Tикток шоп влегува во луксузниот малопродажен сегмент со чанти од 11.000 долари

Тикток влегува во светот на луксузната малопродажба, во рамките на настојувањата својот Тикток шоп да го претвори во дестинација за купување скапоцени чанти и часовници, кои можат да чинат илјадници долари.

Некогаш доживуван како виртуелна „продавница за еден долар“, Тикток шоп денес прикажува чанти од 11.000 долари на брендовите „Хермес“ и „Шанел“, како и ретки лимитирани патики создадени во соработка со куќи како „Луј Витон“ и „Најк“. Тикток шоп сега продава и часовници „ролекс“ и „картие“ – производи што платформата ги додаде навреме за Црн петок. Повеќето артикли се половни и доаѓаат од препродавачи, од кои многумина користат вештачка интелигенција за да ја верификуваат автентичноста на производите, надевајќи се дека огромниот глобален опсег на Тикток ќе донесе нови купувачи.

Појавата на луксузна стока на Тикток шоп ја покажува промената во амбициите за е‑трговија на компанијата, откако беше претставена во САД пред две години и споредувана со кинеските „фаст фешн“ (fast‑fashion) гиганти како „Тему“ и „Шејн“. Тикток шоп и понатаму е место каде што може да се најдат евтини производи со големи сезонски намалувања, но продорот во луксузот покажува дека заканата за забрана на Тикток во САД не ги намали значајно неговите онлајн продажни амбиции.

Ако на Тикток сѐ му оди според планот, можно е врвните луксузни брендови како „Шанел“, кои веќе ја користат платформата како силна маркетинг-алатка, еден ден директно да им продаваат на потрошувачите преку Тикток.

„Со оглед на претходната перцепција дека Тикток шоп е своевидна ‘продавница за еден долар’, ова е феноменално“, вели Видјут Сринивасан, извршен директор и коосновач на „Ентрупи“, кој обезбедува ВИ-технологија за автентикација на чанти и патики за луксузни продавачи на Тикток шоп. „Ни на ум не би ви дошло дека таа перцепција постоела пред само една и пол година.“

Тикток последниве години стави голем фокус на купувањето, агресивно инвестирајќи во ширење на Тикток шоп на меѓународни пазари, вклучувајќи ги Бразил, Јапонија, Мексико, Франција, Италија, Шпанија и многу други дестинации. Иако компанијата годинава ги намали внатрешните продажни цели за Тикток шоп во САД, и понатаму постои надеж дека ќе стане еден од највредните делови на американскиот бизнис. Според предлог‑спогодбата што би му овозможила на Тикток да продолжи со работа во САД, неговиот сектор за е-трговија би останал под контрола на кинескиот сопственик „Бајтденс“.

За њујоршкиот бутик за половни луксузни производи „Севентинт стрит“ (17th Street), кој се приклучи на Тикток шоп непосредно пред празниците минатата година, платформата стана еден од најголемите двигатели на онлајн продажбата и посетите во малопродажбата, вели Оливија Спердуто, директорка за социјални мрежи. Досега продале речиси 1.000 дизајнерски чанти преку Тикток, вклучувајќи ги бараните модели „хермес кели“ и „биркин“, кои чинат десетици илјади долари, како и модели на „Шанел“, „Луј Витон“ и „Баленсијага“.

Процените покажуваат дека Тикток сега носи една третина од профитот на компанијата, а продажбата преку платформата е „многу блиску“ до приходите од физичката продавница, вели Спердуто. Тикток наплатува осум проценти од секоја чанта што „Севентинт стрит“ ја продава преку апликацијата – трошок што со задоволство го прифаќаат поради обемот на продажба што го носи платформата.

Со оглед на тоа што продавачите на Тикток понекогаш се познати по продажба на евтини фалсификати – особено во категоријата на производи за убавина – растот на луксузната понуда ја зголеми побарувачката за компании што се занимаваат со автентикација на половни артикли. „Ентрупи“ е една од петте фирми што ги користат продавачите  како „Севентинт стрит“, кои Тикток ги поддржал, за да ги верификуваат скапите половни чанти, багаж, модни додатоци и обувки. (Часовниците, сепак, бараат сертифициран часовничар.)

