Луксузниот пазар повторно ќе има раст во 2026 година, проценува „Бејн“

Пазарот на лични луксузни производи би требало да се врати на раст во 2026 година, по две години стагнација, оценува една од најголемите светски консултантски компании „Бејн“ (Bain & Co.).

Продажбата на луксузни производи, вклучувајќи накит, кожени чанти, чевли и конфекциска мода, веројатно ќе расте меѓу три и пет отсто следната година, пресметано по константни девизни курсеви, проценува „Бејн“ во својот извештај за состојбата со побарувачката за луксуз.

Во моментов „Бејн“ очекува пазарот да остане приближно стабилен годинава, исто како и во 2024 година, изјави партнерката Клаудија Дарпицио во интервју за „Блумберг“. Консултантската група во јуни годинава првично предвидуваше пад на побарувачката за луксуз и до пет отсто.

Оттогаш, назнаките за подобрување кај луксузните групации како ЛВМХ (LVMH), „Ришемон“ (Richemont) и „Бербери“ (Burberry Group Plc) донесоа одреден оптимизам дека индустријата можеби го достигнала дното. Падот делумно беше самонаметнат, бидејќи производителите на луксузни производи премногу ги зголемија цените во стратегиски обид да ги направат брендовите поексклузивни, додаде Дарпицио.

„Брендовите сега се во фаза на ресетирање и настојуваат да внесат поголема креативност преку ангажирање нови дизајнери“, рече таа. „Исто така тие ја преиспитуваат ценовната структура, воведувајќи нови производи на пониско ценовно ниво.“

Кина, клучен пазар, би требало да забележи забрзување на растот во првиот квартал од следната година, со поддршка на поповолна споредбена база, додаде таа. Економскиот пад во Кина, предизвикан од кризата со недвижности и високата невработеност кај младите, негативно влијаеше врз потрошувачката на луксузни производи.

„Иако гледаме одредено подобрување на побарувачката кај богатите купувачи во Кина, пазарот останува предизвик“, рече Дарпицио. „Покрај тоа, расте конкуренцијата од локалните играчи што им конкурираат на европските брендови.“

„Бејн“ не очекува брзо враќање на двоцифрени или на високи едноцифрени стапки на раст во Кина, какви што беа во претходните две децении, додаде таа.

Дарпицио очекува кожените производи да постигнат подобри резултати следната година, по отпорноста што ја покажа продажбата на накит годинава.

„Брендовите на накит доста добро се држеа во контролирањето на зголемувањето на цените, а потрошувачите ги доживуваат како поквалитетна и повредна куповна опција во споредба со чантите“, објасни таа.

За закрепнувањето на кожените производи треба да придонесат новите креации по неодамнешното именување нови креативни директори во брендови како „Шанел“ (Chanel), „Гучи“ (Gucci), кој е дел од „Керинг“ (Kering SA), и „Кристијан Диор“ (Christian Dior Couture), кој му припаѓа на ЛВМХ.

Особено „Ришемон“ годинава профитираше од силната побарувачка за накит преку своите брендови „Картие“ (Cartier) и „Ван Клиф и Арпелс“ (Van Cleef & Arpels). Иако ЛВМХ поседува брендирани продавници за накит, како „Тифани“ (Tiffany & Co.) и „Булгари“ (Bulgari), францускиот конгломерат е повеќе изложен на категоријата чанти преку брендови како „Луј Витон“ (Louis Vuitton), „Селин“ (Celine) и „Фенди“ (Fendi).