Баклавата е популарен деликатес во многу земји низ Блискиот Исток, Балканот и Медитеранот. Слаткиот десерт приготвен од тенки слоеви тесто, исполнет со сечкани ореви или други видови јаткасти плодови, прелеан со шеќерен сируп, традиционално се поврзува со Босна и Херцеговина. Често им е омилен десерт на туристите што го посетуваат Сараево.
Овој деликатес има длабоко вкоренето место во локалната кујна и култура. Иако основата е слична, има различни стилови и вкусови. Баклавата може да се приготви со различни видови јаткасти плодови, како ореви, лешници или бадеми, а баклавата со ф'стаци, па дури и со чоколадо, е многу популарна. Можни се и варијации во филовите, дополнителни зачини (како цимет) и облици на баклава (во форма на триаголници, правоаголници и сл.).
Баклавата често има симболично значење во културата на Сараево. Таа ги претставува сладоста на животот, гостопримството и добрината. Во многу случаи приготвувањето за гости е посебен гест на добредојде и почит, а е многу важен и за време на празниците. Во Сараево има голем број слаткарници и продавници што се специјализирани за баклава и други традиционални деликатеси. Тие често нудат различни видови баклави, како и други слатки задоволства што се дел од богатата локална кулинарска понуда.
Depositphotos
Ги издвоивме првите пет места каде што треба да пробате баклава доколку сте во главниот град на Босна и Херцеговина.
Куќата на баклавата
Во центарот на Мала Алеја на Илиџа се наоѓа „Куќата на баклавата“ (Kuća baklava), која е рај за сите гурмани што ги ценат автентичната традиција и извонредноста во приготвувањето на баклавата. Со секој чекор во „Куќата на баклавата“ ги чувствувате топлината и гостопримството што овој град толку вешто ги нуди. Со љубов и внимание, мајсторите на оваа слаткарница секојдневно создаваат ремек-дела од тенки слоеви тесто и сочни јаткасти плодови.
Широката понуда на баклави ќе ве маѓепса со својата разновидност и богатство на вкус. Секој вид носи своја приказна и карактер, оживувајќи ја традицијата пренесена низ генерациите. Баклавата од „Куќата на баклавата“ не е само десерт туку е патување низ вековното наследство на Сараево. Секој залак е покана за истражување на културата, традицијата и вкусноста што се пренесува од генерација на генерација.
Таму можете да најдете традиционална баклава, но и интересни мешавини, како чоко-микс, егзотичен микс и познатата „Нусрет ф’стаци со сладолед“. Цените се многу прифатливи, па можете да нарачате кутии од 25 KM до 50 KM. Доброто е што не мора секогаш да одите до Илиџа за да земете баклава, „Куќата на баклавата“ нуди и достава до вашата адреса.
Дуќан баклава
Местото се издвојува по внимателно одбраниот избор на баклави, секоја со свој уникатен карактер. Во обид да се зачува традицијата на БиХ, „Дуќан баклава“ нуди традиционални деликатеси, направени по истиот рецепт како што е создаден пред повеќе од 200 години. Овие рецепти се чуваат во кругот на семејството и се пренесуваат низ генерациите, а во последните 20 години граѓаните можат да уживаат во овие вкусови и преку отворена продавница.
Баклавите се прават целосно рачно, од тестото до „редењето“. Особено се издвојуваат по баклавата „Џандар“, чиј процес на производство трае минимум три дена, а бара трпение и голема умешност во приготвувањето. Интересно е што нема пишани информации за потеклото на овој вид баклава, но рецептот се пренесувал низ три генерации и денес останува ист како што бил во времето на создавањето. Цените на пакетите се од 28 до 40 КМ.
Фистикзаде
Ориенталниот вкус на баклавата од Газијантеп можете да го најдете во центарот на Сараево, а баклавата е специфична по вкусот во комбинација со ф'стаци. Она што ги издвојува од другите, меѓу другото, е специјалната баклава без шеќер - засладена со стевија (засладувач без шеќер). Освен баклава, овде можете да пробате и разни турски десерти, како долама-баклава, дилим-баклава, чоко-баклава, баклава со лешници и кадаиф. Во прекрасниот ентериер можете да уживате во баклава со домашни чаеви, а ова место е честа станица за туристите.
Оваа слаткарница претставува вистинска експлозија на вкусови преку различни слатки задоволства, кои ве повикуваат да истражувате и да уживате. По секоја посета гостите се враќаат не само за беспрекорниот квалитет туку и за чувството на припадност во духот на Сараево што се манифестира во секој агол од овој сладок рај.
Баклава Сараjбосна
Во оваа слаткарница можете да најдете над 100 вида босански деликатеси, различни и по формата и по вкусот. Покрај босанската баклава, ќе можете да пробате и азербејџанска баклава и различни комбинации на баклава по цени од 15 до 60 КМ. Комбинацијата од нежно испечена кора и сочни јаткасти плодови резултира со неодолив вкус, кој ќе ве врати во традиционалната сараевска атмосфера. Самата локација овозможува поголема пристапност, особено за туристите, кои ретко можат да одолеат на изложената баклава.
Светот на баклавата
Уште еден семеен рецепт што ќе предизвика насмевка на вашето лице. „Светот на баклавата“ е навистина печат на автентичноста. Нивната широка разновидност на баклави ја одразува различноста на културите и традициите што ја сочинуваат душата на Сараево. Без разлика дали сте љубител на класичните вкусови на јаткасти плодови или храбар авантурист што бара да проба нешто ново, тука ќе најдете баклави што се приготвени со експертиза и љубов.
Персоналот на „Светот на баклавата“ е секогаш подготвен да ги сподели знаењето и приказната зад секој деликатес, обезбедувајќи ви уште подлабоко разбирање на богатата традиција на Сараево за баклава. Цените се многу пристапни, а бојата и мирисот на баклавата се навистина посебен свет.
.webp){kind=icon}
