство во маркетингот за мода и убавина, додека Анди е филантроп и претседател на финансиската компанија ГП (Guggenheim Partners LLC).

Вутилаинен и Алекс Розенфилд Извор: Urban Jürgensen

Трите модели претставуваат обнова на брендот што потекнува од 1773 година, кога данскиот часовничар Јирген Јургенсен започнал да ги изработува своите први џебни часовници, далеку од срцето на часовничарската индустрија во Швајцарија и Франција. Подоцна водството го презел неговиот син Урбан. Како мајстор на механиката и занаетчиството, Урбан изработувал некои од најдобрите џебни часовници на своето време. Компанијата се пренесувала од генерација на генерација сè до почетокот на 1900-тите, кога била продадена. Во годините што следувале, со чести промени на сопственоста, брендот постепено ја губел популарноста.

Вториот процут брендот го доживеал во 1979 година, кога швајцарскиот колекционер на часовници Петер Баумбергер ја купил компанијата и го ангажирал британскиот часовничар Дерек Прат заедно да изработуваат прекрасни џебни часовници – некои со овална форма (вклучувајќи го познатиот „прат овал“).

Во 1996 година Баумбергер го ангажирал култниот фински часовничар Кари Вутилаинен да развие нови механизми за рачни часовници. Тие кружни часовници имале естетски карактеристики како степенест прстен и мали секундарни бројчаници, потпирајќи се на данскиот минималистички и функционален дизајн. Вутилаинен вели дека токму тогаш ја усовршил својата техника на завршна обработка – специфични методи што денес го дефинираат неговиот стил. Денес е еден од најценетите независни часовничари, познат по рачно изработени бројчаници, сложени завршни обработки и хоролошки компликации. Сепак, Баумбергер починал во 2011 година, што довело до нови сопственици и пад на интересот.

 

УЈ-3 со вечен календар Извор: Urban Jürgensen

Во 2021 година, колекционерот на часовници Анди Розенфилд го купил брендот „Урбан Јургенсен“ (со мала група инвеститори), со цел да го внесе во трета златна доба. Веќе сопственик на неколку часовници од Вутилаинен, го вклучил и самиот Кари, како и својот син Алекс, заедно да бидат извршни директори. Додека семејството Розенфилд поседува 85 отсто од брендот, Вутилаинен (и членови на неговото семејство и пријатели) ги поседуваат преостанатите 15 отсто.

Заедно се решени да му го вратат сјајот на „Урбан Јургенсен“ – но со модерен пристап. „Нашата цел е да го пренесеме данскиот дух и да создадеме бренд што зрачи со радост и добредојде. Кари ги дизајнираше часовниците така што ќе бидат привлечни и за мажи и за жени“, вели постариот Розенфилд.

„Создадовме нова форма на куќиште и ушици, за да одговараат и на помали зглобови“. Куќиштата се со дијаметар од 39 и 39,5 милиметри, со скратени ушици за подобро да „легнат“ на раката.

УЈ-2 часовник што прикажува само време, со децентрализиран секундарен бројчаник Извор: Urban Jürgensen

Новите часовници на „Урбан Јургенсен“ се изработуваат во Швајцарија. Ги движат механизми дизајнирани од Вутилаинен, а се произведуваат во работилниците на „Урбан Јургенсен“ во градот Биел. Два од трите модели се базирани на постоен калибар на Вутилаинен, кој е приспособен. Секој часовник е изработен во ограничени количества.

Моделот УЈ-1 (UJ-1), на пример, се изработува во лимитирана серија од само 75 парчиња. Се нарекува и култен модел, кој ја слави 250-годишнината на брендот. Има куќиште од 39,5 милиметри и сложен златен механизам. Часовникот е инспириран од моделот „прат овал“ (Pratt Oval), со детали како рачна обработка, асиметричен минутен прстен и златен секундарен бројчаник. Малопродажната цена изнесува 368.000 швајцарски франци (околу 450.000 долари), а се изработува во розово злато или платина, со рачно обработен бројчаник во сребрена или сива боја. Ќе бидат понудени три комбинации, со по 25 примероци од секоја.

 

УЈ-1, часовник што ја слави 250-годишнината од брендот Извор: Urban Jürgensen

Планирано е и од другите два модела да се изработат по 75 парчиња. Моделот УЈ-2 (105.000 франци) е елегантен часовник со приказ само на времето. Моделот УЈ-3, развиен во соработка со познатиот часовничар Андреас Стрелер, има вечен календар, со моментален скок на полноќ и прецизност на приказот на месечевите мени со една грешка на секои 14.000 години. Неговата цена е 168.000 франци.

Брендот планира во првата година да произведе помалку од сто часовници, а потоа да ја удвои таа бројка следната година. За разлика од брендот Вутилаинен, кој годишно произведува околу 60 часовници, Розенфилд вели дека „Урбан Јургенсен“ планира постепен раст, со фокус на развој на нови компликации.

Во моментов часовниците се достапни исклучиво преку онлајн продажба.

„Оваа колекција е омаж на Урбан Јургенсен и неговото уникатно и извонредно наследство. Таа се темели на сè што нè дефинира: прецизност, уметност и длабоко почитување кон вредноста на времето“, вели Вутилаинен. „Сакаме брендот да остане редок. Иако сакаме раст, не смееме да растеме пребрзо. Сакаме да продолжиме да развиваме најсофистицирани механизми и да изработуваме часовници со душа“.