Според моето мислење, часовникот е совршен подарок. Тоа е нешто што може да се носи секој ден, многу лесно може да трае засекогаш, остава впечаток и претставува разбирање на она што навистина е вредно – времето и вашите сакани.
Но, поради својата цена, часовниците се сериозна одлука, што значи дека нивното купување за други може да предизвика голем стрес. Од многу луѓе слушам дека сакаат да го направат тоа, но се плашат дека ќе направат погрешен избор. Мојот вообичаен совет е да одите во мултибренд-продавница заедно со лицето на кое му го подарувате часовникот и заедно да го изберете. Изборот на часовник може да биде прекрасен начин да се создаде спомен: продавниците секогаш прават мал, посебен настан од тоа, со шампањ и убава кутија, ја приспособуваат белезицата веднаш на самото место, па дури и организираат гравирање ако сакате .
Сепак, особено е убаво да се изненади некој со смел избор, ако за тоа имате нерви. За да го олеснам тој потфат, секоја година подготвувам водич за подароци – часовници во различни ценовни категории.
Прочитај повеќе
„Картие“ е „Ролекс“ за генерацијата зед, благодарение на Тејлор Свифт
Објавата за свршувачката на Тејлор Свифт и нејзиниот редок часовник „картие“ од злато и дијаманти предизвикаа возбуда кај љубителите на часовници, зацврстувајќи го „Картие“ како најпосакуван бренд од генерацијата зед.
03.12.2025
Мал часовник, голема стилска изјава
Од винтиџ стандардите до „картие“ и „тудор“, трендот во часовничарството покажува дека машкоста денес повеќе не се мери според големината на часовникот, туку според неговиот карактер и дизајн.
13.11.2025
Сакате „ролекс“ годинава? Ќе ве чини скапо
Луксузниот пазар на часовници закрепнува, а „Ролекс“ повторно доминира – но со новите царини и ограничената понуда, цените наскоро ќе пораснат уште повеќе.
28.10.2025
Механичко ремек-дело на „Вашерон Константин“ ѝ пркоси на дигиталната ера
„La Qête du Temps“, раскошниот часовник на „Вашерон Константин“ изложен во „Лувр“, претставува сè што треба да се сака кај фината хорологија.
11.10.2025
Наскоро често ќе слушате за луксузните часовници на „Порше“
Со амбиција за тројно зголемување на производствениот капацитет и со актерот Орландо Блум како амбасадор на брендот, „Порше дизајн“ храбро напредува кон иднината на луксузните часовници.
10.08.2025
Но, оваа празнична сезона решив да направам нешто поинакво. Цената е едно, но потребите и личноста се нешто сосема друго. Можеби знаете дека сакате да потрошите 1.000 долари за часовник, но каков часовник навистина му е потребен на оној кому му е наменет? Елегантен? Спортски? Класичен? Необичен? Дали личноста сака метална белезица или претпочита кожен ремен? Керамичко куќиште или злато? Дали воопшто размислуваме за дијаманти?
Затоа, наместо според цената, овој водич го организирам според типот на личноста. Следуваат вистински типови луѓе за кои ме прашале да препорачам часовник. Тоа значи дека не сите овие часовници се нови или трендовски. Но, колку што ми е познато, сите се релативно лесно достапни, без премногу компликации.
За вашиот внук што сака часовник од челик за првите разговори за работа
Tissot
„Тисо ПР 100“ (Tissot PR 100)
Порано постоеја повеќе брендови што изработуваа висококвалитетни швајцарски челични кварцни часовници под 1.000 долари, но многу од нив станаа полуксузни (види: „ТАГ Хојер“ – TAG Heuer) или направија компромис со квалитетот. „Тисо“ е одличен бренд за кварцен часовник под 500 долари или автоматик под 1.000 долари. Многу модели потсетуваат на други познати брендови – ќе видите модели што личат на „ролекс“ (Rolex ) или АВЦ (IWC) – но се доволно различни за да не изгледаат како копии. Јас особено го сакам „тисо ПР 100“, кој го има во многу големини и бои, но има и многу други одлични опции. (350 долари)
За моќна дама што сака часовник со дијаманти
Chopard
„Шопар алпин игл 33“ (Chopard Alpine Eagle 33)
На „Ролифест“, елитен собир на колекционери во Њујорк оваа есен, седев покрај извршна директорка на една банка, која ми рече дека сака да ги проучува и да им се восхитува на комплицираните часовници – но кога станува збор за тоа што сака да носи, тоа се парчиња со дијаманти. Почитувам. Сјајните модели „алпин игл“ од „Шопар“ се одлична комбинација на грандиозност и блесок, а овој модел доаѓа во умерена големина од 33 милиметри, но сепак содржи автоматски механизам. (Многу мали женски часовници со дијаманти се кварцни.) (49.500 долари)
За некој што го сака својот прв „сериозен“ часовник
IWC Schaffhausen
„ИВЦ шафхаузен“ (IWC Schaffhausen Pilot’s Watch Mark XX)