Платформата исто така врши контрола за да го сузбие кршењето на правилата, вклучувајќи продажба на фалсификати. Во првата половина од годината биле одбиени 1,4 милион пријави на потенцијални продавачи што не ги исполниле стандардите, како и повеќе од 70 милиони производи пред да бидат поставени, според извештајот за безбедност на Тикток шоп. Дополнително, биле отстранети повеќе од 200.000 „забранети“ или ограничени производи по нивната објава.

„Ентрупи“, кој соработува со Тикток од 2023 година, продава уред со микроскопски објектив што се поставува преку камерата на телефонот како маска за ајфон. Продавачите потоа фотографираат логоа, етикети, метални делови и други фини детали. Компанијата со години ја тренирала вештачката интелигенција на огромна база на податоци и фотографии од автентични луксузни производи – како и најдобрите фалсификати што можела да ги пронајде.

По анализата на податоците и дополнителните информации внесени рачно, алгоритамот ја проценува автентичноста на производот. Правилата на Тикток бараат од продавачите да достават сертификат за автентичност од „Ентрупи“ или друга одобрена фирма во рок од 24 часа од купувањето, за да се спречи автоматско откажување на нарачката.

„Станува збор за создавање дополнителен слој на доверба“, вели Сринивасан. Тикток и „Ентрупи“ не открија конкретни податоци за продажбата на луксузни производи, но тврдат дека таа е во пораст.

Тикток ја лансира категоријата половен луксуз во Велика Британија минатата година, во партнерство со популарни британски продавачи на луксузна препродажба, а во САД ја отвори категоријата во 2023 година.

Николас Валдман, кој го води глобалното управување со Тикток шоп, изјави за „Блумберг“ дека важен дел од привлечноста на половниот луксуз е неговата улога во „циркуларната економија“ – модел што поттикнува повторна употреба поради растот на одржливоста и грижата за климатските промени.

Аналитичарите наведуваат дека генерацијата зед е клучен двигател на растот на пазарот за луксузна половна стока, што Тикток шоп го прави плодна почва. Минатата година раководителот што го водел бизнисот со половни производи за Доујин, сестринската апликација на Тикток во Кина, се пресели од Шангај во Сиетл за да го развие работењето во САД. Сега тој надгледува луксузна половна стока и колекционерски производи (како часовници) и го шири тимот посветен на онлајн продажба.

Тикток лајв станува сè посилна продажна алатка за луксузни препродавачи желни за директна интеракција со купувачите. Тикток неодамна почна со аукции во живо, овозможувајќи им на продавачите да започнат наддавање за чанти и други дизајнерски производи. Некои продавачи ги претвораат аукциите во шоу со висок интензитет, додека други се обидуваат да го реплицираат искуството на луксузните бутици, комуницирајќи со купувачите преку коментари и пораки.

Неодамна на Тикток лајв, продавачот „Ло Дивајн луксури“ (Law Divine Luxury) од Лос Анџелес прикажал производи на „Прада“ и „Шанел“, додека понудите за други половни чанти, како кожена чанта „луј витон“ од 1.699 долари, излегувале на дното од екранот. „Севентинт стрит“ ангажирал посебен лајвстрим-водител, кој во живо им прикажува чанти на купувачите по пет часа дневно. Тие продале „биркин“ за 20.000 долари, а неодамна започнале да организираат поголеми неделни емисии, за време на кои понекогаш остваруваат и над 30.000 долари во еден ден.

Винтиџот е во тренд, а растот на половниот луксуз во рамките на социјалната трговија делумно го поттикнува ненаситната желба на купувачите за постари, ретки, квалитетно изработени парчиња, вели Спердуто. Освен ако Тикток не биде забранет низ САД (што сега изгледа сè помалку веројатно), таа очекува дека побарувачката само ќе расте.

„Ќе продолжи да расте со огромна брзина, бидејќи сите чанти што денес се нови еден ден ќе бидат винтиџ“, додава таа, нагласувајќи дека постарите модели „мураками“ на „Луј Витон“ се продаваат подобро од новите. „Во моментов луѓето едноставно обожаваат винтиџ чанти.“