„Диор“ ја вложува целата надеж во Џонатан Андерсон, додека ЛВМХ бара нов раст

„Кристијан Диор“ во Париз ја претстави првата колекција на новиот уметнички директор Џонатан Андерсон, со елегантна машка облека.

Деби-претставувањето на дизајнерот од Северна Ирска претставува важен тест за вториот по големина моден бренд во рамките на ЛВМХ, кој во последно време се соочува со намалена побарувачка. Според процените на „Ејч-ес-би-си“ (HSBC), „Диор“ минатата година најверојатно учествувал со околу 14 отсто во профитот на француската луксузна групација, веднаш зад многу поголемиот „Луј Витон“.

Новата колекција прикажа млади модели во пругасти кошули, волнени пелерини, фракови и пеперутка-вратоврски. Некои носеа чанти украсени со реси, додека други ги носеа популарните бук-тоут чанти  на „Диор“ со наслови на книжевни класици. Модната писта одеше низ реконструиран ентериер на дом, со сиви тапети, а ревијата беше отворена со песната „State Trooper“ од Брус Спрингстин.

„Ова без сомнение беше најочекуваната машка ревија на сезоната“, изјави Сајмон Лонгланд, директор за модна набавка во „Хародс“. Според него, дизајнот на Андерсон се одликува со „рафинираност“.

Бернард Арно, извршен директор и главен акционер на ЛВМХ, седеше во првиот ред, покрај поп-пејачката Ријана. Меѓу другите ВИП-гости беа и Роџер Федерер и Даниел Крејг, како и дизајнерот на машката колекција на „Луј Витон“ – Фарел Вилијамс.

Влогот за првата женска ревија на Андерсон, закажана за есен, ќе биде уште поголем, имајќи предвид дека женските колекции се комерцијално многу поважни од машките.

Иако ЛВМХ не објавува финансиски резултати поединечно за брендовите, „Ејч-ес-би-си“ проценува дека „Кристијан Диор кутур“ минатата година остварил продажба од околу 8,71 милијарди евра и добивка пред камати и даноци од 2,74 милијарди евра.

Досега „Диор“ имаше двајца креативни директори – Марија Грација Кјури ја водеше женската и линијата за висока мода, додека Ким Џонс беше задолжен за машката мода. Одлуката на „Диор“ да ги обедини сите линии под водство на Андерсон укажува на желбата за појасен и покохерентен имиџ на брендот.

Ова е наедно и големо обложување на поранешниот дизајнер на „Лоеве“ (Loewe), кој од шпанскиот производител на кожени производи – исто така во сопственост на ЛВМХ – создаде посакуван и модерен бренд, бележејќи силен раст на продажбата во текот на повеќе од една деценија на чело на модната куќа.

Ќерката на Арно, Делфине (50), веќе повеќе од две години е извршна директорка на „Диор“.

Пошироко гледано, пазарот на луксузни производи сè уште се бори со период на слаб раст, со намалена побарувачка на клучните пазари како Кина и САД. Акциите на ЛВМХ изгубиле речиси 30 отсто од вредноста од почетокот на годината.