Кога некој ќе ме праша за купување „вистински“ часовник, секогаш го упатувам во мултибренд-продавница да го разгледа изборот. Речиси секогаш излегуваат со еден од два часовници: со „ролекс“, затоа што мислат дека тоа треба да го земат, или со ИВЦ, затоа што се заљубиле. А луѓето што купуваат ИВЦ секогаш се многу задоволни – часовниците добиваат комплименти, ѝ прилегаат речиси на секоја облека и секогаш се класични. Разумно се ценети, доаѓаат во многу бои и материјали и се квалитетно изработени. Не можете да погрешите со „португисер“ или „пајлотс воч“, како овој во зелена боја, со совршена големина од 40 милиметри. (5.800 долари)
За финансиски тип на личност што работи во канцеларија каде што сите постојано носат различен часовник
„Панераи луминор кваранта“ (Panerai Luminor Quaranta)
Дури и јас се изненадив од ова барање, но каква забавна задача! (Ако некој навистина мора да носи различен часовник секој ден, ве молам јавете ми се. Со задоволство ќе ви бидам партнер за купување.) Го препорачувам „панераи“ со големина од 40 милиметри, модел „кваранта“, кој ме воодушеви кога се појави во 2022 година. Тоа е помала верзија на нивните масивни нуркачки часовници „луминор“ и многу полесно се вклопува под ракавот на костум. Го обожавам изгледот на „панераи“, но имам тенки зглобови, па неодамнешното воведување помали големини низ целата колекција е вистинско богатство. Овој модел доаѓа и со дополнителен гумен ремен за спортски активности. (8.200 долари)
За адвокат
„Номос“ (Nomos Glashütte Tangomat Date)
Некој што работи квалитетно, на врвно професионално ниво и во глобален контекст, има потреба од впечатлив, но ненаметлив часовник, нешто на што може да биде горд без потреба да го истакнува, исто како и на својата работа.. Ова беше првиот убав часовник што си го купив сам, како подарок што ќе го носам на мојата свадба. Според моето скромно мислење, „номос глашите тангомат дејт“ (Nomos Glashütte Tangomat Date) е најдобриот.
Со дијаметар од 38,3 мм и висина од 8,3 мм, совршено лежи на зглобот, а особено уживав да го набљудувам механизмот низ проѕирниот заден капак на куќиштето. „Номос“ (Nomos) е одличен германски бренд, кој вешто работи со боите, а нивната линија „Клуб кампус“ (Club Campus) нуди многу разиграни и интересни опции по подостапна цена. Во духот на хуманоста, тие имаат и линија часовници чија продажба ја поддржува организацијата Лекари без граници.
Убедив толку многу луѓе да купат „тангомат“ (Tangomat) , што едноставно не можев да го прескокнам тука.
Nomos Glashütte
(4.310 долари)
За мајка што никогаш не си купила часовник за себе
Longines
„Лонжинс долчевита“ од 18-каратно злато и не’рѓосувачки челик (Longines DolceVita 18K Gold and Stainless Steel)
Човекот што ја побара оваа препорака на крајот ѝ рече на сопругата дека ќе пушти срце и ќе ѝ купи убав часовник. Таа му одговори дека нема потреба – па тој навистина не го купи. Да бидеме јасни: не требаше да ја послуша!
„Лонжинс“ има многу часовници по пристапна цена што изгледаат одлично и носат класична елеганција – и за жени и за мажи. Особено ми се допаѓа овој модел, со ширина од 20 мм и кварцен механизам. Тоа е часовник што ќе трае со години, без да ја изгуби својата вредност, и кој никогаш нема да излезе од мода.
(2.400 долари)
За оние што сакаат сè – освен „ролекс“
Vacheron Constantin
„Вашерон“ со месечеви фази и ретрограден датум (Vacheron Constantin Overseas Moonphase Retrograde Date)
Дали знаевте дека просечниот купувач што првпат се одлучува за „вашерон константин“ (Vacheron Constantin) веќе поседува околу осум часовници? Ова се сериозни часовници за вистински познавачи. „Оверсис“ (Overseas) е препознатливиот спортски модел на брендот – исто како што „ројал оук“ (Royal Oak) е за „Одемар Пиге“ (Audemars Piguet) или „наутилус“ (Nautilus) за „Патек Филип“ (Patek Philippe), другите два члена на т.н. света тројка на швајцарското часовничарство.
Кога првпат го видов овој модел со приказ на месечевите фази, со автентична ретроградна стрелка за датум и интензивно син бројчаник, во 2023 година, веднаш се вљубив. Но, кој било модел од колекцијата „Оверсис“ (Overseas) е сигурен избор, часовник што се издвојува и се истакнува во морето од „сабмаринери“ (Submariner).
(51.000 долари)
За оние што сакаат „ролекс“
Rolex
„Ролекс“ (Rolex Explorer 36 in Oystersteel and Yellow Gold)
Времето на чекање за „ролекс“ денес е значително пократко отколку за време на пандемијата, па сега може да се очекува модел како „ојстер перпетуал“ (Oyster Perpetual) или „дејтџаст“ (Datejust) да се добие по период од неколку недели. Неофицијално, „експлорер“ (Explorer) е најлесен за набавка, а со оглед на тоа што двобојните часовници повторно се во тренд, токму овој модел би бил мој избор.
Со дијаметар од 36 мм, тој е помал и одлично прилега на повеќето зглобови, а големите броеви и маркери светат долго во темнина, обезбедувајќи јасна читливост во сите услови.
(13.200 долари)
За жена што сака ненаметлива класика
Cartier
„Картие“ (Cartier Tank Must Solarbeat)
Кога човек купува скап часовник како подарок за својата сопруга, „Картие“ (Cartier ) речиси секогаш се наметнува како најсигурен избор. Советував многу сопрузи што бараа „вистински“ часовник за своите жени, а огромното мнозинство на крајот се одлучија за моделите „тенк“ (Tank). Жените со задоволство го прифаќаат овој модел, кој со години останува нивен сигурен избор, уверени дека изборот е вистински, без потреба повторно да размислуваат за часовник.
Овој помал модел има иновативен кварцен механизам, кој ја апсорбира и природната и вештачката светлина преку ситни дупчиња на бројчаникот. На тој начин се полни батеријата и му овозможува на часовникот да работи околу 16 години без потреба од сервисирање.
(4.000 долари)
За креативна личност што сака нешто едноставно за околу 1.000 долари
Beaubleu Paris
„Боблблу Париз“ (Beaubleu Paris Ecce Smalt)
Во ваква ситуација им помогнав не на едно, туку на две лица. Во овој ценовен ранг постојат многу одлични независни брендови, меѓу кои „Балтик“ (Baltic), „Фурлан Мари“ (Furlan Marri) и „Сигал“ (Seagull). Во моментов, мој личен фаворит е „Студио Андердог“ (Studi0 Underd0g), креативен британски бренд, познат по часовници со впечатливи колоритни решенија. Но нивните модели се пуштаат во ограничени серии и потребна е претходна пријава за да се дојде до нив.
На саемот за часовници „Виндап“ (WindUp) во Њујорк, одржан во текот на годинава, беше воведен лотариски систем за најновиот модел. Затоа, ако купувате токму сега – неколку недели пред празниците – би ви препорачал едно од моите омилени откритија од „Виндап“: „боблблу париз“.
Линијата „Есе“ (Ecce) се издвојува со необични кружни стрелки наместо класични прави, а нивното движење има речиси хипнотизирачки ефект. Оваа боја е навистина впечатлива и природно поттикнува разговор и интерес кај околината.
(1.014 долари)
За идниот младоженец
Omega
Ова е моето омилено прашање. „Ролекс дејтџаст“ или „картие сантос“ (Cartier Santos) се лесни и популарни избори. Но секогаш сакам да ги насочам луѓето кон „Омега“ (Omega), еден од најголемите и најзначајни светски брендови на часовници, а особено кон „спидмастер мунвоч“ (Speedmaster Moonwatch).
Тоа е сепак часовникот што навистина бил на Месечината и колку е романтично на партнерот да му кажеш дека би отишол таму и назад за него. Совршено се вклопува со венчален костум, исто како и зад воланот на изнајмен кабриолет за време на медениот месец. Џејмс Бонд носи „омега“, како и многу олимписки шампиони.
Бракот е една од најтешките, но и највозбудливите одлуки што човек може да ги донесе, истовремено луд потфат и чин на доверба. Во тој контекст, „омега“ е совршен избор.
(8.600 долари)
За оние што сакаат нешто впечатливо
Dennison
„Денисон“ со природен камен лапис лазули во злато (Dennison Natural Stone Lapis Lazuli in Gold)
На еден од моите неодамнешни летови од Швајцарија забележав двојка што носеше усогласени часовници „денисон“, со различни бројчаници од природен камен, и помислив дека тоа е најстилското нешто што сум го видел. Дизајнерите на овој нов бренд, со искуство стекнато во „Ролекс“ и „Одемар Пиге“, создадоа едноставен кварцен часовник што секогаш привлекува внимание.
Овој бренд им го препорачувам и на оние што допрва влегуваат во светот на часовниците, но и на посветени љубители на дизајнот.
(690 долари)
За баба
Coach
„Коуч арден“ (Coach Arden)
Да бидеме искрени – во еден момент сите ќе посакаме часовник со поголеми броеви и едноставен, лесно читлив бројчаник. Веројатно има многу луѓе во вашиот живот што бараат часовник што е практичен, убав и со прифатлива цена за никогаш да не мора да се грижат за него. „Ситизен“ (Citizen) и „Фосил“ (Fossil) нудат многу вакви модели, а забележав дека и „Мовадо“ (Movado) има одлични опции.
Овој модел од „Коуч“ го препорачувам поради ниската цена, пријатниот дизајн и тригодишната гаранција. Дополнителен плус е што често може да се најде и со празнични попусти.
(159 долари)
.webp){kind=icon}
